കാസര്‍കോട്: കപ്പല്‍ നിര്‍മാണത്തില്‍ ചരിത്രം സൃഷ്ടിച്ച് കൊച്ചി കപ്പല്‍ശാലയുടെ അനുബന്ധ സ്ഥാപനമായ ഉഡുപ്പി കൊച്ചിന്‍ ഷിപ്‌യാര്‍ഡ് ലിമിറ്റഡ്. കര്‍ണാടക മാല്‍പെയിലെ ഉഡുപ്പി സിഎസ്എല്‍ കഴിഞ്ഞ ഒരു വര്‍ഷത്തിനുള്ളില്‍ എട്ട് കപ്പലുകള്‍ നിര്‍മിച്ച് കൈമാറി. 358 ദിവസം കൊണ്ടാണ് ഈ അപൂര്‍വ നേട്ടം കൈവരിച്ചത്. 650 കോടി രൂപയുടെ വരുമാനമാണ് ഇതിലൂടെ നേടിയത്.
ജൂണില്‍ ഒമ്പതാമത്തെ കപ്പല്‍ കൂടി കൈമാറാനുള്ള ഒരുക്കത്തിലാണ് ഉഡുപ്പി സിഎസ്എല്‍. ഇതിലൂടെ ഭാരതത്തിന്റെ കപ്പല്‍ നിര്‍മാണ രംഗത്ത് തങ്ങളുടെ റിക്കാര്‍ഡ് നേട്ടം ഒന്നുകൂടി ഉറപ്പിക്കുകയാണ് ഈ കപ്പല്‍ശാല. നോര്‍വേ ആസ്ഥാനമായ വില്‍സണ്‍ ഷിപ് മാനേജ്‌മെന്റ് എഎസിനായി 2023 ജൂണിലെ കരാര്‍ പ്രകാരം നിര്‍മിച്ച 3800 ടണ്‍ ഭാരവാഹക ശേഷിയുള്ള അഞ്ച് ചരക്ക് കപ്പലുകളാണ് ഇതിന് മുമ്പ് നിര്‍മിച്ച് കൈമാറിയത്. ഈ ശ്രേണിയില്‍ ആറാമത്തെ കപ്പലാണ് ഇനി കൈമാറാനുള്ളത്. കൂടാതെ 6300 ടണ്‍ ഭാരവാഹക ശേഷിയുള്ള എട്ട് ഡ്രൈ കാര്‍ഗോ കപ്പലുകളുടെ നിര്‍മാണ ചുമതലയും ഉഡുപ്പി സിഎസ്എലിനാണ്.
2025 ഏപ്രില്‍ 23ന് ‘വില്‍സണ്‍ ഇക്കോ 1’ കൈമാറിക്കൊണ്ടാണ് ചരിത്ര നേട്ടത്തിലേക്കുള്ള യാത്ര ആരംഭിച്ചത്. കഴിഞ്ഞ ഏപ്രില്‍ 16ന് ‘വില്‍സണ്‍ ഇക്കോ 5’ കൂടി കൈമാറിക്കൊണ്ട് ഗതിവേഗം കൂട്ടി. ഇത് കൂടാതെ അദാനി ഹാര്‍ബര്‍ സര്‍വീസസിന് കീഴിലുള്ള ഓഷ്യന്‍സ് സ്പാര്‍ക്കിളിനായി 70 ടണ്‍ ഭാരവാഹക ശേഷിയുള്ള രണ്ട് ടഗ് ബോട്ടുകളും കൈമാറിയിരുന്നു. എട്ടാമത്തെ കപ്പലായ, ആത്മനിര്‍ഭര്‍ ഭാരത് സംരംഭത്തിന് കീഴില്‍ കേന്ദ്ര സര്‍ക്കാര്‍ പ്രഖ്യാപിച്ച അപ്രൂവ്ഡ് സ്റ്റാന്‍ഡേര്‍ഡ് ടഗ് ഡിസൈന്‍ ആന്‍ഡ് സ്‌പെസിഫിക്കേഷന്‍ (എഎസ്ടിഡിഎസ്) പദ്ധതി പ്രകാരം നിര്‍മിച്ച 70 ടണ്‍ ബൊള്ളാര്‍ഡ് പുള്‍ ടഗ് ബോംബെ ആസ്ഥാനമായുള്ള പോള്‍സ്റ്റാര്‍ മാരിടൈം ലിമിറ്റഡിന് മെയ് 16ന് കൈമാറി.
സാധാരണയായി ഒരു കപ്പല്‍ നിര്‍മിക്കാന്‍ 18 മുതല്‍ 20 മാസം വരെ എടുക്കും. ഈ സാഹചര്യത്തിലാണ് 12 മാസത്തിനുള്ളില്‍ എട്ട് കപ്പലുകള്‍ എന്ന ലക്ഷ്യം കൈവരിച്ചത്. 1200 ഓളം ജീവനക്കാരുടെ സമര്‍പ്പണവും പരിശ്രമവുമാണ് ഇതിന് പിന്നില്‍. പല ഷിഫ്റ്റുകളിലായിട്ടായിരുന്നു ഇവരുടെ പ്രവര്‍ത്തനം. കാലാവസ്ഥ അനുകൂലമായാല്‍ ജൂണില്‍ തന്നെ ഒമ്പതാമത്തെ കപ്പലിന്റെ കൈമാറ്റം നടക്കുമെന്ന് ഉഡുപ്പി സിഎസ്എല്‍ സിഇഒ എ. ഹരികുമാര്‍ ജന്മഭൂമിയോട് പറഞ്ഞു.
2017ല്‍ നഷ്ടത്തെത്തുടര്‍ന്ന് പൂട്ടിയ ടെബ്മ ഷിപ്‌യാര്‍ഡ് ലിമിറ്റഡ് എന്ന സ്വകാര്യ കപ്പല്‍ നിര്‍മാണ കമ്പനിയെ 2020 ലാണ് കൊച്ചിന്‍ ഷിപ്‌യാര്‍ഡ് ഏറ്റെടുക്കുന്നത്. 2021ല്‍ കപ്പല്‍ നിര്‍മാണം പുനരാരംഭിച്ചു. മൂന്ന് വര്‍ഷം കൊണ്ട് ലാഭത്തിന്റെ പാതയിലെത്തി. നിലവില്‍, ആഭ്യന്തര ഉപഭോക്താക്കള്‍ക്കായി 10 ടഗ് ബോട്ടുകളുടെയും അന്താരാഷ്‌ട്ര വിപണികള്‍ക്കായി 6,300 ഡെഡ്വെയ്റ്റ് ടണ്‍ ശേഷിയുള്ള എട്ട് വലിയ കാര്‍ഗോ കപ്പലുകളുടെയും നിര്‍മാണത്തിലാണ് യുസിഎസ്എല്‍.
