ലഖ്നൗ: ബംഗാളില്‍ മമതയ്‌ക്കെതിരെ നടന്നതുപോലെ അഖിലേഷ് യാദവിനെതിരെ ഒരു കലാപത്തിന് സമാജ് വാദി പാര്‍ട്ടിയിലെ എംഎല്‍എമാരും എംപിമാരും ഒരുങ്ങുന്നതായി റിപ്പോര്‍ട്ട്. ഇവര്‍ ബഹുജന്‍ സമാജ് പാര്‍ട്ടി നേതാവ് മായാവതിയുമായി രഹസ്യമായി കൂടിക്കാഴ്ച നടത്തിയെന്നാണ് റിപ്പോര്‍ട്ട്. സമാജ്‌വാദി പാർട്ടി (എസ്പി) ഇതുവരെ നേരിട്ടതിൽ വച്ച് ഏറ്റവും വലിയ തിരിച്ചടി നേരിടാൻ സാധ്യതയുണ്ടെന്ന് ന്യൂസ് 24 എന്ന ഹിന്ദി വാര്‍ത്താചാനല്‍ ആണ് റിപ്പോര്‍ട്ട് ചെയ്തത്.
മുന്‍ മുഖ്യമന്ത്രിയും പിന്നാക്ക സമുദായ നേതാവുമായ മായാവതി പ്രധാനമന്ത്രി മോദിയുമായും എന്‍ഡിഎയുമായും നല്ല ബന്ധം പുലര്‍ത്തുന്ന നേതാവാണ്. സമാജ് വാദി പാര്‍ട്ടി പ്രസിഡന്‍റ് അഖിലേഷ് യാദവിന്റെ പ്രവര്‍ത്തനശൈലിക്ക് എതിരെയാണ് ഈ കലാപമെന്നാണ് വാര്‍ത്തകള്‍.
നിരവധി വർഷങ്ങളായി ഉത്തർപ്രദേശ് രാഷ്‌ട്രീയത്തിൽ നിന്ന് അകന്നു നിൽക്കുന്ന ബഹുജൻ സമാജ് പാർട്ടിയുടെ തലവനായ മായാവതിയുമായി സമാജ് വാദി പാര്‍ട്ടിയുടെ 55 എംഎൽഎമാരും 25 എംപിമാരും രഹസ്യമായി ചര്‍ച്ചകള്‍ നടത്തുന്നുവെന്നാണ് ചില സമൂഹമാധ്യമപേജുകള്‍ അവകാശപ്പെടുന്നത്. നിരവധി സമൂഹമാധ്യമചാനലുകളും ഇത്തരം വാര്‍ത്തകള്‍ പുറത്തുവിടുന്നുണ്ടെങ്കിലും ഇതേക്കുറിച്ച് മായാവതിയോ സമാജ് വാദി പാര്‍ട്ടിയിലെ വിമത എംപിമാരോ എംഎല്‍എമാരോ പ്രതികരിച്ചിട്ടില്ല.
എസ്പി മേധാവി അഖിലേഷ് യാദവ് ഈയിടെ ലണ്ടനിലേക്ക് നടത്തിയ വിദേശയാത്രയെച്ചൊല്ലിയും വലിയ വിമര്‍ശനങ്ങള്‍ ഉയരുന്നുണ്ട്. ഈ യാത്രയില്‍ പ്രത്യേകം ശ്രദ്ധേയമായ ഒരു കാര്യം വർഷങ്ങളായി വെളുത്ത കുർത്ത-പൈജാമയും പാര്‍ട്ടിയുടെ പ്രതീകമായ ചുവന്ന തൊപ്പിയും മാത്രം ധരിച്ചു പുറത്തിറങ്ങാറുള്ള അഖിലേഷ് യാദവ് കറുത്ത ജീൻസും, വെളുത്ത ടി-ഷർട്ടും, കറുത്ത ഷൂസും ധരിച്ച് യാത്ര ചെയ്തു എന്നുള്ളതാണ്. ഈ വേഷത്തിലെ മാറ്റം സോഷ്യൽ മീഡിയയിൽ ചർച്ചയായിരിക്കുകയാണ്. ഈ വേഷത്തില്‍ അഖിലേഷ് യാദവ് ആളുകളുമായി ഇടപഴകുന്നതും, ഒരു സ്വകാര്യ പൗരന്റെ അനായാസതയോടെ ഫോട്ടോകൾക്ക് പോസ് ചെയ്യുന്നതും കാണാം.സമാജ് വാദി പാർട്ടിയുടെ ദേശീയ പ്രസിഡന്‍റായ ശേഷം ഇതാദ്യമായാണ് അദ്ദേഹം തന്റെ പരമ്പരാഗത വസ്ത്രധാരണമില്ലാതെ പൊതുസ്ഥലത്ത് ഇറങ്ങുന്നത് എന്ന് രാഷ്‌ട്രീയ വിശകലന വിദഗ്ധർ അഭിപ്രായപ്പെട്ടു. ഇതിന് പിന്നില്‍ പാര്‍ട്ടിയില്‍ നിന്നുള്ള തിരിച്ചടിയാണെന്ന് പറയപ്പെടുന്നു. ഒരുപക്ഷേ അഖിലേഷ് ഇത് മനസ്സിലാക്കിയിരിക്കാം, അതിനാലാണ് അദ്ദേഹം തന്റെ ചുവന്ന തൊപ്പി വലിച്ചെറിഞ്ഞ് ജീൻസും ടീ-ഷർട്ടും ധരിച്ച് ലണ്ടനിലേക്ക് പോയതെന്നാണ് വിമര്‍ശനം.
തൊപ്പി ചുവന്നതാണെങ്കിലും പ്രവര്‍ത്തികള്‍ കറുപ്പാണെന്ന യോഗി ആദിത്യനാഥിന്റെ വിമര്‍ശനവും ഈ വേളയില്‍ സമൂഹമാധ്യമങ്ങളില്‍ പങ്കുവെയ്‌ക്കപ്പെടുന്നുണ്ട്. രാഷ്‌ട്രീയ അടിത്തറ നഷ്ടപ്പെട്ട അഖിലേഷ് യാദവിന് ഇപ്പോൾ സ്വന്തം എംപിമാരുടെയും എംഎൽഎമാരുടെയും ഇടയിൽ വിശ്വാസം നഷ്ടപ്പെട്ടതായും ചിലര്‍ ചൂണ്ടിക്കാട്ടുന്നു. യോഗി ജനങ്ങളുടെ പ്രശ്നങ്ങള്‍ അഭിസംബോധന ചെയ്യുമ്പോള്‍ അഖിലേഷ് വിദേശത്ത് സുഖിക്കുന്നു എന്ന രീതിയിലും സമൂഹമാധ്യമങ്ങളില്‍ വിമര്‍ശനങ്ങള്‍ ഉയരുന്നുണ്ട്.
മുഖ്യമന്ത്രി യോഗി ആദിത്യനാഥിന്റെ നേതൃത്വത്തിൽ കഴിഞ്ഞ 10 വർഷമായി ഉത്തർപ്രദേശിൽ വീശുന്ന വികസന തരംഗം പ്രതിപക്ഷത്തെ വളരെയധികം നിരാശരാക്കി, അവരുടെ സ്വന്തം തിരഞ്ഞെടുക്കപ്പെട്ട എംഎൽഎമാർക്കും എംപിമാർക്കും പൊതുജനങ്ങളുടെ ചോദ്യങ്ങൾക്ക് ഉത്തരം നൽകാൻ കഴിയുന്നില്ല. അവരുടെ രാഷ്‌ട്രീയ ഭാഗ്യം രക്ഷിക്കാൻ, അവർ മായാവതിയുടെ പക്ഷം ചേരാൻ ആഗ്രഹിക്കുന്നുവെന്നാണ് റിപ്പോര്‍ട്ട്.
രസകരമെന്നു പറയട്ടെ, 2027 ലെ തിരഞ്ഞെടുപ്പിൽ എസ്പിയോടൊപ്പം നിലയുറപ്പിക്കാൻ ശ്രമിക്കുന്ന രാഹുൽ ഗാന്ധി വീണ്ടും ഒരു ദുരന്തമായി മാറുകയാണ്. 2027ലെ യുപി നിയമസഭാ തിരഞ്ഞെടുപ്പിൽ എസ്പി-കോൺഗ്രസ് സഖ്യം തകരുമെന്ന് എല്ലാവർക്കും ഉറപ്പുണ്ട്. പക്ഷെ തിരഞ്ഞെടുപ്പിന് മുമ്പേ സമാജ് വാദി പാര്‍ട്ടി ഇങ്ങിനെ ആടിയുലയുമെനന് പ്രതീക്ഷിച്ചില്ലെന്നും ചിലര്‍ ചൂണ്ടിക്കാട്ടുന്നു.
