പത്തനംതിട്ട: സീറ്റ് ബുക്ക് ചെയ്ത യാത്രക്കാര് കാത്തുനില്ക്കെ, ബസ് സ്റ്റാന്ഡില് കയറാതെ പോയ സംഭവത്തില് കെഎസ്ആര്ടിസിക്ക് 35,146 രൂപ പിഴ ചുമത്തി പത്തനംതിട്ട ഉപഭോക്തൃ തര്ക്കപരിഹാര കമ്മീഷന് .
പരാതിക്കാരിയായ തിരുവല്ല സ്വദേശിനി ശ്രുതി സൂസന് ഫിലിപ്പിന് ടിക്കറ്റ് തുകയായ 146 രൂപയും നഷ്ടപരിഹാരമായി 25,000 രൂപയും കോടതി ചെലവിനത്തില് 10,000 രൂപയും നല്കാനാണ് വിധി.
2024 ഓഗസ്റ്റ് 24നായിരുന്നു കേസിനാസ്പദമായ സംഭവം. പരാതിക്കാരിയും അച്ഛനും മറ്റ് ചില ആശുപത്രി യാത്രക്കാരും കാട്ടാക്കടയില് നിന്നും എറണാകുളം അമൃത ഹോസ്പിറ്റലിലേക്ക് പോകുന്ന കെഎസ്ആര്ടിസി ബസില് തിരുവല്ലയില് നിന്ന് സീറ്റ് ബുക്ക് ചെയ്തിരുന്നു. എന്നാല് രാവിലെ 7.30 മുതല് തിരുവല്ല സ്റ്റാന്ഡില് കാത്തുനിന്നെങ്കിലും ബസ് എത്തിയില്ല. ബസ് തിരുവല്ല സ്റ്റാന്ഡില് കയറാതെ പോവുകയാണ് ചെയ്തത്.
അന്നുതന്നെ തിരുവല്ല സ്റ്റേഷന് മാസ്റ്റര്ക്കും കെഎസ്ആര്ടിസി എംഡിക്കും ഗതാഗത മന്ത്രിക്കും പരാതി നല്കിയിരുന്നു. എന്നാല് ബസ് ജീവനക്കാര് മാപ്പെഴുതി നല്കി ശിക്ഷാ നടപടികളില് നിന്ന് ഒഴിവായി. ഇതേത്തുടര്ന്നാണ് പരാതിക്കാരി ഉപഭോക്തൃ തര്ക്കപരിഹാര കമ്മീഷനെ സമീപിച്ചത്.
