ഏഴു വര്‍ഷമാണ് കുജദശാകാലം. മകരം, മേടം, വൃശ്ചികം രാശികളില്‍ നില്‍ക്കുന്ന ചൊവ്വയുടെ ദശാകാലം പൊതുവേ ശുഭകരവും ഗുണപ്രദവുമാകും. സ്വപ്രയത്നത്താല്‍ ഉന്നതിയിലേക്കുള്ള പാത തുറക്കാന്‍ കുജദശ സഹായകമാകും. ഉദ്യോഗമുള്ളവര്‍ക്ക് ദശാകാലത്ത് ഔദ്യോഗിക പദവിയില്‍ ഉയര്‍ച്ചയും ധനലാഭവും ഉണ്ടാകും.
ഉപദേഷ്ടാവ്, സൈനികവൃത്തി, കാര്‍ഷികവൃത്തി, റിയല്‍എസ്റ്റേറ്റ്, കോടതി വ്യവഹാരങ്ങള്‍ എന്നിവയിലൂടെയും കുജദശയില്‍ ധനലാഭം പ്രതീക്ഷിക്കാം. ഇടവസ്ഥിത ചൊവ്വയുടെ ദശാകാലത്ത് ഭാര്യാസംബന്ധമായ ക്ലേശങ്ങള്‍ക്കും അപവാദത്തിനും സാധ്യതയുണ്ട്. മിഥുന ചൊവ്വയെങ്കില്‍ കലാമേഖലയില്‍ നിന്നു വരുമാനവും അന്യദേശവാസവും പ്രതീക്ഷിക്കാം. ചിങ്ങത്തിലാണ് ചൊവ്വയെങ്കില്‍ ഭാര്യക്കും മക്കള്‍ക്കും അത്ര നന്നായിരിക്കില്ലെങ്കിലും തനിക്ക് അഭിവൃദ്ധികരമായ മാര്‍ഗങ്ങള്‍ തെളിഞ്ഞുകിട്ടും.
കന്നിയിലെ ചൊവ്വയും ധനലാഭമേകുമെങ്കിലും നയനരോഗങ്ങള്‍ക്ക് ഇടവരുത്തും. തുലാസ്ഥിത ചൊവ്വയുടെ ദശാകാലം പൊതുവേ ദോഷപ്രദമായാണ് കണ്ടുവരുന്നത്. എന്നാല്‍ ധനുസ്ഥിത ചൊവ്വയുടെ ദശാകാലം ശോഭനമാകും. കുംഭം, മീനം രാശികളിലെ ചൊവ്വയുടെ ദശാകാലം അത്ര നന്നായിരിക്കുകയില്ല. ഭാവസ്ഥിത ഫലങ്ങള്‍ പരിഗണിക്കുകയാണെങ്കില്‍ മൂന്ന്, പതിനൊന്ന് ഭാവങ്ങളിലെ ചൊവ്വയുടെ ദശാകാലത്തേ മികച്ച അനുഭവങ്ങള്‍ ലഭിക്കൂ. ലഗ്‌നം, നാല്, ഏഴ്, എട്ട്, പന്ത്രണ്ട് രാശികളില്‍ നില്‍ക്കുന്ന ചൊവ്വയുടെ ദശാകാലം പലവിധത്തിലും കഷ്ടതകള്‍ നിറഞ്ഞതായിരിക്കും.
ജന്മഭൂമി ഓണ്‍ലൈന്‍