കൊട്ടിയൂര് മഹാദേവക്ഷേത്രത്തിന്റെ ഐതിഹ്യത്തോടും ഭരണത്തോടും ചേര്ന്നുനില്ക്കുന്ന ഏറ്റവും പ്രധാനപ്പെട്ട അടിയന്തരക്കാരാണ് ഊരാളന്മാര്. മണത്തണ സ്വദേശികളായ കുളങ്ങരയത്ത്, ആക്കല്, കരിമ്പനയ്ക്കല് ചാത്തോത്ത്, തിട്ടയില് എന്നീ നാല് പ്രമുഖ നായര് തറവാടുകളിലെ ഏറ്റവും മുതിര്ന്ന കാരണവന്മാരാണ് ഊരാളന്മാരായി സ്ഥാനമേല്ക്കുന്നത്. കൊട്ടിയൂരിന്റെ ഉടമസ്ഥരാണിവര്.
ഒറ്റപ്പിലാന് മലയിലെ കുറിച്യ യുവാവ് കാട്ടിനുള്ളില് അത്ഭുത ശില കണ്ടെത്തിയപ്പോള്, ആ വിവരം ആദ്യം അറിയിച്ചത് പടിഞ്ഞിറ്റ നമ്പൂതിരിയെയും മണത്തണയിലെ ഈ നാല് നായര് പ്രമാണിമാരെയുമായിരുന്നു. കാട്ടില് തെളിഞ്ഞത് മഹാദേവന്റെ സ്വയംഭൂ ശിലയാണെന്നും, അത് ദക്ഷയാഗം നടന്ന പുണ്യഭൂമിയാണെന്നും ദൈവജ്ഞര് പ്രവചിച്ചതിനെത്തുടര്ന്ന്, വൈശാഖ മഹോത്സവത്തിന് തുടക്കം കുറിക്കാന് നേതൃത്വം നല്കിയത് മണത്തണയിലെ ഈ നാല് തറവാട്ടുകാരാണ്. ഇന്നും ഉത്സവത്തിന്റെ പൂര്ണ്ണമായ നേതൃത്വം ഊരാളന്മാര്ക്കാണ്.
അക്കരെ സന്നിധാനത്ത് ഈ നാല് ഊരാള തറവാട്ടുകാര്ക്കും പ്രത്യേകം ‘കയ്യാലകള്’ (താത്കാലിക താമസസ്ഥലം) ഉണ്ട്. കയ്യാലകളില് ‘സ്ഥാനപ്പുറം’ എന്ന് അറിയപ്പെടുന്ന കട്ടിലും അതിനടുത്തായി ഒരു കെടാവിളക്കും ഉണ്ടായിരിക്കും. ആചാരപരമായ കാര്യങ്ങള് അറിയിക്കാനും ക്ഷണിക്കാനും ‘തേടന് സ്ഥാനീകന്’ കുത്തുവിളക്കുമായി കയ്യാലയില് എത്തുമ്പോള് ഊരാളന് ഈ ‘സ്ഥാനപ്പുറത്ത്’ ഉണ്ടായിരിക്കണം എന്നത് നിര്ബന്ധമാണ്. ഓലക്കുടയാണ് സ്ഥാനചിഹ്നം പെരുമാളിന്റെ പ്രതിനിധികളായി കണക്കാക്കപ്പെടുന്ന ഊരാളന്മാര്ക്ക് വൈശാഖമഹോത്സവത്തില് കഠിനമായ വ്രതനിയമങ്ങളുണ്ട്. ഉത്സവാരംഭത്തില് ഭണ്ഡാരം എഴുന്നള്ളത്തോടൊപ്പം അക്കരെ സന്നിധിയില് പ്രവേശിക്കുന്ന ഊരാളന്മാര്, പെരുമാളിന്റെ ഉത്സവം കഴിയുന്നതുവരെ യാതൊരു കാരണവശാലും ബാവലിപ്പുഴ കടന്ന് പുറത്തുപോകാന് പാടില്ല. ഉത്സവകാലത്ത് സന്നിധാനത്ത് വെച്ച് മരണം സംഭവിക്കുകയാണെങ്കില് പോലും ബാവലിക്ക് പുറത്തു കടത്താതെ, അതിനായി നിശ്ചയിച്ച പ്രത്യേക സ്ഥലത്ത് സംസ്കാരകര്മ്മങ്ങള് ചെയ്യണമെന്നാണ് പൂര്വ്വനിയമം. കൊട്ടിയൂര് രാജഭരണത്തിന് കീഴിലായിരുന്ന സമയത്തും ക്ഷേത്ര ഭരണത്തില് ഊരാളന്മാരായിരുന്നു അവസാനവാക്ക്.
പിന്നീട് രാജഭരണം ദുര്ബലമായതോടെ ഉടമസ്ഥാവകാശം ഈ നാല് ഊരാളന്മാരില് മാത്രമായി ഒതുങ്ങി. 1937-ല് ബ്രിട്ടീഷ് സര്ക്കാര് മദ്രാസ് ദേവസ്വം ബോര്ഡ് രൂപീ
കരിച്ചതോടെ കൊട്ടിയൂര് ക്ഷേത്രത്തിലും സര്ക്കാര് ഇടപെടലുകള് ആരംഭിച്ചു. കേരള രൂപീകരണത്തിന് ശേഷം 1956-ല് കേരളത്തില് ഹിന്ദുധര്മ്മ സ്ഥാപനവകുപ്പ്
നിലവില് വന്നതോടെ ക്ഷേത്രം പൂര്ണ്ണമായും ദേവസ്വം വകുപ്പിന് കീഴിലായി. പണ്ട് നാല് ഊരാളന്മാര് മാത്രം ഭരിച്ചിരുന്ന സ്ഥാനത്ത്, ഇന്ന് മലബാര് ദേവസ്വം ബോര്ഡിന് കീഴിലുള്ള 9 അംഗ ട്രസ്റ്റിബോര്ഡാണ് ഭരണം നിര്വഹിക്കുന്നത്. ഇതില് സര്ക്കാര് പ്രതിനിധിയായ തഹസില്ദാര്, ക്ഷേത്ര തന്ത്രിമാരില് ഒരാള്, ഭക്തജനസംഘടനയിലെ രണ്ടുപേര്, കോട്ടയം രാജാവ് എന്നിവരുള്പ്പെടുന്നു. കാലക്രമത്തില് ഭരണസംവിധാനം
മാറിയെങ്കിലും, ഇന്നും കൊട്ടിയൂര് ദേവസ്വം ചെയര്മാന് സ്ഥാനത്തേക്ക് മത്സരിക്കാനുള്ള സവിശേഷമായ അവകാശം ഈ നാല് പാരമ്പര്യ ഊരാളന്മാര്ക്ക് മാത്രമായി നിലനിര്ത്തിയിരിക്കുന്നു.
