കൊല്‍ക്കൊത്ത: തൃണമൂലിന്റെ ഡയമണ്ട് ഹാര്‍ബര്‍ മോഡല്‍ ഇപ്പോള്‍ നഷ്ട ഹാര്‍ബര്‍ മോഡല്‍ ആയി മാറിയെന്ന് ഫാള്‍ട്ട നിയോജകമണ്ഡലത്തിലെ ബിജെപിയുടെ മൃഗീയ വിജയത്തിന് ശേഷം ബംഗാള്‍ മുഖ്യമന്ത്രി സുവേന്ദു അധികാരി. മമതയുടെ മരുമകന്‍ അഭിഷേക് ബാനര്‍ജി എംപിയായ ഡയമണ്ട് ഹാര്‍ബര്‍ ലോക് സഭാ മണ്ഡലത്തിന് കീഴിലുള്ള നിയോജകമണ്ഡലമാണ് ഫാള്‍ട്ട.
ഡയമണ്ട് ഹാര്‍ബറില്‍ എല്ലാ വോട്ടര്‍മാരുടെയും വീട്ടുപടിക്കലേക്ക് സര്‍ക്കാര്‍ സഹായങ്ങള്‍ എത്തിക്കും എന്നതാണ് അഭിഷേക് ബാനര്‍ജി പ്രഖ്യാപിച്ച ‘ഡയമണ്ട് ഹാര്‍ബര്‍ മോഡല്‍’ എങ്കിലും സര്‍ക്കാര്‍ ഭൂമി തട്ടിപ്പറിക്കല്‍, കുറ്റകൃത്യം, അഴിമതി, ഭീഷണി, കള്ളവോട്ട്, ബൂത്തുപിടുത്തം എന്നിങ്ങനെ ഒരു ക്രൈം സിന്‍ഡിക്കേറ്റായി മാറി ഈ ‘ഡയമണ്ട് ഹാര്‍ബര്‍ മോഡല്‍’. അഭിഷേക് ബാനര്‍ജിയും തൃണമൂല്‍ ഗുണ്ട ജഹാംഗീര്‍ ഖാനും ഇവിടെ പല സര്‍ക്കാര്‍ ഭൂമിയും ബലപ്രയോഗത്തിലൂടെ കയ്യടക്കിയിട്ടുണ്ട്. പ്രതിഷേധിക്കുന്ന ഗ്രാമീണരെ ഓടിക്കാന്‍ സ്ത്രീകളെ കൂട്ടബലാത്സംഗത്തിന് വരെ ജഹാംഗീര്‍ ഖാന്‍ ഇരയാക്കിയിട്ടുണ്ടെന്നാണ് ആരോപണം.
ഞായറാഴ്ച നടന്ന വോട്ടെണ്ണലില്‍ ബിജെപി സ്ഥാനാര്‍ത്ഥി ദേബാംശു പാണ്ഡ 1.09 ലക്ഷം വോട്ടുകള്‍ക്കാണ് ഇവിടെ വിജയിച്ചത്. ഇതോടെ ബംഗാളിലെ ആകെയുള്ള 294 സീറ്റുകളില്‍ ബിജെപിയുടെ വിജയം 208 ആയി ഉയര്‍ന്നു.
ഒരു ലക്ഷം വോട്ടിനെങ്കിലും ബിജെപിയുടെ ദേബാംശു പാണ്ഡെയെ വിജയിപ്പിക്കാന്‍ ഞാന്‍ വോട്ടര്‍മാരോട് ആവശ്യപ്പെട്ടിരുന്നു. അവര്‍ ഒരു ലക്ഷത്തി ഒമ്പതിനായിരം വോട്ടുകള്‍ക്ക് വിജയിപ്പിച്ചു. ഇതിന് ഞങ്ങള്‍ സുവര്‍ണ്ണ ഫാള്‍ട്ട നിര്‍മ്മിച്ച് കൊണ്ട് പ്രത്യുപകാരം ചെയ്യുമെന്നും സുവേന്ദു അധികാരി പറഞ്ഞു.
