കൊച്ചി: നടൻ ഉണ്ണി മുകുന്ദനുമായുള്ള തന്റെ ഏഴ് വര്ഷം നീണ്ട ഗാഢസൗഹൃദത്തെക്കുറിച്ച് സമൂഹമാധ്യമത്തില് എഴുതി ഹിന്ദി നടി പ്രാചി തെഹ്ലാൻ. ‘മാമാങ്കം’ എന്ന സിനിമയില് നായികയായി എത്തിയ പ്രാചി തെഹ് ലാന് അതിലെ പ്രധാന റോള് അഭിനയിക്കുന്ന ഉണ്ണി മുകുന്ദനുമായി അടുത്ത സൗഹൃദം പുലര്ത്തിയിരുന്നു.
മാമാങ്കം സിനിമയുടെ ഷൂട്ട് ലൊക്കേഷനില് ആരംഭിച്ച സൗഹൃദം ഇപ്പോള് ഏഴ് വര്ഷമായി തെല്ലും ഉലയാതെ തുടരുന്നുവെന്ന് പ്രാചി തെഹ്ലാന് അവകാശപ്പെടുന്നു. സ്ക്രീനിന് പുറത്ത് കുട്ടിത്തം നിറഞ്ഞ നിഷ്കളങ്കത എപ്പോഴും കണ്ണുകളില് സൂക്ഷിക്കുന്ന ഒരു സുഹൃത്താണ് ഉണ്ണിയെന്ന് പ്രാചി പറയുന്നു.
ഷൂട്ടിങ് സെറ്റില് തന്നോട് വളരെ ഒഴുക്കോടെ ഹിന്ദി സംസാരിക്കാൻ കഴിയുന്ന ഒരാളെ കിട്ടിയപ്പോഴാണ് സൗഹൃദം ശക്തമായതെന്നും പ്രാചി ഓർക്കുന്നു. ഉണ്ണിയുടെ യഥാർഥ വ്യക്തിത്വത്തെക്കുറിച്ച് അധികം ആർക്കും അറിയില്ലെന്ന് പ്രാചി പറയുന്നു. ചിലർക്ക് അവൻ ശാഠ്യക്കാരനായി തോന്നാമെങ്കിലും, ഒരു നടൻ എന്നതിലുപരി അവൻ മികച്ചൊരു മനുഷ്യനാണെന്ന് പ്രാചി പറയുന്നു. യാതൊരുവിധ സിനിമാ പാരമ്പര്യവുമില്ലാതെ, സ്വന്തം പ്രയത്നം കൊണ്ട് മാത്രം സിനിമയില് പേരെടുത്ത ഒന്നാം തലമുറ നടനാണ് ഉണ്ണി മുകുന്ദൻ എന്നും, അത് അത്ര എളുപ്പമുള്ള കാര്യമല്ലെന്നും പ്രാചി തന്റെ കുറിപ്പിലൂടെ കൂട്ടിച്ചേർക്കുന്നുണ്ട്.
ഏഴുവർഷം കൂട്ടായി നീ എന്നോടൊപ്പം നിന്നു. നിന്റെ നിഷ്കളങ്കത നിറഞ്ഞ ആ കണ്ണ്. കോഫീ ഡേറ്റുകള്ക്ക് കൊണ്ടുപോകുന്ന നിമിഷങ്ങള്. പരസ്പരം മിണ്ടിയും പിണങ്ങിയും പങ്കുവെച്ച കുറെ ഓർമ്മകള്…ഏറ്റവും ചെറിയ കാര്യങ്ങള്ക്കും തമാശകള്ക്കും ഒരുമിച്ച് പൊട്ടിച്ചിരിക്കാനും, പരസ്പരം കളിയാക്കാനും ഒട്ടും വിരസതയില്ലാതെ മണിക്കൂറുകളോളം സംസാരിക്കാനും തങ്ങള്ക്ക് സാധിക്കാറുണ്ട്. ഇതാണ് തങ്ങളുടെ ലളിതമായ സൗഹൃദത്തിന്റെ രഹസ്യം. കൂടാതെ, തനിക്ക് ഏറെ ഇഷ്ടമുള്ള ‘ടീ ഡേറ്റുകള്ക്ക്’ കൊണ്ടുപോകുന്ന ഏക സുഹൃത്ത് ഉണ്ണി മുകുന്ദനാണെന്നും പ്രാചി പറയുന്നു. സിനിമാനിര്മ്മാണത്തിലേക്കിറങ്ങിയ ഉണ്ണി മുകുന്ദൻ ഫിലിംസിന് എല്ലാവിധ അഭിനന്ദനങ്ങളും ആശംസകളും പ്രാചി ഈ കുറിപ്പില് നേരുന്നു.
ഇതോടെ ഇത് വെറും സൗഹൃദമോ അതോ പ്രണയത്തിന്റെ സൂചനയോ എന്ന് പലരും പ്രതികരിക്കുന്നു. മറ്റൊരു ഗോസിപ്പിന് വഴിയൊരുങ്ങിയിരിക്കുന്നു എന്നും ചിലര് പ്രതികരിച്ചു.
. ‘മാമാങ്കം’ സിനിമയിലൂടെ മലയാളികള്ക്ക് സുപരിചിതയായ പ്രാചി തെഹ്ലാൻ ഒരു മുൻ ദേശീയ കായികതാരം കൂടിയാണ്. 2010-11 കാലഘട്ടത്തില് ഇന്ത്യയെ പ്രതിനിധീകരിച്ച നെറ്റ്ബോള് ടീമിന്റെ ക്യാപ്റ്റനായിരുന്ന പ്രാചി, ബാസ്കറ്റ്ബോളിലും മികച്ച കഴിവ് തെളിയിച്ചിട്ടുണ്ട്.
