ചെന്നൈ: നടൻ അജിത് കുമാറിന്റെ അമ്മ മോഹിനി മണി (84) അന്തരിച്ചു. വാർദ്ധക്യസഹജമായ അസുഖങ്ങളെത്തുടർന്ന് കുറച്ചുനാളായി ചികിത്സയിലായിരുന്ന അവരെ പെട്ടെന്നുണ്ടായ ആരോഗ്യപ്രശ്നങ്ങളെത്തുടർന്ന് ചെന്നൈയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.
അന്ത്യകര്മ്മങ്ങള് ചെന്നൈയിലെ വസതിയില്
ചെന്നൈയിലെ പാലവാക്കത്തുള്ള അജിത്തിന്റെ വസതിയിലായിരിക്കും അന്ത്യകർമ്മങ്ങള് നടക്കുക. ദുബായിലായിരുന്ന അജിത് അമ്മയുടെ വിയോഗവാർത്തയറിഞ്ഞ് ചെന്നൈയിലേക്ക് മടങ്ങി. സിനിമാ മേഖലയില് നിന്നുള്ള നിരവധി പേരാണ് മോഹിനി മണിയുടെ വിയോഗത്തില് അനുശോചനം രേഖപ്പെടുത്തിയത്.
ആദരാഞ്ജലികളുമായി സിനിമാലോകം
മുഖ്യമന്ത്രി വിജയ്, നടൻ കമല് ഹാസൻ, മുൻ മുഖ്യമന്ത്രി എം കെ സ്റ്റാലിൻ , ബി.ജെ.പി നേതാവ് കെ. അണ്ണാമലൈ തുടങ്ങിയവർ അജിത് കുമാറിനെയും കുടുംബത്തെയും ആശ്വസിപ്പിച്ചു. തമിഴ് ചലച്ചിത്ര രംഗത്തെ പ്രമുഖരും ആരാധകരും സോഷ്യൽ മീഡിയയിലൂടെ അനുശോചനങ്ങൾ അറിയിച്ചുകൊണ്ടിരിക്കുകയാണ്.
“എന്റെ പ്രിയ സുഹൃത്ത് ശ്രീ അജിത് കുമാറിന്റെ മാതാവ് ശ്രീമതി മോഹിനിയുടെ വിയോഗത്തിൽ ഞാൻ ഏറെ ദുഃഖിതനാണ്. ആ ആത്മാവിന് നിത്യശാന്തി ലഭിക്കാൻ പ്രാർത്ഥിക്കുന്നു. സ്നേഹനിധിയായ അമ്മയെ നഷ്ടപ്പെട്ട അജിത് കുമാറിനും അദ്ദേഹത്തിന്റെ കുടുംബത്തിനും അനുശോചനം അറിയിക്കുന്നു. ഈ കഠിന ഘട്ടത്തെ നേരിടാൻ അവർക്ക് കരുത്ത് ലഭിക്കട്ടെ,” എന്നാണ് വിജയ് എക്സിൽ കുറിച്ചത്.
അച്ഛന്റെ മരണം കൃത്യം മൂന്ന് വര്ഷം മുന്പ്
കൃത്യം മൂന്ന് വർഷം മുമ്പ് ഇതേ പ്രായത്തിൽ (85 വയസ്സ്) തന്നെയാണ് അജിത്കുമാറിന്റെ അച്ഛൻ പി. സുബ്രഹ്മണ്യവും അന്തരിച്ചത്
