ഭാരതത്തിന്റെ പ്രധാനമന്ത്രിയായി നരേന്ദ്ര മോദിയുടെ പന്ത്രണ്ട് വര്ഷത്തെ യാത്ര രാജ്യത്തിന്റെ മാത്രമല്ല, ലോകത്തിന്റെ തന്നെ ഭരണ ചരിത്രത്തില് സമാനതകളില്ലാത്തതാണ്. മോദി പ്രഭാവം രാഷ്ട്രീയ പ്രതിഭാസം മാത്രമല്ല. ലോകവേദിയിലെ ഭാരതത്തിന്റെ ഉയിര്ത്തെഴുന്നേല്പ്പുമായും അത് ബന്ധപ്പെട്ടിരിക്കുന്നു.
നരേന്ദ്ര മോദി ഒരു പുതിയ തരത്തിലുള്ള രാഷ്ട്രീയ നേതാവാണ്. വാക്കും പ്രവൃത്തിയും ഒന്നുചേരുന്ന ഒരാള്. കൃത്യമായ ആശയവിനിമയത്തിലൂടെ ജനതയെ ഒപ്പം നിര്ത്താന് അപാര ശേഷിയുള്ളയാള്. ഗുജറാത്ത് മുഖ്യമന്ത്രിയായിരുന്ന കാലത്തു രാജ്യം തിരിച്ചറിഞ്ഞ ഈ സവിശേഷതകള് പ്രധാനമന്ത്രിയായതോടെ ലോകവും അംഗീകരിക്കുകയായിരുന്നു. ഗുജറാത്ത് ഭരണകാലത്തുതന്നെ ഭരണനിര്വഹണം, അടിസ്ഥാന സൗകര്യ വികസനം, വ്യവസായ വളര്ച്ച എന്നിവയില് ശക്തമായി ശ്രദ്ധ കേന്ദ്രീകരിച്ച നേതാവായിരുന്നു മോദി. ‘ഗുജറാത്ത് മോഡല്’ എന്നറിയപ്പെട്ട തിളങ്ങുന്ന പ്രതിച്ഛായയോടെയാണ് ഈ രാഷ്ട്രീയ നായകന് ദേശീയ രാഷ്ട്രീയത്തിലേക്ക് ഉയര്ന്നതും പ്രധാനമന്ത്രിയായതും.
രാജ്യത്തിന്റെ വര്ത്തമാന കാലവും ഭാവിയുമായി ബന്ധപ്പെട്ട് എടുത്ത നിര്ണായക തീരുമാനങ്ങളാണ് മോദിയെ ജനനായകനാക്കിയത്. രാഷ്ട്രീയ നേതാക്കള് തീരുമാനങ്ങള് വൈകിപ്പിക്കുകയോ കൂട്ടിക്കിഴിക്കലുകളില് കുടുങ്ങുകയോ ചെയ്യുമ്പോള് മോദി അതിന്റെ വിപരീത ദിശയിലാണ് സഞ്ചരിച്ചത്. തീരുമാനങ്ങള് ധൈര്യമായി എടുക്കാനും, വേഗത്തില് മുന്നോട്ട് പോകാനും മോദിക്ക് കഴിഞ്ഞു. ഡിജിറ്റല് ഇന്ത്യ, മേക്ക് ഇന് ഇന്ത്യ, സ്റ്റാര്ട്ടപ്പ് ഇന്ത്യ, സ്വച്ഛ് ഭാരത് എന്നിവ ഉള്പ്പെടെ നിരവധി വലിയ പദ്ധതികള് മോദി സര്ക്കാര് ആരംഭിച്ചു. ദേശീയപാതകള്, റെയില്വേ, വിമാനത്താവളങ്ങള്, ഡിജിറ്റല് അടിസ്ഥാന സൗകര്യങ്ങള് എന്നിവയിലെ ദീര്ഘകാല വികസനത്തിലും കാര്യനിര്വഹണത്തിലും ശ്രദ്ധ കേന്ദ്രീകരിച്ച സര്ക്കാരാണിത്. മോദിയെ പോലെ വലിയ സ്വപ്നങ്ങള് കാണുകയും, അവ സാക്ഷാത്ക്കരിക്കാന് കഠിനമായി ശ്രമിക്കുകയും വിജയിക്കുകയും ചെയ്ത മറ്റൊരു പ്രധാനമന്ത്രിയില്ല.
ജനങ്ങളുമായി നേരിട്ടു ബന്ധം സ്ഥാപിച്ച നരേന്ദ്ര മോദിയുടെ മനസ്സിനെ ഭരിക്കുന്നത് വികസനം, ജനക്ഷേമം എന്നീ ആശയങ്ങളാണ്. ജനങ്ങളുടെ മനോഭാവം ഈ ഭരണാധികാരിക്ക് പെട്ടെന്ന് മനസ്സിലാവുന്നു. ജനങ്ങളുമായി മാനസികമായി പൊരുത്തപ്പെടാനും കഴിയുന്നു. ഇതിനുള്ള ഭാഷയും ശരീരഭാഷയും സഹജമാണ്. സബ്കാ സാഥ് സബ്കാ വികാസ്, ആത്മനിര്ഭര് ഭാരത്, വോക്കല് ഫോര് ലോക്കല് പോലുള്ള മുദ്രാവാക്യങ്ങള് പൊതുചര്ച്ചകളുടെ ഭാഗമായത് ഇതുകൊണ്ടാണ്. മന് കി ബാത് പോലുള്ള പരിപാടികളിലൂടെയും, സമൂഹ മാധ്യമങ്ങളിലൂടെയും മോദി ജനങ്ങളുമായി സ്ഥിരമായ ആശയവിനിമയം നിലനിര്ത്തി. ഡിജിറ്റല് പ്രചാരണത്തിന്റെ ശക്തി മനസ്സിലാക്കി ഫലപ്രദമായി ഉപയോഗിച്ച ഭാരതത്തിലെ ആദ്യ പ്രധാനമന്ത്രിയാണ് മോദി.
ഭാരതത്തിന്റെ വിജയകരമായ ജി 20 അധ്യക്ഷസ്ഥാനവും ഈ പ്രതിച്ഛായയെ കൂടുതല് ശക്തിപ്പെടുത്തി. മോദിയുടെ നേതൃത്വത്തില് രാജ്യം ആഗോള വേദിയില് കേന്ദ്രസ്ഥാനത്തെത്തുന്നത് ഭാരതത്തെ സ്നേഹിക്കുന്നവര്ക്കെല്ലാം അഭിമാനമായി മാറി. ഈ കാലത്ത് അന്താരാഷ്ട്ര രംഗത്ത് ഭാരതം നേടിയെടുത്ത പ്രാധാന്യം മോദി സമ്മാനിച്ചതാണ്. ഭാരതത്തിന്റെ ശത്രുക്കളെയും മിത്രങ്ങളെയും, ശത്രുക്കളായി മാറുന്ന മിത്രങ്ങളെയും എങ്ങനെ നേരിടണമെന്ന് മോദിക്കറിയാം.
അദ്ദേഹത്തിന്റെ പ്രതിച്ഛായ ശക്തമാക്കുന്ന മറ്റൊരു ഘടകം വ്യക്തിപരമായ അച്ചടക്കമാണ്. യോഗയോടുള്ള പ്രതിബദ്ധത, ദീര്ഘനേരം ജോലി ചെയ്യുന്ന ശീലം, ഊര്ജസ്വലമായ പൊതുപരിപാടികള് എന്നിവ ഇതിനു തെളിവാണ്. പ്രധാനമന്ത്രിയായി തുടര്ന്ന ഇക്കാലമത്രയും ദേഹാസ്വാസ്ഥ്യം മൂലം ഒരിക്കല്പ്പോലും ആശുപത്രിയില് പോകാത്ത വേറൊരു ഭരണാധികാരിയില്ല. ഇങ്ങനെയൊരു നേതാവിനെ ജനങ്ങള് ഇഷ്ടപ്പെടാതിരിക്കില്ലല്ലോ. സാധാരണ സാഹചര്യങ്ങളില് നിന്ന് ഉയര്ന്നുവന്ന് ലോകത്തിലെ ഏറ്റവും വലിയ ജനാധിപത്യ രാജ്യത്തിന്റെ പ്രധാനമന്ത്രിയായ നരേന്ദ്ര മോദി ജനങ്ങള്ക്ക് പ്രതീക്ഷയുടെയും സാധ്യതയുടെയും ബോധവും പുതിയൊരു ലോകവും സമ്മാനിക്കുകയായിരുന്നു. ആഗ്രഹങ്ങളെയും ലക്ഷ്യങ്ങളെയും പരിമിതപ്പെടുത്തേണ്ടതില്ല എന്ന സന്ദേശമാണ് യുവഭാരതത്തിന് മോദി നല്കുന്നത്.
പ്രധാനമന്ത്രിയായി 12 വര്ഷം പൂര്ത്തിയാക്കിയ ശേഷവും ഭാരതത്തിന്റെ രാഷ്ട്രീയ-ഭരണ രംഗത്ത് മോദിയുടെ സ്വാധീനം തുടരുകയാണ്. ശക്തമായ നേതൃത്വം, ആശയവിനിമയം, വികസനം, ദേശീയ ആത്മവിശ്വാസം എന്നിവയുടെ പ്രതീകമായി ഈ ഭരണാധികാരി നിലകൊള്ളുന്നു. കൂടുതല് വേഗത്തില് വളരാനും, കൂടുതല് വലിയ സ്വപ്നങ്ങള് കാണാനും, ലോകത്തില് കൂടുതല് വലിയ പങ്ക് വഹിക്കാനുമാഗ്രഹിക്കുന്ന, മാറിക്കൊണ്ടിരിക്കുന്ന ഭാരതത്തിന്റെ ആഗ്രഹങ്ങളെ അത് പ്രതിഫലിപ്പിക്കുന്നു.
ജന്മഭൂമി ഓണ്ലൈന്