കോട്ടയം: അറബിക്കടലില് നിന്ന് കേരളതീരത്തേക്ക് മഴ മേഘങ്ങള് എത്തിത്തുടങ്ങിയെങ്കിലും സംസ്ഥാനത്ത് കാലവര്ഷം (ഇടവപ്പാതി) എത്തിയോ എന്നതിന്റെ ഔദ്യോഗിക പ്രഖ്യാപനം കേന്ദ്ര കാലാവസ്ഥാ വകുപ്പ് (ഐഎംഡി) ഇതുവരെ നടത്തിയിട്ടില്ല. കേരളത്തില് മഴ പെയ്യുന്നുണ്ടെങ്കിലും കാലവര്ഷ പ്രഖ്യാപനം വൈകുന്നതിനും കാരണമുണ്ട്. ഇവിടെ കാലവര്ഷം എത്തിയെന്ന് പ്രഖ്യാപിക്കുന്നതിന് മഴ, കാറ്റ് എന്നിവയുടെ കാര്യത്തിലുള്ള ചില മാനദണ്ഡങ്ങളുടെ അടിസ്ഥാനത്തിലാണ്. ഇതില് കാറ്റിന്റെ ചില മാനദണ്ഡങ്ങള് പൂര്ണമായി പാലിക്കാത്തതാണ് പ്രഖ്യാപനം നീളുന്നതിന് കാരണമെന്ന് കാലാവസ്ഥാ നിരീക്ഷകന് രാജീവന് എരിക്കുളം പറഞ്ഞു.
കാലവര്ഷ പ്രഖ്യാപനം ഇങ്ങനെ
ഐഎംഡിയുടെ പട്ടികയിലുള്ള 14 കേന്ദ്രങ്ങളില് (മിനിക്കോയ്, അമിനി, തിരുവനന്തപുരം, പുനലൂര്, കൊല്ലം, ആലപ്പുഴ, കോട്ടയം, കൊച്ചി, തൃശൂര്, കോഴിക്കോട്, തലശ്ശേരി, കണ്ണൂര്, കുഡ്ലു, മംഗളൂരു) 60 ശതമാനം ഇടത്തും മെയ് 10ന് ശേഷം തുടര്ച്ചയായ രണ്ട് ദിവസം 2.5 മില്ലിമീറ്ററോ കൂടുതലോ മഴ രേഖപ്പെടുത്തുകയാണെങ്കില്, മറ്റ് മാനദണ്ഡങ്ങള്ക്കും കൂടി അനുസൃതമായി രണ്ടാം ദിവസം കേരളത്തില് കാലവര്ഷം ആരംഭിച്ചതായി പ്രഖ്യാപിക്കും.
ഭൂമധ്യരേഖ മുതല് 10 ഡിഗ്രി ഉത്തര അക്ഷാംശം വരെയും 55 ഡിഗ്രി മുതല് 80 ഡിഗ്രി കിഴക്ക് രേഖാംശം വരെയുമുള്ള മേഖലയില് 4.2 കി.മീ. വരെ ഉയരത്തില് പടിഞ്ഞാറന് കാറ്റിന്റെ സാന്നിധ്യം, അഞ്ച് ഡിഗ്രി മുതല് 10 ഡിഗ്രി ഉത്തര അക്ഷാംശം, 70 ഡിഗ്രി മുതല് 80 ഡിഗ്രി കിഴക്ക് രേഖാംശം വരെയുള്ള മേഖലയിയില് 750 മീറ്റര് ഉയരംവരെ കാറ്റിന്റെ വേഗം മണിക്കൂറില് 27.5 കി.മീ. മുതല് 37 കി.മീ. വരെ ആയിരിക്കുക എന്നിവയും മാനദണ്ഡങ്ങളിലുണ്ട്. ഇവ കൂടാതെ ഇന്സാറ്റ് ഉപഗ്രഹം രേഖപ്പെടുത്തുന്ന ഔട്ട്ഗോയിങ് ലോങ് വേവ് റേഡിയേഷന് (ഒഎല്ആര്) മൂല്യം, അഞ്ച് ഡിഗ്രി മുതല് 10 ഡിഗ്രി ഉത്തര അക്ഷാംശം, 70 ഡിഗ്രി മുതല് 75 ഡിഗ്രി കിഴക്ക് രേഖാംശം പരിധിയില് 200 ഡബ്ല്യുഎം 2ന് താഴെ ആയിരിക്കണം എന്നതും ഉള്പ്പെടുന്നു.
നിലവില് കഴിഞ്ഞ ദിവസങ്ങളില് മഴ, ഒഎല്ആര് എന്നിവയില് മാനദണ്ഡങ്ങള് പാലിക്കപ്പെട്ടെങ്കിലും കാറ്റിന്റെ മാനദണ്ഡങ്ങള് പൂര്ണമായും പാലിക്കപ്പെട്ടില്ല. താഴ്ന്ന നിലയില് പടിഞ്ഞാറന് കാറ്റ് നിലവില് ഉണ്ടെങ്കിലും നാല് കിലോമീറ്റര് ഉയരം വരെ എത്തിയിട്ടില്ല. അതിനാലാണ് മഴ ലഭിച്ചിട്ടും കാലാവസ്ഥാ വകുപ്പ് കേരളത്തില് കാലവര്ഷം പ്രഖ്യാപിക്കാന് വൈകുന്നത്. ഇനിയുള്ള ദിവസങ്ങളില് അറബിക്കടലില് രൂപപ്പെടാന് സാധ്യതയുള്ള ചക്രവാതച്ചുഴി കേരളത്തിന്റെ തീരത്ത്നിന്ന് അകന്ന് പോയാല് കാലവര്ഷ പ്രഖ്യാപനവും വൈകാന് സാധ്യതയുണ്ട്. കേരളത്തില് ഇടവിട്ടുള്ള മഴ വരും ദിവസങ്ങളിലും ലഭിച്ചേക്കുമെന്നും രാജീവന് എരിക്കുളം പറഞ്ഞു.
