കൊച്ചി:തെന്മല വെള്ളിമലയിലെ അഭയ കേന്ദ്രത്തില് വയോധികമാര് പീഡിപ്പിക്കപ്പെട്ടതില് സ്വമേധയാ ഇടപെട്ട് ഹൈക്കോടതി.ലൈസന്സില്ലാത്ത വൃദ്ധസദനത്തിലെ പീഡനം ഗൗരവകരമെന്ന് ഹൈക്കോടതി നിരീക്ഷിച്ചു. സിസ്റ്റം നിസംഗത പാലിക്കുന്നുവെന്നും കോടതി കുറ്റപ്പെടുത്തി.
തെന്മല പീഡനത്തിലും പത്തനംതിട്ട വൃദ്ധ സദനത്തില് 17 കാരന് മര്ദനമേറ്റതിലും ജസ്റ്റിസ് ദേവന് രാമചന്ദ്രന് അധ്യക്ഷനായ ഡിവിഷന് ബെഞ്ച് സര്ക്കാരിനോട് റിപ്പോര്ട്ട് ആവശ്യപ്പെട്ടു. കേസ് 23 ന് വീണ്ടും പരിഗണിക്കും.
കഴിഞ്ഞ പതിനൊന്നിനാണ് തെന്മലയില് അനധികൃതമായി പ്രവര്ത്തിക്കുന്ന അഭയ കേന്ദ്രത്തില് വയോധികര് പീഡിപ്പിക്കപ്പെട്ടത്. കേസിലെ പ്രതിയായ അഭയ കേന്ദ്രം നടത്തിപ്പുകാരന് ബ്രഹ്മദാസ് റിമാന്ഡിലാണ്.ഇത്തരത്തിലുള്ള സംഭവങ്ങള് മുന്കൂട്ടി തടയാന് സര്ക്കാര് സംവിധാനങ്ങള് എന്തുകൊണ്ട് പരാജയപ്പെട്ടുവെന്ന് ചോദിച്ച ഹൈക്കോടതി വയോധികര്,രോഗികള്, മാനസിക വെല്ലുവിളികള് നേരിടുന്ന ദുര്ബല വിഭാഗങ്ങളെ സംരക്ഷിക്കേണ്ടത് ഭരണഘടനാപരമായ ബാധ്യതയാണെന്ന് കോടതി ഓര്മ്മിപ്പിച്ചു.
നിയമ വിരുദ്ധമായി പ്രവര്ത്തിക്കുന്ന നിരവധി സ്ഥാപനങ്ങള് ഉണ്ടാകാമെന്നും കോടതി പറഞ്ഞു. ഇത്തരം നടപടികള് ആവര്ത്തിക്കാതിരിക്കാന് ശക്തമായ നടപടി വേണമെന്ന് സര്ക്കാരിനോട് കോടതി ആവശ്യപ്പെട്ടു. പത്തനംതിട്ട ഓമല്ലൂരിലെ വ്യദ്ധ സദനത്തില് ഇടുക്കി സ്വാദേശി 17 കാരന് മര്ദ്ദനമേറ്റതിലും ഹൈക്കോടതി റിപ്പോര്ട്ട് തേടിയിട്ടുണ്ട്. കേസ് ചൊവ്വാഴ്ച പരിഗണിക്കും
