ന്യൂയോര്ക്ക് സിറ്റി: ഇത്തവണ ആരാധകരെയും കളിക്കാരെയും ഏറ്റവും കൂടുതല് ബാധിക്കുന്ന കാര്യം സ്റ്റേഡിയങ്ങള് തമ്മിലുള്ള അകലമാണ്. മഴപെയ്യുന്നു മദ്ദളം കൊട്ടുന്നു എന്ന സിനിമയില് പറയുന്നതുപോലെ കിലോമീറ്റേഴ്സ് ആന്ഡ് കിലോമീറ്റേഴ്സ് ആണ് അകലം.
ബ്രസീലില് ലോകകപ്പ് നടന്ന 2014ല് ആരാധകര് ഗ്രൂപ്പ് ഘട്ടത്തില് പല വേദികളിലെയും മത്സരങ്ങള് കാണാന് 4000 കിലോമീറ്ററിലധികം സഞ്ചിരിച്ചിരുന്നു. റഷ്യയിലും ഇതേ അവസ്ഥയുണ്ടായിരുന്നു. എന്നാല്, ഖത്തറിലെത്തിയപ്പോള് ആരാധകര് ഹാപ്പി. കാരണം, സ്റ്റേഡിയങ്ങള്ക്കിടയിലെ കൂടിയ ദൂരം 40 കിലോമീറ്ററായിരുന്നു.
അമേരിക്കയിലും മെക്സിക്കോയിലും കാനഡയിലുമായി ലോകകപ്പെത്തിയപ്പോള് കളിക്കാഴ്ച കൂടുതല് ദുഷ്കരമായി. ലോകകപ്പ് നടക്കുന്ന 16 നഗരങ്ങള് തമ്മിലുള്ള അകലം പരിശോധിച്ചാല് ഇതു മനസ്സിലാകും. ഇതില് ഏറ്റവും കൂടുതല് ആകാശ ദൂരം അമേരിക്കയിലെ മയാമിയില്നിന്ന് കാനഡയിലെ വാന്കൂവറിലേക്കുള്ളതാണ്, 2801 മൈല് അഥവാ 4500 കിലോമീറ്റര്!. പ്രാഥമിക ഘട്ടത്തില് ജൂണ് 15ന് സൗദി അറേബ്യയും ഉറുഗ്വെയും തമ്മിലുള്ള മത്സരം നടക്കുന്നത് മയാമിയിലാണ്. ജൂണ് 18ന് ഖത്തര്-കാനഡ പോരാട്ടം വാന്കൂവറിലും. ഈ രണ്ട് മത്സരത്തിനും ടിക്കറ്റെടുത്ത ഒരു ആരാധകന് മൂന്നു ദിവസത്തിനിടെ രണ്ട് പടുകൂറ്റന് രാജ്യങ്ങള്ക്കിടെ 4500 കിലോമീറ്റര് വിമാന യാത്ര ചെയ്യണം. അമേരിക്കയില്ത്തന്നെ നടക്കുന്ന മത്സരങ്ങളുടെ വേദികള് തമ്മിലും വലിയ ദൂര വ്യത്യാസമുണ്ട്. മയാമിയും സീറ്റിലും തമ്മില് 4383 കിലോ മീറ്റര് ദൂരമുണ്ട്. അതുപോലെ കാനഡയിലെ രണ്ടു വേദികളായ വാന്കൂവറും ടൊറന്റോയും തമ്മിലുള്ള ദൂരവ്യത്യാസം 3355 കിലോമീറ്ററാണ്.
പ്രധാന നഗരങ്ങള് തമ്മിലുള്ള ദൂരവ്യത്യാസം
മയാമി- വാന്കൂവര് : 4500 കിലോമീറ്റര്
മയാമി – സീറ്റില്: 4383
വാന്കൂവര്- ടൊറന്റോ: 3355
ബോസ്റ്റണ്- സാന്ഫ്രാന്സിസ്കോ: 4350
ന്യൂജഴ്സി- ലോസ് ആഞ്ചലസ് : 3940
ബോസ്റ്റണ് – സീറ്റില്: 4016
മയാമി- ബോസ്റ്റണ്: 2025
മയാമി – ന്യൂ ജഴ്സി: 1747
മയാമി- മെക്സിക്കോ സിറ്റി: 2053
ഡാളസ്- അറ്റ്ലാന്റ: 1174
സാന്റ ക്ലാര – ബോസ്റ്റണ്: 2355 കിലോമീറ്റര്
