കോംഗോയുടെ കളിക്കാര് പുല്മൈതാനത്ത് രാജ്യത്തിനായി പോരാടുമ്പോള്, ഗാലറിയില് ഒരു മനുഷ്യപ്രതിമ നിശ്ശബ്ദമായി കാവലിരിക്കുന്നു. അദ്ദേഹത്തിന്റെ കൈ ആകാശത്തേക്കുയരുന്നത് ഒരു ടീമിനെ പ്രോത്സാഹിപ്പിക്കാനല്ല; ചരിത്രത്തെ ഓര്മിപ്പിക്കാനാണ്. ലോകകപ്പില് ഇന്നലെ തന്റെ രാജ്യം പോര്ച്ചുഗലിനെതിരേ പോരാടുമ്പോഴും അദ്ദേഹം ഗാലറിയില് പ്രതിമ പോലെ നില്പ്പുണ്ടായിരുന്നു. പറഞ്ഞുവരുന്നത് കോംഗോയുടെ ഫുട്ബോള് ആരാധകന് ലുമുംബവേയയെ കുറിച്ചാണ്.
ലുമുംബ വേയ ഒരു ആരാധകന് മാത്രമല്ല, ഒരു രാജ്യത്തിന്റെ ഓര്മ്മയും അഭിമാനവും പ്രതിരോധത്തിന്റെ പ്രതീകവുമാണ്. കോംഗോയുടെ ലോകകപ്പ് യാത്രയെക്കുറിച്ച് പറയുമ്പോള് ആരാധകരുടെ ഇടയില് ഏറ്റവും കൂടുതല് ശ്രദ്ധ നേടിയ വ്യക്തിയാണ് മൈക്കിള് കുക എംബോലാന്ഡിംഗ, അഥവാ ‘ലുമുംബ വേയ’.
ആരാണ് ലുമുംബ വേയ, എന്തുകൊണ്ട് ആ നില്പ്പ്?
മിഷേല് കുക്ക എംബോലാന്ഡിംഗ എന്ന ഈ 49-കാരന് വര്ഷങ്ങളായി ഡിആര് കോംഗോ ദേശീയ ടീമിന്റെ കടുത്ത ആരാധകനാണ്. എന്നാല് അദ്ദേഹത്തെ ലോകം ശ്രദ്ധിച്ചത് 2025 ആഫ്രിക്കന് നേഷന്സ് കപ്പിലായിരുന്നു. സ്റ്റേഡിയത്തില് ആയിരക്കണക്കിന് ആരാധകര് പാട്ടുപാടി നൃത്തം ചെയ്യുമ്പോള് അദ്ദേഹം മാത്രം ഒരു പ്രതിമയെപ്പോലെ അനങ്ങാതെ നില്ക്കും.
ഡിആര് കോംഗോയുടെ ആദ്യ പ്രധാനമന്ത്രിയും സ്വാതന്ത്ര്യസമര നായകനുമായ പാട്രിസ് ലുമുംബ യോടുള്ള ആദരസൂചകമായാണ് ഈ പ്രകടനം.
കോംഗോ നഗരം കിന്ഷാസയിലെ ലുമുംബയുടെ പ്രതിമയുടെ അതേ ഭാവത്തില് വലതുകൈ ഉയര്ത്തിപ്പിടിച്ച് അദ്ദേഹം മുഴുവന് മത്സരത്തിലും നിശ്ചലനായി നില്ക്കും. ‘ലുമുംബ ജീവിച്ചിരിക്കുന്നു’ എന്ന അര്ഥത്തിലാണ് ‘ലുമുംബ വേയ’ എന്ന വിളിപ്പേര് ഉണ്ടായത്.
90 മിനിറ്റ് മാത്രമല്ല…
ചില മത്സരങ്ങളില് അധികസമയമുള്പ്പെടെ 115 മിനിറ്റിലേറെയും അദ്ദേഹം ഒരേ നിലയില് നിന്നിട്ടുണ്ട്. ഗോള് വന്നാലും, വിവാദ തീരുമാനങ്ങളുണ്ടായാലും, ആരാധകര് ആഘോഷിച്ചാലും അദ്ദേഹത്തിന്റെ ഭാവത്തില് മാറ്റമുണ്ടാകില്ല.
ദേശീയ ടീമിന്റെ ഭാഗമായ ആരാധകന്
2026 ലോകകപ്പിന് യോഗ്യത നേടിയപ്പോള് കോംഗോ താരങ്ങള് തന്നെ ലുമുംബ വേയയെ ഔദ്യോഗിക സംഘത്തിന്റെ ഭാഗമാക്കണമെന്ന് ആവശ്യപ്പെട്ടു. തുടര്ന്ന് അദ്ദേഹത്തിന്റെ യാത്ര, താമസം, ടിക്കറ്റ് തുടങ്ങിയ എല്ലാ ചെലവുകളും സര്ക്കാര് ഏറ്റെടുത്തു. അദ്ദേഹം ദേശീയ ടീമിന്റെ ‘പന്ത്രണ്ടാമത്തെ താരം’ എന്ന വിശേഷണവും നേടി.
