ദക്ഷിണ കൊറിയയ്ക്കെതിരെ മെക്സിക്കോ താരം ലൂയിസ് റോമോ (ജഴ്സി നമ്പര് 7)ഗോള് നേടുന്നു
സപോപന്: ഏകപക്ഷീയമായ ഒരു ഗോള് ബലത്തില് ദക്ഷിണ കൊറിയയെ തോല്പ്പിച്ച മെക്സിക്കോ ഈ ലോകകപ്പ് ഫുട്ബോളില് നോക്കൗട്ട് ഉറപ്പിക്കുന്ന ആദ്യ ടീമായി. ഇന്നലെ രാവിലെ നടന്ന മത്സരത്തില് ഭാഗ്യം കടക്ഷിച്ചെന്നപോലെയാണ് ആതിഥേയര് ജയം നേടിയത്. സ്വന്തം കൈയില്നിന്നും വഴുതിയ മത്സരമായിരുന്നു മികച്ച പോരാട്ട വീര്യത്തിലൂടെ മെക്സിക്കോ ജയിച്ചുകയറിയത്. കളിയുടെ 50-ാം മിനിറ്റില് നേടിയ ഗോളിലാണ് മെക്സിക്കോ വിജയിച്ചത്.
ഈ ലോകകപ്പിന്റെ ആദ്യ ഗോള് നേടിയ മെക്സിക്കന് ഇടത് വിങ്ങര് ജൂലിയന് ഖ്വിനോനസ് ഇടത് വശത്ത് നിന്ന് കൊറിയന് ബോക്സിന് മുന്നിലേക്ക് അപകടകരമായൊരു ക്രോസ് സെന്റര് സ്ട്രൈക്കര് റൗള് ജിമെനെസിന് ഉയര്ത്തി നല്കുന്നു. അതിവേഗം ഹെഡ്ഡ് ചെയ്തെങ്കിലും ആ ഷോട്ടിനൊപ്പം ഉയരത്തില് ചാടിയ കൊറിയന് പ്രതിരോധ താരത്തന്റെ തലയില് കൊണ്ട് പന്ത് ഉയര്ന്നു പൊങ്ങി. പന്ത് താഴേക്ക് പതിക്കുമ്പോള് കൈപ്പിടിയിലൊതുക്കാനായി ഓടിയെത്തിയ കൊറിയന് ഗോളി കിം സ്വെങ്-ഗ്യൂ പന്ത് പിടികൂടിയെങ്കിലും കൈയില് നിന്ന് വഴുതി താഴെ വീണു. നിയന്ത്രണം കിട്ടാതെ ഗോളിയും താഴേക്ക് വീണു. ഗ്രൗണ്ടില് വീണ പന്ത് ബൗണ്സ് ചെയ്യുമ്പോഴേക്കും ഓടിയെത്തിയ മെക്സിക്കന് മിഡ്ഫീല്ഡര് ലൂയിസ് റോമോ ആളൊഴിഞ്ഞ പോസ്റ്റിലേക്ക് പന്തിനെ വലംകാല് കൊണ്ട് തട്ടിവിട്ടു. കൊറിയന് ശ്വാസം നിലച്ചുപോയ നിമിഷമായിരുന്നു ഇത്. ആതിഥേയ ടീമും ആരാധകരും ആര്പ്പുവിളിയോടെ ഈ നിമിഷത്തെ വരവേറ്റു. ഈ ഒരു ഗോളില് തൂങ്ങി രക്ഷപ്പെടുന്നതിനപ്പുറം പിന്നീട് മറ്റൊന്നും മെക്സിക്കോ ചെയ്തില്ല. കൊറിയാകട്ടെ മുന്നേറ്റങ്ങള് പലത് നടത്തി. മത്സരം സ്വന്തമാക്കാന് വേണ്ടുന്ന ഗോള് നേടാനുള്ള കളി ടീമില് നിന്നുണ്ടായില്ല. സൂപ്പര് താരം സണ് ഹ്യൂങ്-മിന് ഉള്പ്പെടെ നിരന്ന ടീമില് മികച്ച മുന്നേറ്റങ്ങള് പലതവണ കണ്ടു അതിനൊത്ത ഫലം സൃഷ്ടിക്കാന് സാധിക്കാതെ തോല്വി വഴങ്ങിക്കൊടുത്തതില് കൊറിയക്കാര്ക്ക് ദുഃഖിക്കാം. ആദ്യ മത്സര ജയത്തിലൂടെ കൊറിയ മൂന്ന് പോയിന്റുമായി രണ്ടാം സ്ഥാനത്തുണ്ടെന്നത് നോക്കൗട്ടിലേക്കുള്ള ഏഷ്യന് പ്രതീക്ഷ ഭദ്രമാക്കി. ഈ മത്സരത്തിന് മുമ്പേ നടന്ന ദക്ഷിണാഫ്രിക്ക-ചെക്ക് റിപ്പബ്ലിക്ക് മത്സരം സമനിലയില് കലാശിച്ചതും കൊറിയയ്ക്ക് ആശ്വാസമാണ്. രണ്ട് ജയങ്ങളില് നിന്ന് ആറ് പോയിന്റുമായാണ് മെക്സിക്കോ റൗണ്ട് ഓഫ് 32 പ്രവേശം ഉറപ്പിച്ചത്.
