ചെന്നൈ: തമിഴ്നാട്ടില് രാഷ്ട്രീയ നാടകം തുടരുന്നു.എഐഎഡിഎംകെയിലെ വിമതപക്ഷത്ത് നിന്നും കൊഴിഞ്ഞ് പോക്ക്.വിമത പക്ഷത്ത് നിന്ന് മൂന്ന് എംഎല്എമാര് രാജിവച്ച് മുഖ്യമന്ത്രി ജോസഫ് വിജയുടെ നേതൃത്വത്തിലുളള ടിവികെയില് ചേര്ന്നു.
ഈറോഡ് ജില്ലയിലെ പെരുന്ധുരൈ എംഎല്എ എസ്.ജയകുമാര്, ചെങ്കല്പേട്ട് ജില്ലയിലെ മധുരാന്തകം എംഎല്എ മരകതം കുമാരവേല്, തിരുപ്പൂര് ജില്ലയിലെ ധാരാപുരം എംഎല്എ പി.സത്യഭാമ എന്നിവരാണ് രാജിവച്ചത്. രാജിവച്ച മൂന്നുപേരും മന്ത്രിയും ടിവികെ നേതാവുമായ ആദവ് അര്ജുനയെ സന്ദര്ശിച്ചതിന് പിന്നാലെയാണ് ടിവികെയില് ചേര്ന്നത്.
മൂന്ന് എംഎല്എമാര് രാജിവെച്ചതോടെ സഭയിലെ അണ്ണാഡിഎംകെയുടെ അംഗസംഖ്യ 44 ആയി കുറഞ്ഞു. അതേസമയം വിമത പക്ഷത്തെ അഞ്ച് എംഎല്എമാര് ഔദ്യോഗിക പക്ഷത്തിനൊപ്പം വീണ്ടും ചേര്ന്നു.ഇതോടെ വിമത പക്ഷത്ത് 17 പേരും ഇപിഎസ് പക്ഷത്ത് 27 പേരുമായി. 47 എംഎല്എമാരാണ് എഐഎഡിഎംകെയില് ഉണ്ടായിരുന്നത്.ഇതില് വിമതപക്ഷത്തെ എസ്പി വേലുമണിയോടൊപ്പം നിന്നിരുന്ന മൂന്ന് എംഎല്എമാരാണ് രാജിവെച്ചത്.ഇതോടെ മൂന്ന് നിയമസഭാ മണ്ഡലങ്ങളില് ഉപതെരഞ്ഞെടുപ്പ് നടക്കേണ്ട സാഹചര്യമായി. വിജയ് ഒഴിഞ്ഞ തിരുച്ചിറപ്പള്ളി ഈസ്റ്റിലും ഉപതെരഞ്ഞെടുപ്പ് നടക്കാനുണ്ട്.
കൂടുതല് എംഎല്എമാരെ ചാക്കിട്ട് പിടിക്കാന് ടിവികെ ശ്രമിക്കുന്നു എന്നാണ് അറിയുന്നത്.മന്ത്രി ആദവ് അര്ജുനയുടെ നേതൃത്വത്തില് ഇതിനുള്ള ശ്രമങ്ങള് നടക്കുന്നുണ്ടെന്നാണ് റിപ്പോര്ട്ട്.
