ന്യൂദല്ഹിയില് സംയുക്ത സേനാ മേധാവി അനില് ചൗഹാന് വിരമിക്കല് ചടങ്ങിന്റെ ഭാഗമായി ലഭിച്ച ഗാര്ഡ് ഓഫ് ഓണര് ഏറ്റുവാങ്ങുന്നു
ന്യൂദല്ഹി: ന്യൂദല്ഹിയിലെ ദേശീയ യുദ്ധ സ്മാരകത്തില് ഔദ്യോഗികപരമായ ഗാര്ഡ് ഓഫ് ഓണര് സ്വീകരിച്ച ശേഷം ഭാരതത്തിന്റെ സംയുക്ത സൈനിക മേധാവി ജനറല് അനില് ചൗഹാന് വിരമിച്ചു. രാജ്യത്തെ ഉന്നത സൈനിക ഉദ്യോഗസ്ഥനെന്ന നിലയിലുള്ള അദ്ദേഹത്തിന്റെ വിശിഷ്ട സേവനത്തിന്റെ പരിസമാപ്തിയായിരുന്നു ചടങ്ങ്.
ദേശീയ യുദ്ധസ്മാരകത്തില് പുഷ്പചക്രം അര്പ്പിച്ചതിന് ശേഷം മൂന്ന് സേനകളുടെയും ഗാര്ഡ് ഓഫ് ഓണര് സ്വീകരിച്ച് വിരമിക്കാന് കഴിഞ്ഞത് വലിയ ബഹുമതിയാണെന്ന് അദ്ദേഹം മറുപടി പറഞ്ഞു. തന്റെ സേവനകാലം ഏറെ തൃപ്തികരമായിരുന്നുവെന്നും അദ്ദേഹം കൂട്ടിച്ചേര്ത്തു. 1981ല് കരസേനയില് ചേര്ന്ന ജനറല് അനില് ചൗഹാന് 40 വര്ഷത്തിലേറെ രാഷ്ട്രത്തെ സേവിക്കുകയും മൂന്ന് വര്ഷവും എട്ട് മാസവും ഉന്നത സൈനിക പദവി വഹിക്കുകയും ചെയ്തു.
പരമവിശിഷ്ട സേനാ മെഡല്, ഉത്തം യുദ്ധ സേവാ മെഡല്, അതി വിശിഷ്ട സേവാ മെഡല്, എന്നിവ ലഭിച്ചിട്ടുണ്ട്. മൂന്ന് സൈനിക മേധാവികളോടൊപ്പം ഓപ്പറേഷന് സിന്ദൂറിന്റെ ആസൂത്രണത്തിലും നടപ്പാക്കലിലും അദ്ദേഹം പ്രധാന പങ്കുവഹിച്ചു. 2021 മെയ് മാസത്തില് ലെഫ്റ്റനന്റ് ജനറല് റാങ്കില് അദ്ദേഹം സര്വീസില് നിന്ന് വിരമിച്ചു.
എന്നാല് ഭാരതത്തിന്റെ രണ്ടാമത്തെ സംയുക്ത സൈനിക മേധാവിയായി ചുമതലയേറ്റ ശേഷം ഫോര് സ്റ്റാര് ജനറല് പദവി ഏറ്റെടുത്തു. ഭാരതത്തിന്റെ അടുത്ത ചീഫ് ഓഫ് ഡിഫന്സ് സ്റ്റാഫായി ലെഫ്റ്റനന്റ് ജനറല് എന്.എസ്. രാജ സുബ്രഹ്മണി ഇന്ന് ചുമതലയേല്ക്കും.
