കോഴിക്കോട്: രാഷ്ട്രത്തിന്റെ സ്വത്വം ജനജീവിതത്തില് ആവിഷ്കരിക്കാനാണ് രാഷ്ട്രീയ സ്വയംസേവക സംഘം പ്രവര്ത്തിച്ചതെന്ന് ആര്എസ്എസ് അഖിലഭാരതീയ പ്രചാര് പ്രമുഖ് സുനില് ആംബേക്കര് പറഞ്ഞു. സംഘ ശതാബ്ദി പരിപാടികളുടെ ഭാഗമായി ആര്എസ്എസ് കോഴിക്കോട് മഹാനഗരം സംഘടിപ്പിച്ച പൗരപ്രമുഖ സംഗമത്തില് സംസാരിക്കുകയായിരുന്നു അദ്ദേഹം.
ഇനിയൊരു വിഭജനം രാഷ്ട്രം അംഗീകരിക്കാത്തവണ്ണം സമൂഹം ശക്തിയാര്ജിച്ചിരിക്കുന്നു. നൂറു വര്ഷത്തെ സംഘയാത്ര ഈ ലക്ഷ്യപൂര്ത്തിയിലേക്കാണ് നീങ്ങുന്നത്. ദേശീയ ഐക്യത്തിനായുള്ള ഈ മുന്നേറ്റത്തില് സംഘ പ്രവര്ത്തകര് മാത്രമല്ല സമൂഹത്തിന്റെയും സജീവ പങ്കാളിത്തമുണ്ട്. സാമൂഹ്യ സമരസത, കുടുംബ ശാക്തീകരണം, സ്വദേശീ ആചരണം, പരിസ്ഥിതി സംരക്ഷണം, സമൂഹത്തിന്റെ ധാര്മ്മിക കടമ നിര്വ്വഹണം എന്നിവയിലൂടെ ഇനിയും രാഷ്ട്രത്തിന് ഏറെ മുന്നേറാനുണ്ട്. സാമൂഹ്യ നേതൃത്വം എല്ലാ മേഖലകളിലും ഇക്കാര്യത്തിന് ഒരുമിച്ച് പങ്ക് വഹിക്കണം.
സാമാന്യ ജനസമൂഹത്തില് ദേശീയ ആത്മാവിനെ ആവിഷ്കരിക്കാനുള്ള പ്രവര്ത്തനമാണ് കഴിഞ്ഞ നൂറു വര്ഷമായി ആര്എസ്എസ് നടത്തിവരുന്നത്. ചിരകാലമായി ഭാരതം നേരിട്ട അടിമത്തം അവസാനിപ്പിക്കേണ്ടത് കേവലം രാഷ്ട്രീയ പ്രക്രിയയിലൂടെ മാത്രമല്ല മറിച്ച് സാംസ്കാരികവും ദേശീയവുമായ സ്വാതന്ത്ര്യം ആര്ജിക്കുന്നതിലൂടെയാണെന്ന് ഡോ. ഹെഡ്ഗേവാര് തിരിച്ചറിഞ്ഞു. ദേശീയ ചാരിത്ര്യം വീണ്ടെടുക്കണമെങ്കില് ജനമനസില് മാറ്റം വരണം. വ്യക്തിനിര്മാണ പ്രക്രിയയിലൂടെ സാമൂഹ്യ പരിവര്ത്തനം സാധ്യമാകുമെന്ന് അദ്ദേഹം വിശ്വസിച്ചു. ഏതെങ്കിലും നേതാവിനോ സര്ക്കാരിനോ ജനതയില് ദേശസ്നേഹം അടിച്ചേല്പ്പിക്കാനാവില്ല. വൈദേശിക വിദ്യാഭ്യാസം അടിച്ചേല്പ്പിച്ച അടിമത്തില് നിന്ന് ജനത മുക്തമാവണം. തലമുറകളിലൂടെ നീണ്ട നിരന്തര പ്രക്രിയയിലൂടെ സമൂഹത്തില് മാറ്റമുണ്ടായി. തന്റെ ജീവിതകാലത്തേക്കുള്ള പദ്ധതിയല്ല ഡോ. ഹെഡ്ഗേവാര് ആവിഷ്കരിച്ചത്. കഴിഞ്ഞ നൂറു വര്ഷമായി സംഘം ഈ മാര്ഗത്തിലാണ് ചരിക്കുന്നത്. രാമക്ഷേത്ര പുനര്നിര്മാണമടക്കം ദേശീയ മുന്നേറ്റത്തിന്റെ പ്രതീകമായാണ് സംഘം വിഭാവനം ചെയ്തതെന്നും സുനില് ആംബേക്കര് പറഞ്ഞു.
കോഴിക്കോട് വിഭാഗ് സംഘചാലക് യു. ഗോപാല് മല്ലര്, മഹാനഗര് സംഘചാലക് ഡോ. സി.ആര്. മഹിപാല് എന്നിവര് സംബന്ധിച്ചു.
