കൊച്ചി: നെടുമ്പാശ്ശേരി വിമാനത്താവളത്തിന് സമീപം വിമാനം താഴ്ന്നുപറന്നതിനെ തുടർന്നുണ്ടായ ശക്തമായ കാറ്റിൽ വീടിന്റെ മേൽക്കൂര തകർന്നു. ശാന്തിനഗർ സ്വദേശി കാട്ടുപ്പറമ്പിൽ സൈമൺ കെ.ജെ.യുടെ വീടിനാണ് കേടുപാടുകൾ സംഭവിച്ചത്. ഇന്ന് രാവിലെ 8.30-ഓടെയായിരുന്നു സംഭവം. വിമാനം താഴ്ന്നുപറന്നതോടെ മേൽക്കൂരയിലെ ഓടുകൾ കൂട്ടത്തോടെ തകർന്നുപോവുകയായിരുന്നു. അപകടസമയത്ത് സൈമണും ഭാര്യയും വീട്ടിനുള്ളിൽ ഉണ്ടായിരുന്നു. മേൽക്കൂരയിൽ നിന്ന് ഓട് തലയിൽ വീണ് സൈമണിന്റെ തോളിന് പരിക്കേറ്റിട്ടുണ്ട്. സംഭവത്തെക്കുറിച്ച് കുടുംബം സിയാൽ അധികൃതർക്ക് പരാതി നൽകി.
റൺവേയ്‌ക്ക് സമീപമുള്ള പ്രദേശങ്ങളിൽ താമസിക്കുന്നവർ നിരന്തരം ഇത്തരത്തിലുള്ള അപകടഭീതിയിലാണ് കഴിയുന്നത്. മുൻപും പലതവണ സമാനമായ സംഭവങ്ങൾ ഉണ്ടായിട്ടുണ്ടെന്നും വിമാനത്താവള അധികൃതരോട് നിരവധി പരാതികൾ പറഞ്ഞിട്ടും യാതൊരുവിധ ശാശ്വത പരിഹാരവും ഉണ്ടായിട്ടില്ലെന്നും പ്രദേശവാസികൾ ആരോപിക്കുന്നു. തങ്ങളുടെ ജീവനും സ്വത്തിനും സുരക്ഷിതത്വം ഉറപ്പാക്കാൻ അധികൃതർ അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം.
