തിരുവനന്തപുരം: പ്രതിപക്ഷ നേതാവ് പിണറായി വിജയന്റെ വീട്ടിലെ റെയിഡിന് ശേഷം മടങ്ങിയ ഇ.ഡി ഉദ്യോഗസ്ഥര്‍ സഞ്ചരിച്ച വാഹനങ്ങള്‍ ആക്രമിച്ച സംഭവത്തില്‍ സിപിഎം പ്രവര്‍ത്തകരായ അഞ്ച് പ്രതികള്‍ റിമാന്‍ഡില്‍. 14 ദിവസമാണ് റിമാന്‍ഡ് ചെയ്തത്. മറ്റ് നാല് പ്രതികളെ ഉടന്‍ മജിസ്‌ട്രേറ്റിന് മുമ്പാകെ ഹാജരാക്കും.
വധശ്രമം ഉള്‍പ്പടെ ചുമത്തിയ കേസില്‍ ഒന്‍പത് പ്രതികള്‍ പിടിയിലായിട്ടുണ്ട്.അനില്‍കുമാര്‍, കിരണ്‍,അമല്‍ എന്നിവരാണ് ഇന്ന് പിടിയിലായത്. ഡിവൈഎഫ്‌ഐ പ്രവര്‍ത്തകന്‍ അമലിനെ കോട്ടയത്തെ ലോഡ്ജില്‍ നിന്നാണ് പിടികൂടിയത്.
ഇ ഡി ഉദ്യോഗസ്ഥര്‍ സഞ്ചരിച്ച വാഹനം അടിച്ചു തകര്‍ത്തതില്‍ നേരിട്ടു പങ്കാളികളായത് പത്തു പേരെന്നാണ് പൊലീസിന്റെ നിഗമനം.കൂടുതല്‍ പേര്‍ ഉണ്ടോയെന്ന് ദൃശ്യങ്ങള്‍ ശേഖരിച്ചു പരിശോധിക്കുകയാണ്.സംഭവത്തില്‍ പൊലീസ് മേധാവിയില്‍ നിന്നും ആഭ്യന്തര മന്ത്രി രമേശ് ചെന്നിത്തല നേരിട്ടു വിശദീകരണം തേടിയിട്ടുണ്ട്.പിണറായി വിജയന്റെ വീടിനു മുന്നില്‍ സിപിഎം പ്രവര്‍ത്തകര്‍ തടിച്ചു കൂടിയിട്ടും മതിയായ സേനാംഗങ്ങളെ വിന്യസിക്കാതിരുന്നതും മുതിര്‍ന്ന പൊലീസ് ഉദ്യോഗസ്ഥര്‍ എത്താതിരുന്നതും വീഴ്ചയെന്നാണ് വിമര്‍ശനം.
ഇഡി ഉദ്യോഗസ്ഥര്‍ ആക്രമിക്കപ്പെട്ടതില്‍ കേന്ദ്ര സര്‍ക്കാറും ഗവര്‍ണറും വിശദീകരണം തേടിയിട്ടുണ്ട്.ഇക്കാര്യത്തില്‍ റിപ്പോര്‍ട്ട് നല്‍കുന്നത് കൂടിക്കാഴ്ചയില്‍ ചര്‍ച്ചയായി. പോലീസില്‍ നടപ്പാക്കേണ്ട മാറ്റങ്ങളും ചര്‍ച്ച ആയെന്നാണ് വിവരം. മുഖ്യമന്ത്രി തിരുവനന്തപുരത്തു തിരിച്ചെത്തിയാല്‍ ഇക്കാര്യങ്ങളില്‍ തീരുമാനം എടുക്കും.
