കൊല്ലം: സംസ്ഥാന പോലീസ് വകുപ്പിലെ ഉദ്യോഗസ്ഥരുടെ സ്ഥലം മാറ്റവുമായി ബന്ധപ്പെട്ട നടപടികള് സര്ക്കാര് തലത്തില് നീണ്ടുപോകുന്നതായി റിപ്പോര്ട്ടുകള്. വിവിധ രാഷ്ട്രീയ നേതാക്കളും അധികാര കേന്ദ്രങ്ങളും തങ്ങള്ക്ക് അനുകൂലരായ ഉദ്യോഗസ്ഥരെ പ്രധാന സ്ഥാനങ്ങളില് നിയമിക്കണമെന്ന് ആവശ്യപ്പെടുന്നതാണ് സ്ഥലംമാറ്റ നടപടികള് വൈകാന് കാരണമെന്നാണ് ഉയരുന്ന ആരോപണം.
സര്ക്കാരിനുള്ളില് തന്നെ ഏകോപനക്കുറവ് നിലനില്ക്കുന്നതായും, പോലീസ് വകുപ്പിലെ പ്രധാന നിയമനങ്ങളിലും സ്ഥലമാറ്റങ്ങളിലും അന്തിമ തീരുമാനം കൈക്കൊള്ളുന്നതില് കാലതാമസം നേരിടുന്നതായും ആക്ഷേപമുണ്ട്. വിവിധ നേതാക്കളുടെ ശിപാര്ശകളും താല്പര്യങ്ങളും തമ്മിലുള്ള അഭിപ്രായവ്യത്യാസങ്ങള് കാരണം നിരവധി ഉദ്യോഗസ്ഥരുടെ സ്ഥാനക്കയറ്റവും സ്ഥലമാറ്റവും അനിശ്ചിതത്വത്തിലായിരിക്കുകയാണെന്നാണ് സൂചന. ഇതിനിടെ, നിയമ-സമാധാന ചുമതലകള് കാര്യക്ഷമമായി നിര്വഹിച്ചിരുന്ന ചില ഉദ്യോഗസ്ഥര് സ്പെഷല് യൂണിറ്റുകളിലേക്ക് മാറാന് താല്പര്യം പ്രകടിപ്പിക്കുന്നതായും റിപ്പോര്ട്ടുകളുണ്ട്. നിലവിലെ സാഹചര്യത്തില് ഫീല്ഡ് പോസ്റ്റിംഗുകളില് തുടരുന്നതിനെക്കാള് പ്രത്യേക യൂണിറ്റുകളിലെ നിയമനങ്ങള് കൂടുതല് സുരക്ഷിതമാണെന്ന വിലയിരുത്തലാണ് ഇതിന് പിന്നിലെന്നാണ് വ്യക്തമാകുന്നത്. പോലീസ് വകുപ്പിലെ ഭരണപരമായ തീരുമാനങ്ങള് വേഗത്തിലാക്കുകയും ഉദ്യോഗസ്ഥരുടെ നിയമനങ്ങളില് വ്യക്തത ഉറപ്പാക്കുകയും വേണമെന്ന ആവശ്യം ശക്തമാകുമ്പോഴാണ് ഈ വിവാദങ്ങള് ഉയരുന്നത്.
