കൊച്ചി: വൈറല് താരമായ പെണ്കുട്ടിയും ഭര്ത്താവ് ഫര്മാന് ഖാനും സമര്പ്പിച്ച മുന്കൂര് ജാമ്യാപേക്ഷ ഹൈക്കോടതി ജൂണ് 2ലേക്ക് മാറ്റി. അതുവരെ അറസ്റ്റ് തടയുന്ന മുന് ഇടക്കാല ഉത്തരവ് നീട്ടുകയും ചെയ്തു.
തന്റെ മകളെ ഫര്മാന് തട്ടിക്കൊണ്ടുപോയെന്നും വിവാഹസമയത്ത് അവള്ക്ക് പ്രായപൂര്ത്തിയായിരുന്നില്ലെന്നും ആരോപിച്ച് പെണ്കുട്ടിയുടെ അച്ഛന് നല്കിയ പരാതിയില് മധ്യപ്രദേശ് പോലീസ് രജിസ്റ്റര് ചെയ്ത കേസില് അറസ്റ്റ് തടയണമെന്ന് ആവശ്യപ്പെട്ട് ഹര്ജിക്കാര് ജസ്റ്റിസ് കൗസര് എടപ്പഗത്തിന്റെ ബെഞ്ചിനെ സമീപിച്ചു. ആരോപണങ്ങള് നിഷേധിച്ച ഹര്ജിക്കാര്, ഒരു പുതിയ മലയാള സിനിമയുമായി ബന്ധപ്പെട്ട് കേരളത്തില് നടന്ന ഒരു പൂജയില് വച്ച് കണ്ടുമുട്ടിയെന്നും പ്രണയത്തിലായെന്നും ഒരുമിച്ച് ജീവിക്കാന് തീരുമാനിച്ചെന്നും വാദിച്ചു. അതനുസരിച്ച്, മാര്ച്ച് 11ന് തിരുവനന്തപുരത്തെ അരുമാനൂരിലുള്ള ശ്രീ നൈനാര്ദേവ ക്ഷേത്രത്തില് വെച്ച് അവരുടെ വിവാഹം നടന്നു.
നേരത്തെ, മധ്യപ്രദേശ് പോലീസ് ഡയറക്ടര് ജനറല് ഹര്ജിയുടെ നിലനില്പ്പിനെ ചോദ്യം ചെയ്തു, മധ്യപ്രദേശില് കേസ് രജിസ്റ്റര് ചെയ്തതിനാല്, ഹര്ജിക്കാര് കേരള ഹൈക്കോടതിയില് ഹര്ജി സമര്പ്പിക്കുന്നതിന് പകരം മധ്യപ്രദേശ് ഹൈക്കോടതിയെ സമീപിക്കേണ്ടതായിരുന്നുവെന്ന് വാദിച്ചു.
വെള്ളിയാഴ്ച, മധ്യപ്രദേശ് ഡിജിപിക്ക് വേണ്ടി അസിസ്റ്റന്റ് സോളിസിറ്റര് ജനറല് എസ്.വി. രാജു ഹാജരായി, ഇര പട്ടികവര്ഗ വിഭാഗത്തില് പെട്ടയാളായതിനാല്, എസ്സി/എസ്ടി (അതിക്രമങ്ങള് തടയല്) നിയമപ്രകാരമുള്ള കുറ്റകൃത്യം ഫര്മാന് ഖാനെതിരെ ചുമത്തുമെന്നും അദ്ദേഹത്തിന് മുന്കൂര് ജാമ്യത്തിന് അര്ഹതയില്ലെന്നും വാദിച്ചിരുന്നു.
