കൊച്ചി: അമ്മ സംഘടനയിലെ അൻസിബ- ടിനി ടോം വിവാദത്തിൽ പ്രതികരണവുമായി നടൻ സുധീർ. മറ്റുള്ളവരുടെ പരദൂഷണം പറഞ്ഞ് നടക്കാതെ അറിയാവുന്ന പണി ചെയ്ത് ജീവിക്കാനാണ് സുധീർ പറയുന്നത്. ടിനി ടോമും അൻസിബയും പരസ്പരം ചെളിവാരിയെറിഞ്ഞ് അമ്മ എന്ന സംഘടനയെ നാറ്റിക്കുകയാണ്. തനിക്ക് ഇത് പറയാൻ പേടിയില്ലെന്നും സുധീർ പറയുന്നു.
സുധീറിന്റെ വാക്കുകൾ
എന്തായാലും കൊള്ളാം കേട്ടോ, രാവിലെ എഴുന്നേറ്റ് ഇൻസ്റ്റഗ്രാം തുറന്നപ്പോൾ ടിനി ടോമിന്റെ അഭിമുഖം, ‘ഞാൻ അങ്ങനെയല്ല, ഞാൻ മറ്റേതല്ല’, എന്റെ പൊന്നു ടിനി, നിങ്ങളൊരു കലാകാരനല്ലേ, അറിയാവുന്ന പണി ചെയ്ത് ജീവിക്ക്. എന്തിനാണ് മറ്റുള്ളവരെക്കുറിച്ച് പരദൂഷണം പറയുന്നത്. നമുക്കിതൊന്നും അറിയാൻ പാടില്ലാഞ്ഞിട്ടല്ല, നിങ്ങൾ നിങ്ങളുടെ പ്രഫഷനില് ശ്രദ്ധിക്ക്. അൻസിബയോടും കൂടിയാണ്, നിങ്ങളും നിങ്ങളുടെ കാര്യം നോക്കി ജീവിക്ക്.
‘അമ്മ’ സംഘടനയെ പടുത്തുയർത്തിയ ഒരുപാട് ആളുകളുണ്ട്, നിങ്ങൾ പരസ്പരം ചെളി വാരിയെറിയുമ്പോൾ കൊള്ളുന്നത് അവർക്കാണ്. ഈ സംഘടന പൊന്നുപോലെ കൊണ്ടു നടന്നവരുണ്ട്. ഇതിനു വേണ്ടി ജീവൻ കളഞ്ഞവരുണ്ട്. സമയം കളഞ്ഞവരുണ്ട്. അവരുടെയൊക്കെ മുഖത്ത് ചെളി വാരിയെറിയുകയാണ്. കഷ്ടം, അത് ഏറ്റുപിടിക്കാൻ മറ്റുചില കോമാളികളും. എന്ത് ആവശ്യത്തിന്. വേറെ വല്ലോ പണിക്കും പൊയ്ക്കൂടെ. ‘അമ്മ’യുടെ കൈനീട്ടം കാത്തിരിക്കുന്ന എത്രയോ പേരുണ്ട് സംഘടനയിൽ. കണ്ണിന്റെ ചികിത്സ ചെയ്യുന്നവർ, മറ്റു ചികിത്സ നേടുന്നവർ ഒരുപാട് പേരുണ്ട്. എന്തിനാണ് സംഘടനയെ ഇങ്ങനെ നാറ്റിക്കുന്നത്. ഇതൊക്കെ പറയാൻ എനിക്കൊരു പേടിയുമില്ല.
താരസംഘടനയായ ‘അമ്മ’യിൽനിന്നു രാജിവച്ച ജോയിന്റ് സെക്രട്ടറി അൻസിബ ഹസന്റെ ആരോപണങ്ങളോടു പ്രതികരിച്ച് കൂടുതൽ താരങ്ങൾ രംഗത്തെത്തിയതോടെയാണ് സംഘടനയിലെ കലഹം രൂക്ഷമായത്.
അതേസമയം അതേസമയം അന്സിബയുടെ രാജിയില് തുടങ്ങിയ ആരോപണ പ്രത്യാരോപണങ്ങള് എഎംഎംഎയില് കടുത്ത പ്രതിസന്ധി ഉടലെടുത്തിരിക്കുകയാണ്. കൂടുതല് താരങ്ങള് ഇരുചേരിയായി തിരിഞ്ഞ് പ്രശ്നം കൂടുതല് വഷളാവുകയാണ്.
