തിരുവനന്തപുരം: കാപ്പാ കേസില്‍ കുടുക്കി ജയിലിലടച്ച നഗരസഭയിലെ വാഴോട്ടുകോണം കൗണ്‍സിലര്‍ ആര്‍ സുഗതനെ പുറത്താക്കമെന്നാവശ്യപ്പെട്ട് എല്‍ ഡി എഫ് സമരം. നഗരസഭ ഭരണാധികാരികള്‍ക്ക് ഒരാഴ്ച സമയം നല്‍കുമെന്നും ഈ മാസം 23 നുള്ളില്‍ സുഗതനെ പുറത്താക്കിയില്ലെങ്കില്‍ എല്‍ ഡി എഫ് കൗണ്‍സിലര്‍മാര്‍ അനിശ്ചിതകാല സത്യഗ്രഹ സമരം തുടങ്ങുമെന്നുമാണ് ഭീഷണി.തിരുവനന്തപുരം ജില്ലാ കമ്മിറ്റി, കോര്‍പറേഷനിലേക്ക് നടത്തിയ പ്രതിഷേധ മാര്‍ച്ചിലാണ് നേതാക്കള്‍ ഇക്കാര്യം പ്രഖ്യാപിച്ചത്
ഒരു മാസത്തില്‍ ഒരു കൗണ്‍സില്‍ യോഗമെങ്കിലും ചേരണം എന്നതാണ് രീതിയെന്നും ഇപ്പോള്‍ കൗണ്‍സില്‍ യോഗം വിളിക്കാന്‍ ആവശ്യപ്പെട്ട് നഗരസഭ സെക്രട്ടറിക്ക് കത്ത് നല്‍കിയിട്ടും യോഗം വിളിക്കുന്നില്ലെന്നും എല്‍ ഡി എഫ് നേതാക്കള്‍ കുറ്റപ്പെടുത്തി. ഈ സാഹചര്യത്തില്‍ ഒരാഴ്ച കൂടി കാത്തിരിക്കുമെന്നും അതിനകം നടപടി ഇല്ലെങ്കില്‍ ശക്തമായ പ്രക്ഷോഭം സംഘടിപ്പിക്കുമെന്നും സി പി എം ജില്ലാ സെക്രട്ടറി വി ജോയി പറഞ്ഞു.
ബി ജെ പി നേതൃത്വത്തിലുളള കോര്‍പ്പറേഷന്‍ ഭരണത്തെ അട്ടിമറിക്കുക എന്ന ലക്ഷ്യത്തോടെയാണ് സുഗതനെ കാപ്പ കേസില്‍ കുടുക്കി തൃശൂരിലെ വിയ്യൂര്‍ സെന്‍ട്രല്‍ ജയിലിടച്ചത്.
