തിരുവനന്തപുരം: സര്‍ക്കാരിനെതിരെ എസ്എഫ്‌ഐയുടെ പ്രതിഷേധങ്ങളെ പരിഹസിച്ച് ആഭ്യന്തരമന്ത്രി രമേശ് ചെന്നിത്തല.നടക്കുന്നത് എസ്എഫ്‌ഐയുടെ എക്‌സര്‍സൈസ് ആണെന്നാണ് മന്ത്രിയുടെ പരിഹാസം.
ഭരണം മാറിയപ്പോള്‍ പ്രതികരണശേഷി ഉണ്ടെന്ന് തെളിയിക്കുകയാണ്. സംയമനം പാലിക്കണമെന്ന പൊലീസിന് നിര്‍ദേശം നല്‍കിയിട്ടുണ്ട്. ഒന്നിനും സമമായിട്ടില്ലെന്നും ഇനിയും സമയമുണ്ടെന്നും ചെന്നിത്തല പറഞ്ഞു.
ഞങ്ങള്‍ കയറിയിട്ട് കുറച്ച് ദിവസമല്ലേ ആയുള്ളൂ. എസ്എഫ്ഐക്കാരും സിപിഎമ്മും കുറച്ച് ക്ഷമിക്കണം. പത്ത് വര്‍ഷം ഭരിച്ചവരല്ലേ. ജനങ്ങള്‍ ഇതെല്ലാം കാണുന്നുണ്ടെന്നും ആഭ്യന്തരമന്ത്രി പറഞ്ഞു. പിണറായിയുടെ ഗണ്‍മാന്‍ ഉള്‍പ്പെടെ സുരക്ഷാ ഉദ്യോഗസ്ഥര്‍ക്കെതിരായ നടപടിയിലും മന്ത്രി പ്രതികരിച്ചു. കോടതി നിര്‍ദേശപ്രകാരമാണ് എസ്‌ഐടി രൂപീകരിച്ചത്. എസ്‌ഐടിയുടെ റിപ്പോര്‍ട്ട് പരിഗണിച്ചാണ് അഞ്ചുപേര്‍ക്കെതിരായ നടപടി. സ്വാഭാവിക നടപടി മാത്രമാണെന്നും നടപടിക്ക് പിന്നില്‍ രാഷ്‌ട്രീയമില്ലെന്നും മന്ത്രി അവകാശപ്പെട്ടു. നിയമം നിയമത്തിന്റെ വഴിക്ക് പോകും.
കേരള സര്‍വകലാശാല തിരഞ്ഞെടുപ്പ് വിജയാഘോഷത്തിനിടെ കഴിഞ്ഞ രാത്രി തിരുവനന്തപുരത്ത് എസ് എഫ് ഐ- കെ എസ് യു പ്രവര്‍ത്തകര്‍ ഏറ്റുമുട്ടിയിരുന്നു. പൊലീസ് ഈ സമയം ഏകപക്ഷീയമായി പെരുമാറിയെന്നാരോപിച്ചാണ് ഇന്ന് സംസ്ഥാന വ്യാപകമായി എസ്എഫ്ഐ പ്രതിഷേധിച്ചത്. തിരുവനന്തപുരത്തെ സെക്രട്ടേറിയറ്റ് മാര്‍ച്ചില്‍ ഉള്‍പ്പെടെ സംഘര്‍ഷമുണ്ടായി. മലപ്പുറത്തും തൃശൂരും ആലപ്പുഴയിലും പ്രവര്‍ത്തകരും പൊലീസുമായി ഏറ്റുമുട്ടി. തിരുവനന്തപുരത്തെ സംഘര്‍ഷത്തില്‍ സംസ്ഥാന പ്രസിഡന്റ് എം ശിവപ്രസാദ് ഉള്‍പ്പെടെ പത്ത് എസ്എഫ്ഐ പ്രവര്‍ത്തകര്‍ക്ക് എതിരെ കേസെടുത്തു.
