തിരുവനന്തപുരം: കെഎസ്ആര്‍ടിസി പ്രഖ്യാപിച്ച സൗജന്യ യാത്ര തലസ്ഥാന നഗരത്തിലെ സ്ത്രീകള്‍ക്ക് ലഭിക്കാന്‍ സാധ്യത തീരെ കുറവ്. ഓര്‍ഡിനറി ബസുകളില്‍ മാത്രമാണ് സൗജന്യ യാത്ര അനുവദിച്ചിരിക്കുന്നത്. എന്നാല്‍ നഗരത്തിലോടുന്ന ഭൂരിഭാഗവും സിറ്റി സര്‍വീസുകളും സിറ്റി ഫാസ്റ്റായുമാണ് കെഎസ്ആര്‍ടിസി ഓടിക്കുന്നത്.
സിറ്റി ഫാസ്റ്റുകള്‍ക്ക് സൗജന്യം ലഭിക്കില്ലെന്ന് കെഎസ്ആര്‍ടിസി വ്യക്തമാക്കിയിട്ടുണ്ട്. നഗരത്തിലെ സിറ്റി, പാപ്പനംകോട്, വികാസ്ഭവന്‍,പേരൂര്‍ക്കട ഡിപ്പോകളില്‍ ഓപ്പറേറ്റ് ചെയ്യുന്ന ബസുകളില്‍ ഏകദേശം എണ്‍പത് ശതമാനവും സിറ്റി ഫാസ്റ്റുകളാണ്. കൂടാതെ ഇലക്ട്രിക് ബസുകളില്‍ 90 ശതമാനവും സിറ്റി ഫാസ്റ്റുകളായാണ് ഓടിക്കുന്നത്.
നഗരപ്രാന്തപ്രദേശങ്ങളിലെ ഡിപ്പോകളായ നെയ്യാറ്റിന്‍കര, പാറശ്ശാല, കാട്ടാക്കട, വെള്ളറട, ആറ്റിങ്ങല്‍, കണിയാപുരം, ചിറയിന്‍കീഴ്, നെടുമങ്ങാട്, വിതുര, വെള്ളനാട് ഡിപ്പോകളിലെയും സ്ഥിതി വ്യത്യസ്ഥമല്ല. ടിക്കറ്റ് ചാര്‍ജ്ജ് കൂട്ടാതെ തന്നെ കുടുതല്‍ നിരക്ക് വാങ്ങാന്‍ കെഎസ്ആര്‍ടിസി കണ്ടു പിടിച്ച മാര്‍ഗ്ഗമാണ് സിറ്റി ഫാസ്റ്റ് ബസുകള്‍. മുന്‍പൊക്കെ നഗര പ്രാന്ത പ്രദേശങ്ങളിലേക്ക് പോകുന്ന സിറ്റി ബസുകളായിരുന്നു സിറ്റി ഫാസ്റ്റ് സര്‍വീസുകള്‍. എന്നാല്‍ ഇപ്പോള്‍ കിഴക്കേകോട്ടയില്‍ നിന്നും അഞ്ച് കിലോമീറ്റര്‍ അകലേക്ക് പോലും സിറ്റി ഫാസ്റ്റുകളാണ് ഓടിക്കുന്നത്.
തിരുവനന്തപുരം ജില്ലയില്‍ ആകെ 687 ബസുകളാണ് ഓര്‍ഡിനറി വിഭാഗത്തിലുള്ളതെന്നാണ് കെഎസ്ആര്‍ടിസിയുടെ കണക്ക്. എന്നാല്‍ ഓര്‍ഡിനറി ബസുകളില്‍ ലിമിറ്റഡ് സ്റ്റോപ്പ്, ടൗണ്‍ ടു ടൗണ്‍, സിറ്റി ഫാസ്റ്റ് തുടങ്ങിയ പേരുകളിലാണ് ഭൂരിഭാഗവും ഓടുന്നത്. ഈ ബസുകളിലൊന്നും തന്നെ സൗജന്യ യാത്ര ലഭിക്കില്ല. കൂടാതെ പീക്ക് ടൈമുകളില്‍ ഒര്‍ഡിനറി ബസുകള്‍ വളരെക്കുറച്ച് മാത്രമേ സര്‍വീസ് നടത്തുന്നുള്ളൂ.
