ടെഹ്‌റാന്‍: അമേരിക്ക-ഇറാന്‍ വെടിനിര്‍ത്തല്‍ കരാര്‍ ലംഘിച്ച് ലബനനില്‍ ഇസ്രായേല്‍ ആക്രമണം നടത്തിയതിനെ തുടര്‍ന്ന് ഇറാന്‍ ഹോര്‍മുസ് കടലിടുക്ക് വീണ്ടും അടച്ചു.ഇസ്രായേല്‍ ആക്രമണം കരാറിന്റെ നഗ്‌നമായ ലംഘനമാണെന്ന് കുറ്റപ്പെടുത്തിയാണ് ഇറാന്റെ ഈ അടിയന്തര നീക്കം.
തങ്ങളുടെ മരവിപ്പിച്ച സ്വത്തുക്കള്‍ വകമാറ്റി ഗള്‍ഫ് രാജ്യങ്ങള്‍ക്ക് നഷ്ടപരിഹാരം നല്‍കാനുള്ള അന്താരാഷ്‌ട്ര നീക്കങ്ങളെ യാതൊരു കാരണവശാലും അംഗീകരിക്കില്ലെന്നും ഇറാന്‍ കര്‍ശന മുന്നറിയിപ്പ് നല്‍കി.ഹോര്‍മുസ് വീണ്ടും അടച്ചതോടെ മേഖലയില്‍ വീണ്ടും സംഘര്‍ഷം ശക്തമാകുമോ എന്ന ആശങ്കയും ശക്തമാണ്.
നേരത്തെ ഇറാനും അമേരിക്കയും ഇന്ന് ജനീവയില്‍ നടത്താനിരുന്ന ചര്‍ച്ച അമേരിക്കന്‍ വൈസ് പ്രസിഡന്റ് ജെ ഡി വാന്‍സ് പിന്മാറിയതോടെ റദ്ദാക്കിയിരുന്നു. ലബനനില്‍ ഇസ്രയേല്‍ തുടരുന്ന കനത്ത ആക്രമണം സ്ഥിതി വഷളാക്കുമെന്ന ആശങ്കയുടെ അടിസ്ഥാനത്തിലായിരുന്നു പിന്മാറ്റം.വിഷയത്തെ ചൊല്ലി ഇസ്രയേലിനും അമേരിക്കയ്‌ക്കും ഇടയില്‍ വാക്‌പോരും ശക്തമാണ്.
ഇതിനിടെ,ഇസ്രയേലിനെ സംരക്ഷിച്ച മൂന്നില്‍ രണ്ട് ആയുധങ്ങളും അമേരിക്കന്‍ പൗരന്മാരുടെ നികുതിപ്പണമാണെന്ന് അമേരിക്കന്‍ വൈസ് പ്രസിഡണ്ട് പറഞ്ഞത് ചര്‍ച്ചയാവുകയാണ്.ഇസ്രയേല്‍ ഇതിനോട് ഔദ്യോഗികമായി പ്രതികരിച്ചിട്ടില്ല.
