2014 മെയ് 26ന് ഭാരതത്തിന്റെ 14-ാമത് പ്രധാനമന്ത്രിയായി നരേന്ദ്ര മോദി സത്യപ്രതിജ്ഞ ചെയ്തു. ഭാരതത്തിന്റെ വര്ത്തമാനവും ഭാവിയും അന്നുമുതല് മാറ്റിയെഴുതുകയായിരുന്നു. ഭൂമി മുതല് ആകാശം വരെ, കര മുതല് കടല് വരെ സമഗ്രമേഖലകളിലും പരിവര്ത്തനത്തിന്റെ നാളുകള്.
അടല് ബിഹാരി വാജ്പേയിയുടെ നേതൃത്വത്തിലുള്ള എന്ഡിഎ സര്ക്കാര് നടപ്പാക്കിയ പദ്ധതികളുടെ തുടര്ച്ചയായിരുന്നു ചിലതെങ്കില് അതില് നിന്നുള്ള പ്രചോദനം മറ്റ് ചില പദ്ധതികളില് കാണാം. ക്ഷേമസംരംഭങ്ങളില് വഴിത്തിരിവായ പ്രധാനമന്ത്രി ജന്ധന് യോജന, പ്രധാനമന്ത്രി ആവാസ് യോജന, സ്വച്ഛ് ഭാരത് മിഷന്, പ്രധാനമന്ത്രി ഉജ്ജ്വല് യോജന, കിസാന് സമ്മാന് നിധി തുടങ്ങിയ നിരവധി പദ്ധതികളിലൂടെ നരേന്ദ്ര മോദി എല്ലാ വിഭാഗം ജനങ്ങളുടേയും ക്ഷേമം ഉറപ്പാക്കി.
രാമക്ഷേത്രം, ആര്ട്ടിക്കിള് 370, മുത്തലാഖ്
അയോദ്ധ്യയിലെ രാമക്ഷേത്ര നിര്മാണവും ജമ്മുകശ്മീരിലെ ആര്ട്ടിക്കിള് 370 റദ്ദാക്കിയതും മുത്തലാഖ് നിരോധന നിയമവും സിഎഎയുമെല്ലാം മോദി സര്ക്കാര് നടപ്പാക്കിയ സുപ്രധാന തീരുമാനങ്ങളില് ചിലത് മാത്രം. സ്വാതന്ത്ര്യത്തിന്റെ 75-ാം വാര്ഷികത്തിന്റെ ഭാഗമായി നടത്തിയ വിവിധ പരിപാടികളിലൂടെ ഭഗവാന് ബിര്സമുണ്ട, അഹല്യഭായ് ഹോള്ക്കര് അടക്കം നിരവധി ദേശീയ നായകരെ സമൂഹത്തിന്റെ ശ്രദ്ധയിലേക്ക് കൊണ്ടുവന്നു.
സൈനിക ശക്തിയുടെ ഉണര്വ്
ഉറി, പഹല്ഗാം ഭീകരാക്രമണങ്ങള്ക്ക് തിരിച്ചടിയായി നടത്തിയ സര്ജിക്കല് സ്ട്രൈക്കുകള് കഴിഞ്ഞ 12 വര്ഷത്തിനിടെ ഭാരതത്തിന്റെ സൈനിക ശക്തിയുടെ ഉണര്വിന്റെ പ്രതീകങ്ങളായി. രാജ്യത്തിന്റെ അതിര്ത്തികാക്കുന്ന സൈനികര്ക്കൊപ്പം സമയം ചെലവഴിക്കാന് പ്രധാനമന്ത്രി നരേന്ദ്ര മോദി തന്നെ പലപ്പോഴും നേരിട്ടെത്തി. സൈനികരില് അഭിമാനമുയര്ന്നു. ഇന്ന് പ്രതിരോധ രംഗത്ത് ഭാരതം തദ്ദേശീയമായി നിര്മിക്കുന്ന യുദ്ധവിമാനങ്ങളും മിസൈലുകളും വാങ്ങാന് നിരവധി രാജ്യങ്ങള് കാത്തു നില്ക്കുന്നു.
ഭാരതത്തിനുനേരെ വെല്ലുവിളി ഉയര്ത്തുന്നത് ആരായാലും അവര്ക്ക് തക്കതായ മറുപടി നല്കുമെന്ന് മോദി സര്ക്കാര് തെളിയിച്ചുകൊണ്ടേയിരിക്കുന്നു, അത് അകത്തുനിന്നുള്ളവര് ആയാലും പുറത്തു നിന്നുള്ളവര് ആയാലും ചോദ്യംചെയ്യപ്പെടാതെ പോകില്ലെന്നതും ഈ കാലയളവിനുള്ളില് രാജ്യം കണ്ടു. സര്ജിക്കല് സ്ട്രൈക്കും എയര് സ്ട്രൈക്കും ഓപ്പറേഷന് സിന്ദൂറും അടക്കമുള്ള നടപടികള് ഇതിന്റെ ഭാഗമാണ്. രാജ്യത്തിന്റെ പരമാധികാരത്തെ വെല്ലുവിളിക്കാന് ശ്രമം നടത്തിക്കൊണ്ടിരുന്ന മാവോയിസ്റ്റുകളും മോദി സര്ക്കാരിന് കീഴില് നിശ്ചലമായി. പോപ്പുലര്ഫ്രണ്ട് അടക്കമുള്ള സംഘടനകളെ നിരോധിച്ചു.
അഭിമാനമുയര്ത്തി, ഭാരതം ലോകശക്തിയായി
ലോകരാജ്യങ്ങള്ക്കിടയില് നരേന്ദ്ര മോദി ഭാരതത്തിന്റെ പ്രശസ്തി ഉയര്ത്തി. ഏത് പ്രതിസന്ധി ഘട്ടത്തിലും സഹായഹസ്തം നീട്ടി ആദ്യമെത്തുന്ന രാജ്യമായി ഭാരതം. കൊവിഡ് കാലത്ത് നൂറിലധികം രാജ്യങ്ങളിലേക്ക് പ്രതിരോധമരുന്നുകള് എത്തിച്ചു. ത്രിവര്ണ പതാക പാറിക്കളിക്കുന്ന വാഹനങ്ങളില് യുദ്ധഭൂമിയില് നിന്നുപോലും ഭാരതപൗരന്മാരെ രക്ഷപ്പെടുത്തി കൊണ്ടുവന്നു.
എന്ഡിഎയുടെ രാഷ്ട്രീയ മുന്നേറ്റം
നല്കിയ വാഗ്ദാനങ്ങള് പാലിച്ചതിലൂടെ മോദിക്കൊപ്പം ജനങ്ങളും ഉറച്ചുനിന്നു. തുടര്ച്ചയായ മൂന്നാംതവണയും എന്ഡിഎ മുന്നണിയെ ജനം അധികാരത്തിലേറ്റി. നിയമസഭകളിലേക്കും തദ്ദേശസ്വയംഭരണ സ്ഥാപനങ്ങളിലേക്കും നടക്കുന്ന തെരഞ്ഞെടുപ്പുകളിലും ബിജെപി നേതൃത്വം നല്കുന്ന എന്ഡിഎ മുന്നണിയുടെ വിജയരഥം പ്രയാണം തുടര്ന്നുകൊണ്ടേയിരിക്കുന്നു. 2014ല് എന്ഡിഎ സര്ക്കാര് കേന്ദ്രത്തില് അധികാരത്തില് എത്തുമ്പോള് ഏഴ് സംസ്ഥാനങ്ങളിലായിരുന്നു മുന്നണിക്ക് ഭരണം. എന്നാലിത് മോദിയുടെ നേതൃത്വത്തില് 21 ആയി ഉയര്ന്നു.
ജന്മഭൂമി ഓണ്ലൈന്