കോഴിക്കോട് : മെഡിക്കല് കോളേജ് ആശുപത്രിയില് പ്രസവത്തില് പുറത്തെടുക്കവേ നവജാതശിശുവിന്റെ കയ്യൊടിഞ്ഞെന്ന പരാതിയില് ചികിത്സാ പിഴവില്ലെന്ന് ആശുപത്രി സൂപ്രണ്ട്. മെഡിക്കല് കോളേജ് പ്രിന്സിപ്പലിന് റിപ്പോര്ട്ട് കൈമാറി. ‘ഷോള്ഡര് ഡിസ്റ്റോസിയ’ എന്ന അവസ്ഥയാണ് കാരണം. കുഞ്ഞിന് ഭാരക്കൂടുതല് ഉണ്ടായിരുന്നു എന്നും ആശുപത്രി അധികൃതര് പറഞ്ഞു.
കോഴിക്കോട് കക്കോടി ഒറ്റത്തെങ്ങ് സ്വദേശിനി അമലയുടെ പ്രസവം കോഴിക്കോട് മെഡിക്കല് കോളേജ് ആശുപത്രിയില് നടന്നത് മേയ് 14-നാണ്. പിറ്റേദിവസം കുഞ്ഞിനെ കയ്യില് കിട്ടുമ്പോള് കുഞ്ഞിന്റെ വലതുകൈയില് പ്ലാസ്റ്റര് ഇട്ടിരുന്നു. അപ്പോഴാണ് കുഞ്ഞിന്റെ കൈയുടെ എല്ല് പൊട്ടിയത് മനസിലായതെന്നും അമല പറഞ്ഞു.പ്രസവിച്ച ഉടന് പീഡിയാട്രിക് ഡോക്ടറുടെയടുത്തേക്കാണ് അവര് കുട്ടിയെ കൊണ്ടുപോയത്.കുട്ടിയുടെ മുഖം തന്നെ കാണുന്നത് അടുത്ത ദിവസമാണ് . കൈയില് പ്ലാസ്റ്ററിട്ടിരുന്നത് അപ്പോഴാണ് കണ്ടതെന്ന് അമല പറഞ്ഞിരുന്നു.
പ്രസവത്തില് കുഞ്ഞിനെ പുറത്തേക്ക് എടുക്കുന്ന സമയത്തുണ്ടായ പിഴവാണ് കൈയിലെ എല്ല് പൊട്ടാനിടയാക്കിയതെന്നാണ് മാതാപിതാക്കളുടെ ആരോപണം. സംഭവത്തിനുശേഷം ആശുപത്രി അധികൃതര് ഇക്കാര്യം മാതാപിതാക്കളെ അറിയിക്കാതെ കുഞ്ഞിനെ എന്ഐസിയുവിലേക്ക് മാറ്റി പ്ലാസ്റ്ററിട്ടെന്നായിരുന്നു കുടുംബത്തിന്റെ പരാതി.
