കോതമംഗലം: കോതമംഗലത്ത് കല്ലില് ഭഗവതി ക്ഷേത്രത്തില് ആരെങ്കിലും പോയിട്ടുണ്ടോ? ഒരു കൂറ്റൻ പാറയുടെ അടിയിലെ ഈ ഗുഹാക്ഷേത്രത്തില് പോയവര്ക്ക് അതൊരു അവിസ്മരണീയമായ അനുഭവമായിരിക്കും. ഇതുപോലെ കോതമംഗലം റൂട്ടില് നിരവധി ടൂറിസ്റ്റ് കേന്ദ്രങ്ങളുമുണ്ട്. ഈയിടെ സഞ്ചാരികളുടെ ഒരു ഫെയ്സ്ബുക്ക് പേജ് പങ്കുവെച്ച കുറിപ്പില് പത്ത് സ്ഥലങ്ങള് പരിചയപ്പെടുത്തുന്നു.
1. കല്ലിൽ ഭഗവതി ക്ഷേത്രം
നമ്മുടെ യാത്ര ആരംഭിക്കുന്നത് ചരിത്രപ്രസിദ്ധമായ കല്ലിൽ ഭഗവതി ക്ഷേത്രത്തിൽ നിന്നാണ്. ഒരു കൂറ്റൻ പാറയുടെ അടിയിലാണ് ഈ ഗുഹാക്ഷേത്രം സ്ഥിതി ചെയ്യുന്നത്. ശാന്തവും പ്രകൃതിരമണീയവുമായ അന്തരീക്ഷം യാത്രയ്ക്ക് നല്ലൊരു തുടക്കം നൽകും.
കല്ലില് ഭഗവതി ക്ഷേത്രമുണ്ടായതിന് പിന്നില് ഒരു കഥയുണ്ട്. ഒരിയ്ക്കല് കാട്ടില് നിന്നും വിഭവങ്ങള് ശേഖരിക്കാന് പോയ പെണ്ണുങ്ങള് ഒരു സുന്ദരിയായ ദിവ്യസ്ത്രീയെ കണ്ടു. കാട്ടിനുള്ളില് കൂറ്റന് പാറക്കല്ലുകള് കൊണ്ട് കളിക്കുകയാണ് ഈ സ്ത്രീ. ആരെന്ന് തിരക്കാന് ഇവര് അടുത്തു ചെന്നപ്പോള് പാറക്കെട്ടിനുള്ളില് ഈ സ്ത്രീ അപ്രത്യക്ഷയായി. ഈ വിടവ് ഇപ്പോഴുമുണ്ട്. ആ സ്ത്രീ അമ്മാനമാടിയ കൂറ്റന് പാറക്കല്ലാണ് ഈ ക്ഷേത്രത്തിന്റെ മേല്ക്കൂരയായി മാറിയത്. ഈ ദിവ്യാംശമുള്ള സ്ത്രീയെ നാട്ടുകാര് കല്ലില് ഭഗവതി എന്ന് വിളിച്ചുപോന്നു.
2. മാർ തോമാ ചെറിയ പള്ളി
കോതമംഗലം ടൗണിൽ തന്നെയുള്ള അതിപുരാതനമായ ക്രൈസ്തവ ദേവാലയമാണിത്. ചരിത്രപരമായ ഒരുപാട് കഥകൾ ഉറങ്ങുന്ന ഈ പള്ളി ആത്മീയമായ സമാധാനവും സന്ദർശകർക്ക് സമ്മാനിക്കുന്നു.
3. തട്ടേക്കാട് പക്ഷി സങ്കേതം
പ്രശസ്ത പക്ഷിശാസ്ത്രജ്ഞൻ ഡോ. സലിം അലിയുടെ പേരിൽ അറിയപ്പെടുന്ന ഇടം. കാടിന്റെ പച്ചപ്പിലൂടെ നടന്ന് അപൂർവ്വ ഇനം പക്ഷികളെ കാണാനും, പ്രകൃതിയെ തൊട്ടറിയാനും തട്ടേക്കാട്ടേക്ക് വരാം.
4. ഇഞ്ചത്തൊട്ടി തൂക്കുപാലം
കേരളത്തിലെ ഏറ്റവും നീളം കൂടിയ തൂക്കുപാലങ്ങളിൽ ഒന്നാണിത്. പെരിയാറിന് കുറുകെയുള്ള ഈ പാലത്തിലൂടെയുള്ള നടത്തവും, ചുറ്റുമുള്ള കാഴ്ച്ചകളും ഫോട്ടോ എടുക്കാൻ ഇഷ്ടപ്പെടുന്നവർക്ക് ഒരു ലോട്ടറിയാണ്.
5. കുട്ടമ്പുഴ
കാടും പുഴയും ഒന്നാകുന്ന അതിമനോഹരമായ ഗ്രാമം. പച്ചപ്പ് നിറഞ്ഞ വഴികളും, ആനകൾ ഇറങ്ങുന്ന വനമേഖലയും ഇവിടുത്തെ പ്രത്യേകതയാണ്. ഓഫ്റോഡ് റൂട്ടുകൾ ഇഷ്ടപ്പെടുന്നവർക്ക് ഇവിടം വളരെ പ്രിയപ്പെട്ടതാണ്.
6. മാമലകണ്ടം
കുട്ടമ്പുഴയിൽ നിന്ന് കാട്ടുവഴിയിലൂടെ യാത്ര ചെയ്താൽ മാമലകണ്ടത്ത് എത്താം. മൂടൽമഞ്ഞും തണുത്ത കാറ്റും നിറഞ്ഞ ഒരു കുഞ്ഞു ഹിൽ സ്റ്റേഷനാണിത്. പ്രകൃതിയുടെ മടിത്തട്ടിൽ ലയിച്ചിരിക്കാൻ പറ്റിയ സ്ഥലം.
7. ഇടമലയാർ ഡാം
വലിയ മലനിരകൾക്ക് നടുവിൽ സ്ഥിതി ചെയ്യുന്ന മനോഹരമായ അണക്കെട്ട്. വനമേഖലയിലൂടെയുള്ള യാത്രയും ഡാമിന്റെ കൺകുളിർക്കുന്ന കാഴ്ച്ചകളും സഞ്ചാരികളെ ഒട്ടും നിരാശപ്പെടുത്തില്ല.
8. ഭൂതത്താൻകെട്ട്
പെരിയാറിന് കുറുകെയുള്ള പ്രകൃതിദത്തമായ ഈ അണക്കെട്ടും പരിസരവും മികച്ചൊരു പിക്നിക് സ്പോട്ടാണ്. ഇവിടെ ബോട്ടിംഗ് സൗകര്യവും ലഭ്യമാണ്. കുട്ടികളുമൊത്ത് സമയം ചിലവഴിക്കാൻ ഏറ്റവും അനുയോജ്യം.
9. അയ്യപ്പന്മുടി
വൈകുന്നേരങ്ങൾ മനോഹരമാക്കാൻ പറ്റിയ ഒരു അടിപൊളി വ്യൂ പോയിന്റ്. കുറച്ചു ദൂരം പാറക്കെട്ടുകൾ കയറി മുകളിലെത്തിയാൽ ചുറ്റുമുള്ള മലനിരകളുടെയും സൂര്യാസ്തമയത്തിന്റെയും ദൃശ്യങ്ങൾ ആസ്വദിക്കാം.
10. പാണിയേലി പോര് എക്കോ ടൂറിസം
നമ്മുടെ യാത്ര അവസാനിക്കുന്നത് പെരിയാറിലെ പാറക്കെട്ടുകളും കുത്തൊഴുക്കും നിറഞ്ഞ പാണിയേലി പോരിലാണ്. വനത്തിനുള്ളിലൂടെ ഒഴുകുന്ന പുഴയുടെ ഭംഗിയും തണുത്ത കാറ്റും യാത്രാക്ഷീണം മുഴുവൻ മാറ്റിത്തരും.
