എല്ലാ ജില്ലകളിലും പരീക്ഷാകേന്ദ്രങ്ങള്
ജൂണ് 15 വൈകിട്ട് 5 വരെ ഓണ്ലൈനായി അപേക്ഷിക്കാം
തിരുവനന്തപുരം, എറണാകുളം, തൃശൂര്, കോഴിക്കോട് സര്ക്കാര് കോളേജുകളിലും സംസ്ഥാനത്തെ സ്വകാര്യ സ്വാശ്രയ ലോ കോളേജുകളിലും 2026-27 വര്ഷത്തെ ഇന്റഗ്രേറ്റഡ് പഞ്ചവത്സര എല്എല്ബി കോഴ്സ് പ്രവേശനത്തിനുള്ള കമ്പ്യൂട്ടര് അധിഷ്ഠിത പ്രവേശന പരീക്ഷ ജൂണ് 28ന് ജില്ലാ കേന്ദ്രങ്ങളില് നടത്തും. ഇതിലേക്ക് ജൂണ് 15 വൈകിട്ട് 5 മണിവരെ ഓണ്ലൈനായി അപേക്ഷിക്കാം. എന്ട്രന്സ് പരീക്ഷാ വിജ്ഞാപനവും പ്രോസ്പെക്ടസും www.cee.kerala.gov.in ല്നിന്നും ഡൗണ്ലോഡ് ചെയ്യാം.
അപേക്ഷാ ഫീസ്- ജനറല്/എസ്ഇബിസി വിഭാഗത്തിന് 950 രൂപ. പട്ടികജാതി/വര്ഗ്ഗ വിഭാഗത്തിന് 450 രൂപ. നെറ്റ് ബാങ്കിങ്/ഡബിറ്റ്/ക്രഡിറ്റ് കാര്ഡ് മുഖേന ഫീസ് അടയ്ക്കാം.
വിദ്യാഭ്യാസ യോഗ്യത: ഹയര് സെക്കന്ററി/പ്ലസ്ടു/തത്തുല്യ ബോര്ഡ് പരീക്ഷ 45 ശതമാനം മാര്ക്കില് കുറയാതെ പാസായിരിക്കണം. (എസ്ഇബിസി വിഭാഗത്തിന് 42%, എസ്സി/എസ്ടികാര്ക്ക് 40% മാര്ക്ക് മതി). ത്രിവത്സര പോളിടെക്നിക് ഡിപ്ലോമകാരെയും പരിഗണിക്കും. 31.12.2026 ല് 17 വയസ് തികയണം. വിജ്ഞാപനത്തിലെ നിര്ദ്ദേശങ്ങള് പാലിച്ചാവണം അപേക്ഷിക്കേണ്ടത്.
പ്രവേശന പരീക്ഷ: സംസ്ഥാന പ്രവേശന പരീക്ഷാ കമ്മീഷണറാണ് കമ്പ്യൂട്ടര് അധിഷ്ഠിത പരീക്ഷ സംഘടിപ്പിക്കുന്നത്. രണ്ട് മണിക്കൂര് ദൈര്ഘ്യമുള്ള പരീക്ഷക്ക് ജനറല് ഇംഗ്ലീഷ്, പൊതുവിജ്ഞാനം, ഗണിതവും മാനസികശേഷിയും നിയമപഠനത്തിനുള്ള അഭിരുചി എന്നിവയിലെ പ്രാവീണ്യമളക്കുന്ന ഒബ്ജക്ടീവ് മാതൃകയിലുള്ള 120 ചോദ്യങ്ങളുണ്ടാവും. ശരി ഉത്തരത്തിന് 3 മാര്ക്ക് ലഭിക്കും. തെറ്റായ ഉത്തരത്തിന് ഓരോ മാര്ക്ക് വീതം കുറയ്ക്കും.
പ്രവേശനപരീക്ഷയില് യോഗ്യത നേടുന്നതിന് ജനറല്/എസ്ഇബിസി വിഭാഗക്കാര് ആകെ 360 മാര്ക്കില് കുറഞ്ഞത് 10 ശതമാനവും പട്ടികജാതി/വര്ഗ വിഭാഗക്കാര് 5 ശതമാനവും മാര്ക്ക് ആവശ്യമാണ്.
സീറ്റ് അലോട്ട്മെന്റ്: പ്രവേശന പരീക്ഷാഫലം പ്രസിദ്ധീകരിച്ചശേഷം തയ്യാറാക്കുന്ന റാങ്ക്ലിസ്റ്റില് ഉള്പ്പെടുന്നവര്ക്ക് കോളേജും കോഴ്സും അടങ്ങിയ ഓപ്ഷനുകള് മുന്ഗണനാക്രമത്തില് ഓപ്ഷന് നല്കുന്നതിന് അവസരം ലഭിക്കും. ഇതിന്റെ അടിസ്ഥാനത്തിലായിരിക്കും ഓണ്ലൈന് സീറ്റ് അലോട്ട്മെന്റ്. പ്രവേശന പരീക്ഷയുടെയും സെലക്ഷന് നടപടികളുടെയും സമഗ്ര വിവരങ്ങള് പ്രോസ്പെക്ടസിലുണ്ട്.
