ഇന്റര്‍നെറ്റ് ട്രാഫിക്: മനുഷ്യരെ മറികടന്ന് ‘ബോട്ടു’കള്‍

തിരുവല്ല: സാങ്കേതിക വിദഗ്ധര്‍ കരുതിയിരുന്നതിനേക്കാള്‍ വളരെമുന്നേ ഇന്റര്‍നെറ്റ് വിനിമയത്തില്‍ ബോട്ടുകള്‍ മനുഷ്യരെ മറികടന്നു. പ്രമുഖ ഇന്റര്‍നെറ്റ് ഇന്‍ഫ്രാസ്ട്രക്ചര്‍, സൈബര്‍ സുരക്ഷാ കമ്പനിയായ ക്ലൗഡഫ്ലെയര്‍ ആണ് ഇക്കാര്യം വ്യക്തമാക്കിയത്. (മനുഷ്യ സഹായമില്ലാതെ, മുന്‍കൂട്ടി നിശ്ചയിച്ച പ്രോഗ്രാമുകളോ അല്‍ഗോരിതങ്ങളോ ഉപയോഗിച്ച് സ്വയംപ്രവര്‍ത്തിക്കുന്ന സോഫ്റ്റ്‌വെയര്‍ ആപ്ലിക്കേഷനുകളാണ് ഇന്റര്‍നെറ്റ് ബോട്ടുകള്‍-ആീെേ). 2027ലേ ബോട്ടുകള്‍ മനുഷ്യര്‍ സൃഷ്ടിക്കുന്ന ഇന്റര്‍നെറ്റ് ട്രാഫിക്കിനെ മറികടക്കൂ എന്നായിരുന്നു നിഗമനം. എന്നാല്‍ ഈ മാറ്റം പ്രതീക്ഷിച്ചതിലും ഒരു വര്‍ഷം മുമ്പേ സംഭവിച്ചെന്ന് ക്ലൗഡഫ്ലെയര്‍ ചീഫ് എക്‌സിക്യൂട്ടീവ് മാത്യു പ്രിന്‍സ് പറയുന്നു. എക്‌സിലെ ഒരു പോസ്റ്റില്‍, ‘ഏജന്‍സി ട്രാഫിക്’ വളരെ വേഗത്തില്‍ വളരുകയാണെന്നും ഇപ്പോള്‍ ഓണ്‍ലൈന്‍ പ്രവര്‍ത്തനങ്ങളില്‍ ഭൂരിഭാഗവും ഓട്ടോമേറ്റഡ് സിസ്റ്റങ്ങളാണ് നിര്‍വഹിക്കുന്നതെന്നും പ്രിന്‍സ് വ്യക്തമാക്കുന്നു.

ക്ലൗഡ്ഫ്‌ലെയറിന്റെ ഏറ്റവും പുതിയ ഡാറ്റ അനുസരിച്ച് ഇന്റര്‍നെറ്റിലെ എച്ച്ടിടിപി വിനിമയങ്ങളുടെ 57.5 ശതമാനവും ഇപ്പോള്‍ ബോട്ടുകള്‍ ആണ് സൃഷ്ടിക്കുന്നത്. ബാക്കി 42.5 ശതമാനം മാത്രമാണ് മനുഷ്യ നിര്‍മ്മിതം. ഡാറ്റ അതിസങ്കീര്‍ണമായതിനാല്‍ ബോട്ടുകള്‍ മനുഷ്യരെ മറികടന്നത് എപ്പോഴാണെന്ന് കൃത്യമായി തിരിച്ചറിയാന്‍ പ്രയാസമാണെന്നും പ്രിന്‍സ് പറയുന്നു.

ആവര്‍ത്തനം ആവശ്യമുള്ള ജോലികള്‍ മനുഷ്യരേക്കാള്‍ വളരെ വേഗത്തില്‍ ചെയ്യാന്‍ ബോട്ടുകള്‍ക്ക് കഴിയും. നല്ലതും ചീത്തയുമായ ബോട്ടുകള്‍ ഇപ്പോള്‍ സുലഭമാണ്.

ഗൂഗിള്‍ (Googlebot), ബിംഗ് (Bingbot) തുടങ്ങിയ സെര്‍ച്ച് എഞ്ചിന്‍ ബോട്ടുകള്‍ വെബ്‌സൈറ്റുകള്‍ നിരന്തരം സ്‌കാന്‍ ചെയ്ത് വിവരങ്ങള്‍ ശേഖരിക്കുകയും നമ്മള്‍ തിരയുമ്പോള്‍ കൃത്യഫലങ്ങള്‍ നല്‍കുകയും ചെയ്യുന്നു. കസ്റ്റമര്‍ കെയര്‍ ചാറ്റ് ബോട്ടുകള്‍ ബാങ്ക്, ഷോപ്പിങ് വെബ്സൈറ്റുകളില്‍ ഉപഭോക്താക്കളുടെ സംശയങ്ങള്‍ക്ക് തല്‍ക്ഷണം മറുപടി നല്‍കുന്നു. വെബ്‌സൈറ്റുകള്‍ ശരിയായി പ്രവര്‍ത്തിക്കുന്നുണ്ടോ എന്ന് നിരീക്ഷിക്കുന്നവയാണ് മോണിറ്ററിംഗ് ബോട്ടുകള്‍. ഇവയെല്ലാം നമുക്ക് ഉപകാരപ്രദമെങ്കില്‍ മലീഷ്യസ് (ദോഷകരമായ) ബോട്ടുകളും ഏറെയുണ്ട്.

വെബ്‌സൈറ്റുകളിലും സോഷ്യല്‍ മീഡിയകളിലും അനാവശ്യ പരസ്യങ്ങളും ലിങ്കുകളും പോസ്റ്റ് ചെയ്യുന്ന സ്പാം ബോട്സ്, ഉപയോക്താക്കളുടെ പാസ് വേര്‍ഡുകള്‍ കണ്ടെത്തി അക്കൗണ്ട് തട്ടിയെടുക്കാന്‍ ശ്രമിക്കുന്ന ഹാക്കിങ് ബോട്സ്, വെബ്സൈറ്റിലെ വിവരങ്ങള്‍ അനുവാദമില്ലാതെ പകര്‍ത്തുന്ന ഡാറ്റാ സ്‌ക്രാപ്പര്‍ ബോട്ടുകള്‍ എന്നിവ ഈ വിഭാഗത്തില്‍ പെടുന്നു.