പുതുച്ചേരി: ബാസ്കറ്റ്ബോള് ഫെഡറേഷന് ഓഫ് ഇന്ത്യയും (ബിഎഫ്ഐ) പോണ്ടിച്ചേരി ബാസ്കറ്റ്ബോള് അസോസിയേഷനും (പിബിഎ) സംയുക്തമായി സംഘടിപ്പിക്കുന്ന 76-ാമത് ജൂനിയര് നാഷണല് ബാസ്കറ്റ്ബോള് ചാമ്പ്യന്ഷിപ്പില് കേരള വനിതകള്ക്ക് തുടര്ച്ചയായ മൂന്നാം വിജയം.
ഗ്രൂപ്പ് ഘട്ടത്തിലെ ലീഗ് മത്സരങ്ങള് ഇന്ന് കൂടി തുടരും. അതിന് ശേഷമേ നാളെ ആരംഭിക്കുന്ന പ്രീ-ക്വാര്ട്ടര്, ക്വാര്ട്ടര് ഫൈനല് മത്സരങ്ങളുടെ അന്തിമ ലൈനപ്പ് വ്യക്തമാകൂ.
ഗ്രൂപ്പ് ബി-യിലെ ആവേശകരമായ മത്സരത്തില് കഴിഞ്ഞ വര്ഷത്തെ റണ്ണേഴ്സ് അപ്പായ ഗുജറാത്തിനെ 59-30 എന്ന സ്കോറിനാണ് കേരള വനിതകള് തകര്ത്തത്. കേരളത്തിന് വേണ്ടി 18 പോയിന്റ് നേടിയ സുഭദ്ര ജയകുമാര് മികച്ച പ്രകടനം പുറത്തെടുത്തു. ഈ തോല്വിയോടെ ഗുജറാത്ത് ലെവല് 1-ല് നിന്ന് പുറത്തായി. ഗ്രൂപ്പിലെ മൂന്ന് മത്സരങ്ങളും വിജയിച്ച കേരള വനിതകള് ശക്തമായ ഫോമിലാണ്.
ഞായറാഴ്ച രാത്രി വൈകി നടന്ന മത്സരത്തില് കേരള പുരുഷ ടീം ഡല്ഹിയോട് 55-59 എന്ന സ്കോറിന് നേരിയ വ്യത്യാസത്തില് പരാജയപ്പെട്ടിരുന്നു. കേരളത്തിന് വേണ്ടി നൈജല് ജേക്കബ് 12 പോയിന്റും അഭിഷേക് പി. പ്രദീപ് 10 പോയിന്റും നേടി. ദല്ഹിയുടെ മുഹമ്മദ് സൈന് ഗൗരി (24 പോയിന്റ്) ആണ് കേരളത്തിന്റെ വിജയവഴി തടഞ്ഞത്. എങ്കിലും, ഗ്രൂപ്പ് എ-യില് നിന്ന് മൂന്ന് ടീമുകള്ക്ക് അടുത്ത ഘട്ടത്തിലേക്ക് യോഗ്യതയുള്ളതിനാല് ആദ്യ രണ്ട് മത്സരങ്ങള് ജയിച്ച കേരള പുരുഷ ടീം നോക്കൗട്ട് സ്ഥാനം ഇതിനകം ഉറപ്പാക്കിക്കഴിഞ്ഞു. ഇന്ന് നടക്കുന്ന കരുത്തരായ തമിഴ്നാടിനെതിരെയുള്ള അവസാന ലീഗ് മത്സരത്തില് പരാജയപ്പെട്ടാല് പോലും കേരളത്തിന് ക്വാര്ട്ടര് ഫൈനലില് പ്രവേശിക്കാന് മികച്ച സാധ്യതകളുണ്ട്.
