ദീപികയുടെ ശതോത്തര റൂബി ജൂബിലി ഉദ്ഘാടനം ചെയ്യാനെത്തിയ ഉപരാഷ്ട്രപതി സി.പി. രാധാകൃഷ്ണനു കോട്ടയം ആര്ച്ച്ബിഷപ് മാര് മാത്യു മൂലക്കാട്ട് ഉപഹാരം സമര്പ്പിക്കുന്നു
കോട്ടയം: രാജ്യവികസനത്തില് മാധ്യമങ്ങള്ക്ക് ഏറെ പങ്കുവഹിക്കാനുണ്ടെന്നും രാഷ്ട്രനന്മയായിരിക്കണം മാധ്യമപ്രവര്ത്തനത്തിന്റെ പരമമായ ലക്ഷ്യമെന്നും ഉപരാഷ്ട്രപതി സി.പി. രാധാകൃഷ്ണന് പറഞ്ഞു. ദീപിക ദിനപ്പത്രത്തിന്റെ 140-ാം വാര്ഷികാഘോഷം ഉദ്ഘാടനം ചെയ്യുകയായിരുന്നു അദ്ദേഹം.
രാജ്യത്തിന്റെ വികസനമെന്നത് രാഷ്ട്രീയപ്പാര്ട്ടികളുടെയോ സര്ക്കാരിന്റെയോ മാത്രം ചുമതലയല്ല. അത് ഓരോ പൗരന്റെയും കടമയാണ്. വികസനം, പരിസ്ഥിതി സംരക്ഷണം, സാമൂഹിക പരിവര്ത്തനം തുടങ്ങിയ കാര്യങ്ങളില് മാധ്യമങ്ങള്ക്ക് വലിയ പങ്കുവഹിക്കാനുണ്ട്. പ്രതീക്ഷയുടെയും സ്നേഹത്തിന്റെയും ദയയുടെയും ശാസ്ത്രപുരോഗതിയുടെയുമെല്ലാം വാര്ത്തകള് സമൂഹത്തിനു നല്കണം. യുവതയ്ക്ക് ആത്മവിശ്വാസം നല്കി അവരെ രാഷ്ട്രനിര്മ്മാണത്തിനു പ്രചോദിപ്പിക്കുന്നതാകണം മാധ്യമപ്രവര്ത്തം, ഉപരാഷ്ട്രപതി പറഞ്ഞു.
ഗവര്ണര് രാജേന്ദ്ര വിശ്വനാഥ ആര്ലേക്കര് അധ്യക്ഷത വഹിച്ചു. പത്രപ്രവര്ത്തനമെന്നത് സമൂഹത്തിനും രാഷ്ട്രത്തിനും വേണ്ടി സമര്പ്പിതമായി നടത്തുന്ന മഹത്തായ കാര്യമാണെന്ന് അദ്ദേഹം പറഞ്ഞു. ജനതാത്പര്യവും രാജ്യതാത്പര്യവും മുന്നിര്ത്തിയാകണം മാധ്യമങ്ങളുടെ ഓരോ ഇടപെടലും. കര്ഷകരുടെയും സമൂഹത്തിലെ അവഗണിക്കപ്പെട്ടവരുടെയും ശബ്ദമായി മാറണം. വികസിത ഭാരതത്തിലേക്കുള്ള മുന്നേറ്റത്തില് മാധ്യമങ്ങള്ക്ക് ഏറെ പങ്കുവഹിക്കാനുണ്ടെന്നും അദ്ദേഹം പറഞ്ഞു.
മുഖ്യമന്ത്രി വി.ഡി. സതീശന് മുഖ്യപ്രഭാഷണം നടത്തി. നിയമസഭാ സ്പീക്കര് തിരുവഞ്ചൂര് രാധാകൃഷ്ണന്, മന്ത്രി മോന്സ് ജോസഫ്, കെ. ഫ്രാന്സിസ് ജോര്ജ് എംപി, ബംഗാള് മുന് ഗവര്ണര് ഡോ. സി.വി. ആനന്ദബോസ്, കോട്ടയം ആര്ച്ച് ബിഷപ് മാര് മാത്യു മൂലക്കാട്ട്, രാഷ്ട്രദീപിക ലിമിറ്റഡ് ചെയര്മാന് ഡോ. ഫ്രാന്സീസ് ക്ലീറ്റസ്, മാനേജിങ് ഡയറക്ടര് ഫാ. മൈക്കിള് വെട്ടിക്കാട്ട്, ചീഫ് എഡിറ്റര് ഫാ. ഡോ. ജോര്ജ് കുടിലില് എന്നിവരും പങ്കെടുത്തു.
