മോദി സര്ക്കാരിന്റെ ഭരണകാലത്ത് ഭാരതം ശാസ്ത്ര സാങ്കേതിക രംഗത്ത് വലിയ മുന്നേറ്റമാണ് കൈവരിച്ചത്. ഡിജിറ്റല് ഇന്ത്യ, സ്റ്റാര്ട്ടപ്പ് ഇന്ത്യ, ആത്മനിര്ഭര് ഭാരത് തുടങ്ങിയ പദ്ധതികള് സാങ്കേതികവിദ്യയെ ജനങ്ങളിലേക്ക് എത്തിച്ചു. കൃത്രിമ ബുദ്ധി, സെമികണ്ടക്ടര്, ക്വാണ്ടം സാങ്കേതികവിദ്യ, ബഹിരാകാശ ഗവേഷണം, ബയോ ടെക്നോളജി തുടങ്ങിയ മേഖലകളില് ഭാരതം കൂടുതല് ശക്തമായി മുന്നേറുകയാണ്. ഗവേഷണ സ്ഥാപനങ്ങള്ക്കും സ്റ്റാര്ട്ടപ്പുകള്ക്കും സര്ക്കാര് കൂടുതല് പിന്തുണ നല്കുകയും ചെയ്തു.
ഐഎസ്ആര്ഒ വികസിപ്പിച്ചെടുത്ത സ്വതന്ത്രവും തദ്ദേശീയവുമായ ഉപഗ്രഹ നാവിഗേഷന് സംവിധാനമായ നാവിക് (NavIC നാവിഗേഷന് വിത്ത് ഇന്ത്യന് കോണ്സ്റ്റലേഷന്) എന്ന ഭാരതത്തിന്റെ സ്വന്തം ഉപഗ്രഹ നാവിഗേഷന് സംവിധാനം രാജ്യത്തിന്റെ വലിയ നേട്ടമാണ്. വിദേശ സംവിധാനങ്ങളിലേക്കുള്ള ആശ്രയത്വം കുറയ്ക്കാന് ഇതിലൂടെ കഴിഞ്ഞു.
പിഎസ്എല്വി, ജിഎസ്എല്വി, ലോഞ്ച് വെഹിക്കിള് മാര്ക്ക്3 (LVM3) എന്നീ വിക്ഷേപണ വാഹനങ്ങളിലൂടെ ഭാരതം ലോകത്തിന്റെ വിശ്വാസം നേടിയെടുത്തു. ചന്ദ്രയാന് 3 ദൗത്യത്തിലൂടെ ചന്ദ്രന്റെ ദക്ഷിണ ധ്രുവത്തിനടുത്ത് വിജയകരമായി ഇറങ്ങിയ ആദ്യ രാജ്യമായി. ആദിത്യ L1, ഗഗന്യാന് പദ്ധതി, SSLV തുടങ്ങിയ പദ്ധതികള് ബഹിരാകാശ ശേഷി കൂടുതല് ഉയര്ത്തി. സ്വകാര്യ കമ്പനികള്ക്കും ബഹിരാകാശ മേഖലയിലേക്ക് പ്രവേശനം നല്കിയത് വലിയ മാറ്റമായി.
പ്രതിരോധ മേഖലയില് സ്വയം പര്യാപ്തതയിലേക്ക് ശക്തമായി മുന്നേറുകയാണ്. മേക്ക് ഇന് ഇന്ത്യ പദ്ധതിയിലൂടെ ആയുധങ്ങളും പ്രതിരോധ ഉപകരണങ്ങളും ഭാരതത്തില്ത്തന്നെ നിര്മിക്കാന് കൂടുതല് പ്രാധാന്യം നല്കി. മിസൈല് സാങ്കേതികവിദ്യ, ഡ്രോണ്, യുദ്ധവിമാനങ്ങള്, നാവിക പ്രതിരോധ സംവിധാനങ്ങള് എന്നിവയില് വലിയ പുരോഗതി കൈവരിച്ചു. പ്രതിരോധ കയറ്റുമതിയിലും ശ്രദ്ധേയമായ വളര്ച്ച നേടി.
മുന്പ് വിദേശ രാജ്യങ്ങളെ ആശ്രയിച്ചിരുന്ന പല മേഖലകളിലും സ്വന്തം സാങ്കേതികവിദ്യ വികസിപ്പിക്കുന്ന രാജ്യമായി മാറിയിരിക്കുന്നു ഭാരതം. ഉപഗ്രഹങ്ങള്, മിസൈല് സംവിധാനങ്ങള്, പ്രതിരോധ ഉപകരണങ്ങള്, ഡിജിറ്റല് പ്ലാറ്റ്ഫോമുകള്, വാക്സിന് നിര്മാണം തുടങ്ങിയ മേഖലകളില് സ്വാശ്രയത്വം വര്ദ്ധിച്ചു. ആത്മനിര്ഭര് ഭാരത് പദ്ധതിയിലൂടെ സ്വദേശീയ ഉല്പ്പാദനത്തിന് വലിയ പ്രോത്സാഹനം ലഭിച്ചു.
ഐഎസ്ആര്ഒ, ഡിആര്ഡിഒ, സിഎസ്ഐആര്, ഐഐടികള്, ഐഐഎസ്സി സര്വകലാശാലകള് തുടങ്ങിയ സ്ഥാപനങ്ങള് രാജ്യത്തിന്റെ വികസനത്തിന് വലിയ പിന്തുണ നല്കുന്നു. ദുരന്തനിവാരണം, കാലാവസ്ഥാ നിരീക്ഷണം, ആരോഗ്യ രംഗം, കൃഷി, പ്രതിരോധം, ഡിജിറ്റല് സുരക്ഷ തുടങ്ങിയ മേഖലകളില് ഗവേഷണ ഫലങ്ങള് സര്ക്കാര് നയങ്ങള്ക്കും പദ്ധതികള്ക്കും സഹായകരമാകുന്നു. ഗവേഷണവും പ്രായോഗിക ഉപയോഗവും തമ്മിലുള്ള ബന്ധം കൂടുതല് ശക്തമായിട്ടുണ്ട്.
ഇന്ന് ഭാരതത്തെ ലോകം ഒരു സാങ്കേതിക ശക്തിയായി കാണുന്നു. കുറഞ്ഞ ചെലവില് വിശ്വാസ്യതയുള്ള ബഹിരാകാശ ദൗത്യങ്ങള് നടത്താന് കഴിയുന്ന രാജ്യമെന്ന നിലയില് വലിയ അംഗീകാരം ലഭിച്ചു. പ്രതിരോധ കയറ്റുമതി, ഡിജിറ്റല് സാങ്കേതികവിദ്യ, വാക്സിന് വികസനം, ശാസ്ത്ര ഗവേഷണം തുടങ്ങിയ മേഖലകളില് സ്വാധീനം വര്ദ്ധിച്ചു. ചന്ദ്രയാന് 3 ഉള്പ്പെടെയുള്ള നേട്ടങ്ങള് ഭാരതത്തിന്റെ ആഗോള പ്രതിച്ഛായയെ കൂടുതല് ശക്തമാക്കി.
ജന്മഭൂമി ഓണ്ലൈന്