തിരുവനന്തപുരം: ആലപ്പുഴയില് യൂത്ത് കോണ്ഗ്രസ് പ്രവര്ത്തകരെ മര്ദ്ദിച്ച കേസില് ക്രമസമാധാന ചുമതലയുളള എഡിജിപിയുടെ ഓഫീസില് പ്രത്യേക അന്വേഷണ സംഘം പരിശോധന നടത്തി. സന്ദര്ശക രജിസ്റ്റര് ശേഖരിച്ചു. ഓഫീസിലെ സിസിടിവി ദൃശ്യങ്ങളും പൊലീസ് ക്ലബിലെ രേഖകളും ശേഖരിച്ചു.
എഡിജിപി ഓഫീസില് വച്ച് കേസ് രേഖകള് തിരുത്തിയെന്ന് മുന് അന്വേഷണ സംഘം മൊഴി നല്കിയിരുന്നു. ക്രമസമാധാന ചുമതലയുണ്ടായിരുന്ന എഡിജിപി ആയിരുന്ന എം ആര് അജിത്കുമാര് ഇടപെട്ട് രേഖകള് തിരുത്തിയെന്നാണ് ഉദ്യോഗസ്ഥര് മൊഴി നല്കിയത്.ഇത് കണക്കിലെടുത്താണ് ഡിവൈഎസ്പി ബൈജു പൗലോസിന്റെ നേതൃത്വത്തിലുള്ള സംഘം എഡിജിപി ഓഫീസില് പരിശോധന നടത്തിയത്.ഒരു കേസ് അന്വേഷണത്തിന്റെ ഭാഗമായി ആദ്യമായാണ് എഡിജിപി ഓഫീസില് പരിശോധന നടത്തുന്നത്
അതിനിടെ, കേസിലെ പ്രതികളായ അഞ്ച് പൊലീസുകാരുടെ മുന്കൂര് ജാമ്യം റദ്ദാക്കണമെന്ന സര്ക്കാര് അപ്പീലില് ഹൈക്കോടതി പ്രതികളുടെ വിശദീകരണം തേടി.ഈമാസം 27 നകം മറുപടി നല്കണമെന്ന് ആവശ്യപ്പെട്ട് കോടതി നോട്ടീസ് അയച്ചു.നവകേരള യാത്രയ്ക്കിടെ യൂത്ത് കോണ്ഗ്രസ് നേതാക്കളെ മര്ദ്ദിച്ച മുഖ്യമന്ത്രി പിണറായി വിജയന്റെ ഗണ്മാന് അനില് കല്ലിയൂരും സന്ദീപ് അടക്കമുള്ള സുരക്ഷാ ഉദ്യോഗസ്ഥര്ക്കും ജാമ്യം അനുവദിച്ചത് റദ്ദാക്കണമെന്നാണ് എസ്ഐടി ആവശ്യം.
