പത്തനംതിട്ട: ശബരിമല സ്വര്ണക്കൊള്ള കേസിലെ പ്രതി മുതിര്ന്ന സിപിഎം നേതാവ് എ. പത്മകുമാറിനെതിരായ നടപടി സസ്പന്ഷനില് ഒതുക്കി പാര്ട്ടി. പത്തനംതിട്ട സിപിഎം ജില്ലാ കമ്മിറ്റി യോഗത്തിനു പിന്നാലെയാണ് നടപടി.
പത്മകുമാറിനെതിരായ നടപടി ചര്ച്ച ചെയ്യാന് പത്തനംതിട്ട ജില്ലാ കമ്മിറ്റിയെയാണ് പാര്ട്ടി ചുമതലപ്പെടുത്തിയത്.പത്തനംതിട്ട ജില്ലാ കമ്മിറ്റി രൂപീകരണം മുതലുള്ള അംഗമാണ് എ.പത്മകുമാര്.പാര്ട്ടിയില് നിന്ന് പുറത്താക്കുമെന്നാണ് നേരത്തേ പ്രചരിച്ച വാര്ത്തയെങ്കിലും നടപടി സസ്പന്ഷനില് ഒതുക്കിയത് പത്മകുമാര് പലതും വെളിപ്പെടുത്തുമെന്ന് ഭയന്നാണെന്നാണ് പാര്ട്ടി വൃത്തങ്ങളില് നിന്നുളള അണിയറ വര്ത്തമാനം.
സ്വര്ണക്കൊള്ള കേസില് പത്മകുമാറിനെ സംരക്ഷിച്ച സിപിഎം നടപടിയില് വലിയ വിമര്ശനങ്ങളാണ് ഉയര്ന്നത്.പത്മകുമാര് നേരത്തേ തന്നെ സൂചിപ്പിച്ച സ്വര്ണക്കൊള്ളയിലെ ദൈവതുല്യരുടെ പേര് പുറത്തുവരാതിരിക്കാനാണ് ഇതെന്നാണ് ആക്ഷേപം ഉയര്ന്നത്.
പാര്ട്ടിയില് നിന്ന് പുറത്താക്കിയാല് പല രഹസ്യങ്ങളും പുറത്തുപറയുമെന്ന രീതിയില് പത്മകുമാറുമായി ബന്ധപ്പെട്ട കേന്ദ്രങ്ങള് വെളിപ്പെടുത്തിയിരുന്നു.നിര്ണായക വിവരങ്ങള് ഉള്പ്പെടുത്തി പുസ്തകമെഴുതുമെന്നും വാര്ത്ത ഉണ്ടായിരുന്നു.
നിയമസഭാ തെരഞ്ഞെടുപ്പില് എല് ഡി എഫിന്റെ തോല്വിയില് ശബരിമല പ്രധാന കാരണമാണെന്ന് വ്യക്തമായതോടെയാണ് സസ്പന്ഷനെങ്കിലും പാര്ട്ടി തയാറായത്.
