തിരുവനന്തപുരം: സേവനത്തിനിടെ വീരമൃത്യുവരിച്ച സൈനികരുടെയും അര്ദ്ധസൈനികരുടെയും മക്കള്ക്ക് സൗജന്യ പരിശീലനം നല്കുമെന്നും ഇതുസംബന്ധിച്ച് സൈന്യവുമായും അര്ദ്ധസൈനിക വിഭാഗങ്ങളുമായും ധാരണാപത്രം ഒപ്പിട്ടെന്നും ആകാശ് എജ്യൂക്കേഷണല് സര്വീസസ് ലിമിറ്റഡ് എംഡി ചന്ദ്രശേഖര് ഗരിസ റെഡ്ഡി അറിയിച്ചു.
രാജ്യത്തെമ്പാടുമുള്ള സേനാംഗങ്ങള്ക്കും അവരുടെ കുടുംബാംഗങ്ങള്ക്കും വിദ്യാഭ്യാസ സൗകര്യവും ക്ഷേമവും ഉറപ്പുവരുത്തുക എന്ന ലക്ഷ്യത്തോടെ ബിഎസ്എഫ്, സിആര്പിഎഫ്, ഇന്ഡോ-ടിബറ്റന് ബോര്ഡര് പോലീസ് എന്നിവ ഉള്പ്പെടെ സൈന്യത്തെയും അര്ദ്ധസൈനികവിഭാഗങ്ങളെയും ഉള്പ്പെടുത്തിയാണ് ധാരണാപത്രം ഒപ്പിട്ടത്.
വീരമൃത്യുവരിച്ച സേനാംഗങ്ങളുടെ മക്കള്ക്ക് ട്യൂഷന് ഫീസ് ഒഴിവാക്കി രജിസ്ട്രേഷന് ഫീസ് മാത്രം ഈടാക്കും. 20 ശതമാനത്തിലേറെ വൈകല്യം സംഭവിച്ച സൈനികരുടെ മക്കള്ക്കും ട്യൂഷന് ഫീസ് ഒഴിവാക്കും. സേവനത്തിലുള്ളവരുടെയും വിരമിച്ചവരുടെയും മക്കള്ക്കും നിശ്ചിത ശതമാനം ഫീസിളവുണ്ടാകും. അക്കാദമിക് മെന്ററിങ്ങും കരിയര് കൗണ്സലിങ്ങും, ദേശീയതല സ്കോളര്ഷിപ്പ് പരീക്ഷകള്, ആകാശ് സെന്ററുകളിലെ വിലയിരുത്തല് സൗകര്യങ്ങള്, ദീര്ഘകാല അക്കാദമിക് പിന്തുണ പദ്ധതികള് തുടങ്ങിയ അധിക പിന്തുണ പദ്ധതികളുണ്ടാകുമെന്നും ചന്ദ്രശേഖര് ഗരിസ റെഡ്ഡി പറഞ്ഞു.
