ബുഡാപെസ്റ്റ്: അര്ഹതയോടെ പാരീസ് സാന്റ് ഷാര്മെയ്ന്(പിഎസ്ജി) നിലനിര്ത്തി- എന്നല്ലാതെ മറ്റൊന്നും ചാമ്പ്യന്സ് ലീഗ്2026 ഫൈനലിനെ കുറിച്ച് പറയാനാവില്ല. അത് അറിയണമെങ്കില് ബുഡാപെസ്റ്റില് നടന്ന പിഎസ്ജി-ആഴ്സണല് ഫൈനല് പോരാട്ടം കണ്ടു തീര്ക്കണമായിരുന്നു. പീരങ്കിപ്പടയെ പോലെ ചീറിപാഞ്ച ഫ്രഞ്ച് പടയ്ക്ക് അങ്ങനെയങ്ങ് കീഴ്പ്പെട്ടുകൊടുത്തില്ലെന്നത് മാത്രമാണ് മൈക്കല് അര്ട്ടേറ്റയ്ക്കും ആഴ്സണലിനും ഈ ഫൈനല് മത്സരത്തെ കുറിച്ച് ഓര്ത്തുവയ്ക്കാനുണ്ടാവുക. കരുത്തോടെ പൊരുതിയ പിഎസ്ജിയുടെ വിജയം പെനാല്റ്റി ഷൂട്ടൗട്ട് വരെ തടഞ്ഞുവയ്ക്കാന് ആഴ്സണലിന് സാധിച്ചു.
നിശ്ചിത സമയ മത്സരം 1-1ല് കലാശിച്ചതോടെ മത്സരം അധിക സമയത്തിലേക്ക് നീണ്ടും. അരമണിക്കൂര് അധികസമയത്ത് മത്സരം ഗോള് രഹിതം. തുടര്ന്നുള്ള ഷൂട്ടൗട്ടില് 4-3ന് പിഎസ്ജി ചരിത്രത്തിലെ രണ്ടാം ചാമ്പ്യന്സ് ലീഗ് കിരീടം ആഘോഷിച്ചു.
നെഞ്ചിടിപ്പേറ്റിയ ഷൂട്ടൗട്ട് എത്തിയതോടെ ആഴ്സണല് ടീമും ആരാധകരും സാധ്യതയുടെ മിന്നലാട്ടം കണ്ട് കൊതിച്ചു. ഷൂട്ടൗട്ടില് സ്പോട്ട് കിക്കെടുക്കാന് ആദ്യ ഊഴം കിട്ടിയത് ആഴ്സണലിനായിരുന്നു. അഞ്ച് സ്പോട്ട് കിക്കുകളില് ആദ്യ അവസരത്തില് ഗബ്രിയേല് മഗള്ഹീസും നാലാം അവസരത്തില് എബെറെച്ചി എസെയും കിക്ക് പാഴാക്കി. പിഎസ്ജിക്കായി മൂന്നാം കിക്കെടുത്ത ന്യൂനോ മെന്ഡിസ് മാത്രമാണ് അവസരം കിക്ക് പാഴാക്കിയത്. ഏറ്റവും ഒടുവില് ഗോന്സാലോ റാമോസ് ആഴ്സണലിന്റെ മൂന്നിനെതിരെ നാലാം ഗോള് നേടിക്കൊണ്ട് കിരീടം ഉറപ്പിക്കുകയായിരുന്നു.
നിശ്ചിത സമയ മത്സരത്തിലും അധിക സമയത്തും പന്ത് മിക്കപ്പോഴും പിഎസ്ജി കാല് കീഴിലായിരുന്നു. പിഎസ്ജിക്ക് മുന്നില് അമിതമായി പ്രതിരോധത്തില് ശ്രദ്ധ കേന്ദ്രീകരിക്കുകയല്ലാതെ ആഴ്സണലിന് വേറെ നിവൃത്തിയുണ്ടായില്ല. മത്സരത്തിന്റെ അഞ്ചാം മിനിറ്റില് ജര്മന് സ്ട്രൈക്കര് കായി ഹവേര്ട്സ് ആഴ്സണലിനെ മുന്നിലെത്തിച്ചു. ഈ ഒരു തവണ മാത്രമാണ് ആഴ്സണലിന് മത്സരത്തില് ഓണ് ടാര്ജറ്റിലേക്ക് ഗോള് ഉതിര്ക്കാനായത്. ഈ ഒരു നിമിഷത്തിലല്ലാതെ ആഴ്സണലിന് പിഎസ്ജിക്ക് ഒരുവസരത്തില് പോലും വെല്ലുവിളിയാകാന് സാധിച്ചില്ല. തുടക്കത്തിലേ ലീഡ് വഴങ്ങിയ പിഎസ്ജിക്ക് ആഴ്സണല് പ്രതിരോധ കോട്ട കടന്ന് ഗോള് നേടല് അത്ര എളുപ്പമായിരുന്നില്ല. 64-ാം മിനിറ്റില് ലഭിച്ച പെനാല്റ്റി പിഎസ്ജിക്കായി സൂപ്പര് താരം ഉസ്മാന് ഡെംബേലെ സമനില ഗോള് നേടി.
പിഎസ്ജി സീസണില് നേടുന്ന രണ്ടാം കിരീടമാണിത്. ഫ്രഞ്ച് ഫുട്ബോള് ലീഗില് ടീം കിരീടം നേടിയിരുന്നു.
