ഡി.കെ. ശിവകുമാര്‍ വരുന്നതോടെ ഇനി കോഫി ഡേ ഓഹരി വാങ്ങി കീശ നിറയ്‌ക്കുവിന്‍ എന്ന് സമൂഹമാധ്യമങ്ങളില്‍ പ്രചാരം, ഓഹരിവില കുതിച്ചു

ബംഗളൂരു: കർണാടക മുഖ്യമന്ത്രി സ്ഥാനത്തേക്ക് ഡി.കെ. ശിവകുമാര്‍ വരുമെന്നത് ഏതാണ്ട് ഉറപ്പായതോടെ കര്‍ണ്ണാടകത്തില്‍ സോഷ്യല്‍മീഡിയയില്‍ ഒരു വലിയ സന്ദേശം വൈറലായി പ്രചരിക്കുകയാണ്. കീശ വീര്‍പ്പിക്കാന്‍ കഫേ കോഫി ഡേ വാങ്ങൂ എന്നതാണ് ഈ സന്ദേശം.

എന്തായാലും അത്ഭുതമെന്ന് പറയട്ടേ, സിദ്ധരാമയ്യ രാജി വെച്ചതോടെ തന്നെ പ്രമുഖ കഫേ ശൃംഖലയായ കോഫി ഡേ എന്റർപ്രൈസസിന്റെ ഓഹരി വിലയില്‍ വൻ കുതിച്ചുചാട്ടം (Coffee Day Enterprises). വെള്ളിയാഴ്ച വ്യാപാരത്തിനിടയില്‍ കമ്പനിയുടെ ഓഹരികള്‍ 20 ശതമാനം ഉയർന്ന് അപ്പർ സർക്യൂട്ട് പരിധിയിലെത്തി. വെള്ളിയാഴ്ച 32 രൂപയായിരുന്ന കമ്പനിയുടെ ഓഹരി വില 34 രൂപയിലേക്ക് ഉയര്‍ന്നു. ഒരു ഓഹരിക്ക് ഒരു ദിവസം പരമാവധി ഉയരാവുന്ന വില അതിന്റെ അപ്പോഴത്തെ വിലയുടെ 20 ശതമാനം വരെയാണ്. അതായത് ഈ ഓഹരി വാങ്ങാന്‍ നിറയെപ്പേര്‍ വന്നു എന്നര്‍ത്ഥം.

\വരും ദിവസങ്ങളിലും ഈ ഓഹരി കുതിയ്‌ക്കുമെന്നുറപ്പാണ്. മുഖ്യമന്ത്രിയായി ഡി.കെ. ശിവകുമാര്‍ സത്യപ്രതിജ്ഞ ചെയ്യുന്ന ദിവസവും വന്‍തോതില്‍ കുതിപ്പുണ്ടാകും. എന്തായാലും ഇപ്പോള്‍ വാങ്ങി സൂക്ഷിച്ചാല്‍ വരും മാസങ്ങളില്‍ ലക്ഷങ്ങള്‍ കൊയ്യാമെന്നാണ് ഓഹരി നിക്ഷേപകരുടെ കണക്കുകൂട്ടല്‍.

സിദ്ധരാമയ്യക്ക് പകരം കർണാടകയുടെ അടുത്ത മുഖ്യമന്ത്രിയായി വരുമെന്ന് പ്രതീക്ഷിക്കപ്പെടുന്ന ഉപമുഖ്യമന്ത്രി ഡി.കെ. ശിവകുമാറിന് കോഫി ഡേ ഗ്രൂപ്പുമായി അടുത്ത കുടുംബബന്ധമുള്ളതാണ് ഈ പെട്ടെന്നുള്ള മുന്നേറ്റത്തിന് നിക്ഷേപകരെ പ്രേരിപ്പിച്ചത്. ഡി.കെ. ശിവകുമാറിന്റെ മകള്‍ ഐശ്വര്യ, അന്തരിച്ച കോഫി ഡേ സ്ഥാപകൻ വി.ജി. സിദ്ധാർത്ഥന്റെ മകൻ അമർത്യ ഹെഗ്‌ഡെയെയാണ് വിവാഹം കഴിച്ചിരിക്കുന്നത്. ഈ ബന്ധം വഴി കമ്പനിയുടെ ഭാവി പ്രവർത്തനങ്ങള്‍ക്ക് രാഷ്‌ട്രീയമായ വലിയ പിന്തുണ ലഭിക്കുമെന്ന വിപണിയുടെ വിലയിരുത്തലാണ് ഓഹരി വിപണിയില്‍ പ്രതിഫലിച്ചത്.

ദീർഘകാലമായി കടുത്ത സാമ്പത്തിക പ്രതിസന്ധി നേരിട്ടിരുന്ന കോഫി ഡേ ഗ്രൂപ്പ്, 2026 മാർച്ച്‌ പാദത്തില്‍ മികച്ച പ്രവർത്തന ലാഭത്തോടെ വൻ തിരിച്ചുവരവ് നടത്തിയിരുന്നു. കഴിഞ്ഞ വർഷം ഇതേ പാദത്തില്‍ 33 കോടി രൂപയുടെ നഷ്ടം രേഖപ്പെടുത്തിയ സ്ഥാനത്ത് ഇത്തവണ 130 കോടി രൂപയുടെ ഏകീകൃത അറ്റാദായമാണ് കമ്പനി സ്വന്തമാക്കിയത്. റവന്യൂ വരുമാനം 280 കോടി രൂപയായി ഉയരുകയും ചെയ്തു.

കഫേ ശൃംഖലകളുടെ അമിതമായ വ്യാപനവും റിയല്‍ എസ്റ്റേറ്റ് നിക്ഷേപങ്ങളും കാരണം കടക്കെണിയിലായതിനെ തുടർന്ന് 2019-ലാണ് സ്ഥാപകൻ വി.ജി. സിദ്ധാർത്ഥൻ ജീവനൊടുക്കിയത്. കോണ്‍ഗ്രസ് നേതാവും മുന്‍ കര്‍ണ്ണാടക മുഖ്യമന്ത്രിയുമായ എസ്. എം. കൃഷ്ണയുടെ മകള്‍ മാളവിക ഹെഗ്ഡേയാണ് വി.ജി. സിദ്ധാര്‍ത്ഥിന്റെ ഭാര്യ. ഭര്‍ത്താവിന്റെ മരണശേഷം മാളവിക ഹെഗ്ഡേ കോഫി ഡേയുടെ പ്രവര്‍ത്തനം ഏറ്റെടുക്കുകയായിരുന്നു. പിന്നീടാണ് ഇവരുടെ മകന്‍ ഡി.കെ. ശിവകുമാറിന്റെ മകളെ വിവാഹം കഴിച്ചത്.