ന്യൂദല്‍ഹി: സിബിഎസ്ഇ പ്ലസ് ടു (പന്ത്രണ്ടാം ക്ലാസ്) പുനര്‍മൂല്യനിര്‍ണയ തീയതിയില്‍ മാറ്റം വരുത്തിയത് വിദ്യാര്‍ത്ഥികള്‍ക്ക് സുഗമമായി അപേക്ഷ നല്‍കുന്നതിനും സിബിഎസ്ഇയുടെ പ്രവര്‍ത്തനം കൂടുതല്‍ മെച്ചപ്പെടുത്തുന്നതിനുമാണെന്ന് അധികൃതര്‍. സിബിഎസ്ഇ പ്ലസ് ടു വിദ്യാര്‍ത്ഥികളുടെ പരീക്ഷാഫലത്തിന് ശേഷമുള്ള ഉത്തരക്കടലാസ് പരിശോധനയുടെയും പുനര്‍മൂല്യനിര്‍ണയത്തിന്റെയും ഷെഡ്യൂളില്‍ മാറ്റം വരുത്തി. അപേക്ഷകള്‍ സമര്‍പ്പിക്കുന്നതിനുള്ള പോര്‍ട്ടല്‍ ജൂണ്‍ 1 മുതല്‍ പ്രാവര്‍ത്തികമാക്കും. ഉത്തരക്കടലാസുകളുടെ പരിശോധനയ്‌ക്കോ പുനര്‍മൂല്യനിര്‍ണയത്തിനോ അപേക്ഷ സമര്‍പ്പിക്കുമ്പോള്‍ വിദ്യാര്‍ത്ഥികള്‍ക്ക് സാങ്കേതിക പ്രശ്‌നങ്ങളുണ്ടാകരുതെന്ന് ബോര്‍ഡ് താത്പര്യപ്പെടുന്നു.
ഉത്തരക്കടലാസുകളുടെ പരിശോധനയ്‌ക്കോ പുനര്‍മൂല്യനിര്‍ണയത്തിനോ അപേക്ഷിക്കുന്ന വിദ്യാര്‍ത്ഥികള്‍ക്ക് ജൂണ്‍ 1 മുതല്‍ പോര്‍ട്ടലില്‍ പ്രവേശിക്കാന്‍ സാധിക്കും. പോര്‍ട്ടല്‍ പ്രവര്‍ത്തനക്ഷമമായ ശേഷം വിദ്യാര്‍ത്ഥികള്‍ക്ക് പോസ്റ്റ് റിസള്‍ട്ട് ആക്ടിവിറ്റീസ് പോര്‍ട്ടല്‍ മുഖേന അപേക്ഷകള്‍ സമര്‍പ്പിക്കാന്‍ കഴിയും. എല്ലാ അപേക്ഷകളും സിബിഎസ്ഇയുടെ ഔദ്യോഗിക വെബ്‌സൈറ്റുവഴിയാണ് സമര്‍പ്പിക്കേണ്ടത്. അപേക്ഷിക്കുന്നതിന് മുമ്പ് നിര്‍ദേശങ്ങള്‍ ശ്രദ്ധിക്കണമെന്നും വിശദാംശങ്ങളെല്ലാം ശരിയായി പൂരിപ്പിച്ചിട്ടുണ്ടെന്ന് ഉറപ്പാക്കണമെന്നും അധികൃതര്‍ പറഞ്ഞു.
വിദ്യാര്‍ത്ഥികള്‍ക്ക് 1800118004 എന്ന നമ്പറില്‍ സിബിഎസ്ഇ ടെലി-കൗണ്‍സിലിങ് ഹെല്‍പ്‌ലൈനുമായോ [email protected] എന്ന ഇ മെയില്‍ വിലാസത്തിലോ ബന്ധപ്പെടാം.
