റെയില്വേ ബോര്ഡിന്റെ റെയില് (വീല്സ്) ഓണ് റസ്റ്റോറന്റ് മാതൃക
മട്ടാഞ്ചേരി: റെയില് പാളത്തില് ബോഗികള് ഭക്ഷണശാലയാക്കി റെയില് (വീല്സ്) ഓണ് റസ്റ്റോറന്റ് (തീവണ്ടി ഭക്ഷണശാല) കൊച്ചി തുറമുഖത്ത് ഒരുങ്ങുന്നു. ഓണസമ്മാനമായാണ് സംസ്ഥാനത്തെ ആദ്യ റെയില്വെ ഭക്ഷണശാല തുടങ്ങുന്നത്. കൊച്ചി തുറമുഖ കവാടത്തില് സംസ്ഥാന പാതയ്ക്കരികില് പഴയ ഹാള്ട്ട് സ്റ്റേഷനോട് ചേര്ന്നാണ് റെയില് പാളത്തില് പഴയ ബോഗികളെ ഭക്ഷണശാലയാക്കി റെയില് ഓണ് റസ്റ്റോറന്റ് ഒരുങ്ങുന്നത്. കേരളത്തില് കൊച്ചിയിലും തമിഴ്നാട്ടില് നാഗര്കോവിലിലുമാണ് റെയില്വേ പാളത്തിലെ ബോഗി റസ്റ്റോറന്റുകള് തുടങ്ങുന്നത്.
റെയില്വേ സ്റ്റേഷനുകളുമായി ചേര്ന്നാണ് ഇതിനകം റയില് (വീല്സ്) ഓണ് റസ്റ്റോറന്റ് തുടങ്ങിയത്. കൊച്ചിയുടെ വിനോദസഞ്ചാര പ്രാധാന്യവും തുറസായ സ്ഥലലഭ്യതയുമാണ് കൊച്ചി തുറമുഖ നഗരിയെ തെരഞ്ഞെടുക്കാനിടയാക്കിയത്. തനത് നാടന് ഭക്ഷണങ്ങള്, വിശേഷ വിഭവങ്ങള്, മധുരപലഹാരങ്ങള്, നാടന് പാനീയങ്ങള്, എന്നിവയാണ് ഭക്ഷണശാലയില് ലഭിക്കുക. കാലപ്പഴക്കം ചെന്ന റെയില്വേ ബോഗികളുടെ പുനരുപയോഗം ലക്ഷ്യമിട്ട് റെയില്വേ ബോര്ഡാണ് റെയില് (വീല്സ്) ഓണ് റസ്റ്റോറന്റ് രൂപകല്പന ചെയ്തത്.
വിനോദ സഞ്ചാരികള്ക്ക് ആകര്ഷകവും റെയില് ബോഗികളിലുടെ വരുമാനവും ലക്ഷ്യമിടുന്നു. എസി കോച്ചുകളടക്കം രണ്ടില് കൂടുതല് റെയില്വേ ബോഗികള് കുട്ടിച്ചേര്ത്ത് ഉള്വശം ഭക്ഷണശാല രൂപത്തിലാക്കിയാണ് ഭക്ഷണശാല ഒരുക്കുന്നത്. 2020 ഫെബ്രുവരിയില് ബംഗാളിലെ അസന്ബോള് സ്റ്റേഷനിലും മുംബൈ ഛത്രപതി റെയില്വേ ടെര്മിനല്സിലുമാണ് രാജ്യത്തെ ആദ്യ റെയില് (വീല്) ഓണ് റസ്റ്റോറന്റ് തുടങ്ങിയത്. ഉത്തര ഭാരതത്തില് ഇരുപതിലേറെ റസ്റ്റോറന്റുകളുണ്ട്. റെയില് പാളത്തില് ബോഗികളില് ഒരുക്കിയ ഭക്ഷണ ശാലകള് കരാര് അടിസ്ഥാനത്തിലാണ് പ്രവര്ത്തിക്കുന്നത്.
