തൃശൂര്: നോവല് മോഷണ വിവാദത്തില് ചേരിതിരിഞ്ഞ് സാഹിത്യലോകം. പ്രമുഖ എഴുത്തുകാരും സാഹിത്യ സംഘടനകളും പ്രതികരിച്ചിട്ടില്ലെങ്കിലും സമൂഹമാധ്യമങ്ങളില് ചേരിതിരിഞ്ഞ് ആരോപണ പ്രത്യാരോപണങ്ങള് രൂക്ഷമാവുകയാണ്. നിരൂപകരും വായനക്കാരും വിവാദത്തില് വ്യത്യസ്ത അഭിപ്രായങ്ങളുമായി രംഗത്തെത്തി.
കെ.ആര്. മീരയുടെ ഏറ്റവും പുതിയ നോവല് കലാച്ചി ഹരിത സാവിത്രിയുടെ ദി സിന് എന്ന നോവലിന്റെ അനുകരണമാണ് എന്ന ആരോപണമാണ് വന് വിവാദമായത്. നിരൂപകനായ പി.കെ. രാജശേഖരനും ഭാര്യ രാധിക സി. നായരും ഹരിതക്കെതിരെ നടത്തിയ പരാമര്ശങ്ങള് വലിയ വിമര്ശനത്തിന് ഇടയാക്കിയിട്ടുണ്ട്. മീരയുടെ നോവലും ഹരിതയുടെ നോവലും താരതമ്യം ചെയ്യുന്നത് മഹാത്മാഗാന്ധിയെയും മാങ്കൂട്ടത്തെയും താരതമ്യം ചെയ്യുന്നതുപോലെയാണെന്നാണ് രാജശേഖരന് പറഞ്ഞത്. രാജശേഖരന്റെ ഭാര്യ രാധിക സി. നായര് നക്ഷത്രമെവിടെ പുല്ക്കൊടി എവിടെ എന്ന് ഫേസ്ബുക്കില് കുറിച്ചു. വിവാദം ഉയര്ന്നതോടെ മീരയുടെ ആരാധകവൃന്ദമാണ് ഹരിതയ്ക്കെതിരെ സമൂഹമാധ്യമങ്ങളില് രംഗത്തു വന്നിട്ടുള്ളത്. അതേസമയം തന്റെ നോവലിന്റെ പ്രമേയം അപഹരിക്കപ്പെട്ടു എന്ന അഭിപ്രായത്തില് ഉറച്ചുനില്ക്കുകയാണ് ഹരിത സാവിത്രി.
കുറച്ച് നാളുകള്ക്കു മുന്പാണ് സിനിനോട് സാമ്യം ഉണ്ടെന്ന് തോന്നിയ പുസ്തകം വായിച്ചതെന്നും വളരെ പ്രതീക്ഷയോടെ കയ്യിലെടുത്ത പുസ്തകം ആദ്യത്തെ കുറച്ചു അധ്യായങ്ങള് കഴിഞ്ഞപ്പോള് തനിക്ക് വലിയ ബുദ്ധിമുട്ടുണ്ടാക്കിയെന്നും മീരയുടെ കലാച്ചിയെക്കുറിച്ച് ഹരിത പറയുന്നു. വിദേശത്തെ ഒരു പ്രശ്നബാധിത പ്രദേശത്തേക്ക് കാമുകനെ അന്വേഷിച്ചു പോകുന്ന കാമുകി. തന്റെ സുഹൃത്തുക്കളുടെ വിലക്ക് അവഗണിച്ച്, അവരുടെ കണ്ണ് വെട്ടിച്ച് അവള് ദൂരെയുള്ള കാമുകന്റെ ഗ്രാമത്തിലേക്ക് യാത്രയാകുന്നു. കാറിലുള്ള ദുരിതമയമായ, നീണ്ട യാത്ര. അവസാനം കാമുകന്റെ ഗ്രാമത്തില് എത്തിച്ചേരുന്നു. അപരിചിതമായ ചുറ്റുപാടുകളിലെ താമസം. അവസാനം കാമുകനുമായുള്ള ബന്ധത്തില് വ്യക്തമായ ക്ലോഷര് ഇല്ലാതെയുള്ള മടക്കം.
ഈ ത്രെഡിന് സിന് എന്ന എന്റെ നോവലിന്റെതുമായി വളരെയധികം സാമ്യം അനുഭവപ്പെട്ടു. ഇതിനിടയില് രണ്ടു നോവലുകളിലും വ്യത്യസ്തമായ പല കാര്യങ്ങള് സംഭവിക്കുന്നുണ്ട്. കഥകള്, ഉപകഥകള്. പല അടരുകളുള്ള പുസ്തകങ്ങളാണ് രണ്ടും.
പക്ഷെ മേല്പ്പറഞ്ഞ കാര്യങ്ങളിലെ സാമ്യം മനസില് ഒരു കരടായി അവശേഷിച്ചു.
എന്റെ മാത്രം തോന്നല് ആണിത് എന്ന് കരുതി അവഗണിക്കാന് ശ്രമിച്ചു. പക്ഷെ ധാരാളം വായനക്കാര് ഈ സാമ്യത്തെക്കുറിച്ച് എന്നോട് സംസാരിക്കുകയുണ്ടായി. പികെ. രാജശേഖരന്റെ വിമര്ശനത്തെക്കുറിച്ചും ഹരിത വെളിപ്പെടുത്തി.
വിദേശരാജ്യത്ത് വച്ചു നടക്കുന്ന കഥ എന്ന് പറഞ്ഞ് സിനിനെ കിട്ടുന്ന വേദികളിലെല്ലാം ആക്ഷേപിച്ചു നടക്കുന്ന ഒരു നിരൂപകന്റെ പുകഴ്ത്തല് മേല്പ്പറഞ്ഞ പുസ്തകത്തിന്റെ പിന്നില് കണ്ടു.
അയാളുടെ ഭാര്യ ഈ വിഷയം പുകഞ്ഞു തുടങ്ങിയപ്പോള് ആ എഴുത്തുകാരിയെ ആകാശത്തിലെ നക്ഷത്രത്തോടും എന്നെ പുല്ക്കൊടിയോടും ഉപമിച്ചു കൊണ്ട് ഒരു പോസ്റ്റ് ഇട്ടതും ശ്രദ്ധയില്പെട്ടു. എല്ലാ മനുഷ്യരും തുല്യരാണ് എന്നാണ് ഞാന് വിശ്വസിക്കുന്നത്, ഹരിത പറയുന്നു.
ജന്മഭൂമി ഓണ്ലൈന്