ന്യൂദല്ഹി: പണ്ട് യുദ്ധവിമാനങ്ങള് ശത്രുവിന്റെ ലക്ഷ്യസ്ഥാനത്തേക്ക് പറന്ന് കൂട്ടത്തോടെ ബോംബുകള് വര്ഷിക്കുകയാണ് പതിവ്. മുപ്പതോ നാല്പതോ ബോംബുകള് വര്ഷിച്ചാല് ഒരെണ്ണം ലക്ഷ്യസ്ഥാനത്ത് പതിച്ചെങ്കില് ആയി. ഇത് ഇന്ത്യയുടെ പ്രതിരോധ ഗവേഷണകേന്ദ്രമായ ഡിആര്ഡിഒയെ ഇരുത്തിച്ചിന്തിപ്പിച്ചു. എന്തിനാണ് ഇതിന് നില്ക്കുന്നത്? കൃത്യമായി ബോംബുകളെ ലക്ഷ്യസ്ഥാനത്തേക്ക് പറത്തിയെത്തിക്കാനുള്ള ഒരു സംവിധാനം ഉണ്ടായാല് ബോംബുകള് പാഴാകുന്നത് കുറയില്ലേ. അങ്ങിനെയാണ് ഗ്ലൈഡ് ബോംബ് സംവിധാനം ഉണ്ടാക്കുന്നത്. ചിറകുള്ള, ലക്ഷ്യസ്ഥാനത്തെ കംപ്യൂട്ടര് അടയാളപ്പെടുത്തുന്ന താര ഗ്ലൈഡ് ബോംബ് സംവിധാനം. ഇത് ബോംബിനെയും വഹിച്ച് ലക്ഷ്യസ്ഥാനത്തേക്ക് പറക്കും.
ബോംബിടാന് യുദ്ധവിമാനം ലക്ഷ്യസ്ഥാനത്തേക്ക് പറക്കേണ്ട
ഇനി വിമാനത്തില് നിന്നും ബോംബിടുമ്പോള് ശത്രുലക്ഷ്യത്തിലേക്ക് വിമാനം പറക്കേണ്ട കാര്യമില്ല. പകരം ആ ബോംബ് താര ഗ്ലൈഡ് ബോംബ് സംവിധാനത്തില് ഘടിപ്പിച്ച് വിട്ടാല് മതി. താര ഗ്ലൈഡ് ബോംബ് ബോംബിനെയും വഹിച്ച് ലക്ഷ്യസ്ഥാനത്തേക്ക് കൃത്യമായി പറന്ന് ചെന്ന് പതിച്ച് സ്ഫോടനമുണ്ടാക്കും. ടാക് ടിക്കല് അഡ്വാന്സ് ഡ് റേഞ്ച് ഓഗ് മെന്റേഷന് (TARA- Tactical Advanced Range Augmentation) എന്നതാണ് താരയുടെ മുഴുവന് നാമം.
പണ്ട് യുദ്ധവിമാനം അതിവേഗം പറന്ന് ചെന്ന് ലക്ഷ്യസ്ഥാനത്തിന് മുകളിലെത്തിയാല് അവിടെ ബോംബ് ചൊരിയുകയാണ് പതിവ്. കൃത്യസ്ഥാനത്ത് ബോംബ് വീഴുമെന്നതിന് ഒരു ഉറപ്പുമില്ല. ഈ പോരായ്മയാണ് താര ഗ്ലൈഡ് ബോംബ് സംവിധാനത്തില് പരിഹരിക്കുന്നത്.
എന്താണ് താര ഗ്ലൈഡ് ബോംബ് സംവിധാനത്തില് ഉള്ളത്?
ഈ ഗ്ലൈഡ് ബോംബ് സംവിധാനത്തിനകത്ത് ഒരു കണ്ട്രോള് കംപ്യൂട്ടറും പറക്കല് കണിശമാക്കാന് ചെറിയ ചിറകുകളും ടെര്മിനല് സീക്രട്ട് സിസ്റ്റവും ഉണ്ടാകും. ബോംബും വഹിച്ച് കൃത്യമായ ലൊക്കേഷനിലേക്ക് പറക്കുന്നതിന് സഹായിക്കാനാണിത്. എന്തായാലും ലക്ഷ്യസ്ഥാനത്തിന് മൂന്ന് മീറ്റനികത്ത് ഈ ബോംബ് പതിച്ചിരിക്കുമെന്നുറപ്പ്. 150 കിലോഗ്രാം, 250 കിലോഗ്രാം, 500 കിലോഗ്രാം ബോംബുകള് ഇതില് ഘടിപ്പിക്കാം. പൂര്ണ്ണമായും തദ്ദേശീയമായി വികസിപ്പിച്ചതാണ് ഈ താര ഗ്ലൈഡ് ബോംബ് സംവിധാനം.
താര ഗ്ലൈഡ് ബോംബ് സംവിധാനം ബോംബ് പതിക്കേണ്ട ലക്ഷ്യസ്ഥാനം ഇതിലെ കംപ്യൂട്ടറില് കൃത്യമായി അടയാളപ്പെടുത്തി വിട്ടാല് അവിടേക്ക് പറക്കും. ഇതോടെ യുദ്ധവിമാനങ്ങള്ക്ക് തന്ത്രപ്രധാനമായ ശത്രുവിന്റെ ലക്ഷ്യസ്ഥാനത്തേക്ക് പറന്നു ചെല്ലേണ്ട റിസ്കില്ല. അങ്ങിനെ പറന്നുചെന്നാല് വിമാനം അവരുടെ റഡാറില് പതിയാന് സാധ്യതയുണ്ട്. ഇനി അതിന്റെ ആവശ്യമില്ല. ശത്രുവിന്റെ ലക്ഷ്യസ്ഥാനത്തേക്കാള് ഏറെ അകലെ നിന്നു തന്നെ ഗ്ലൈഡ് ബോബ് വിക്ഷേപിച്ചാല് മതി. ഈ താര ഗ്ലൈഡ് ബോംബ് കൃത്യമായി ആ ലക്ഷ്യസ്ഥാനത്തേക്ക് പറന്നിറങ്ങി സ്ഫോടനം നടത്തും. കഴിഞ്ഞ ദിവസം താര ഗ്ലൈഡ് ബോംബില് 500 കിലോഗ്രം ഭാരമുള്ള ബോംബ് ഘടിപ്പിച്ച് നടത്തിയ പരീക്ഷണം വന്വിജയമായി. ഇന്ത്യന് വ്യോമസേനയും ഡിആര്ഡിഒയും സംയുക്തമായാണ് താര ഗ്ലൈഡ് ബോംബ് സംവിധാനം പരീക്ഷിച്ചത്. ഒഡിഷ തീരത്ത് ജാഗ്വാര് യുദ്ധവിമാനത്തിലാണ് താര ഗ്ലൈഡ് ബോംബ് സംവിധാനം പരീക്ഷിച്ചത്. പ്രതിരോധ ഗവേഷണ കേന്ദ്രമായ ഡിആര്ഡിഒ ആണ് താര ഗ്ലൈഡ് ബോംബ് വികസിപ്പിച്ചത്.
