കണ്ണൂര്: മുന് മുഖ്യമന്ത്രിയും നിലവില് പ്രതിപക്ഷ നേതാവുമായ പിണറായി വിജയന്റെ പാണ്ട്യാല മുക്കിലുള്ള വീടിന് മുന്നിലെ പൊലീസ് കാവല് പിന്വലിക്കാന് ആഭ്യന്തര വകുപ്പ് നീക്കം. ഇതുസംബന്ധിച്ചു കണ്ണൂരിലെ രഹസ്യാന്വേഷണ വിഭാഗം ആഭ്യന്തര വകുപ്പിന് അടിയന്തിര റിപ്പോര്ട്ട് നല്കിയെന്നാണ് സൂചന. പിണറായി മുഖ്യമന്ത്രി പദവി ഒഴിഞ്ഞ് പ്രതിപക്ഷ നേതാവായിട്ടും പൂട്ടിയിട്ടിരിക്കുന്ന വീടിന് പൊലീസുകാര് കാവല് തുടരുന്നത് മാധ്യമങ്ങളില് വാര്ത്തയായതിനെ തുടര്ന്നാണ് സര്ക്കാരിന്റെ ശ്രദ്ധയില്പ്പെടുന്നത്.
പിണറായിയുടെ വീടിന് സിസിടിവി കാമറ സുരക്ഷ പൊലിസ് നേരത്തെ ഏര്പ്പെടുത്തിയിട്ടുണ്ട്. ഏകദേശം 500 മീറ്റര് മാത്രമേ പിണറായിയുടെ വീടും പിണറായി പൊലിസ് സ്റ്റേഷനും തമ്മിലുള്ളൂ.
കഴിഞ്ഞ 10 വര്ഷമായി വെയിലിലും മഴയിലും സൗകര്യങ്ങള് ഒന്നുമില്ലാതെയാണ് പൊലീസ് ഉദ്യോഗസ്ഥര് പിണറായി വിജയന്റെ വീടിന് മുന്നില് കാവല് ജോലി ചെയ്യുന്നത്. പിണറായി വിജയനും കുടുംബവും തലസ്ഥാനത്ത് തുടരുമ്പോഴും പൂട്ടിയിട്ട വീടിന് കാവല് തുടരുകയായിരുന്നു.
വീടിന് മുന്നില് ഒരു കേടായ ഒരു ജീപ്പ് കൊണ്ടിട്ട് അതിലാണ് പൊലീസുകാര് വെയിലത്തും മഴയത്തും അഭയം തേടിയിരുന്നത്. റോഡരികില് പൊലിസ് ജീപ്പ് നിര്ത്തിയിട്ടിരിക്കുന്നത് മറ്റു വാഹനങ്ങള്ക്ക് കടന്നുപോകാനും ബുദ്ധിമുട്ടാണ്.കാവല് നില്ക്കുന്നവര്ക്ക് ശുചിമുറി സൗകര്യം പോലുമില്ല. തൊട്ടടുത്ത ത്രിവേണി സൂപ്പര് മാര്ക്കറ്റിലെ ശൗചാലയമാണ് ഇവര് പ്രാഥമിക കാര്യങ്ങള്ക്ക് ഉപയോഗിക്കുന്നത്.
വേങ്ങാട് പഞ്ചായത്തില് പാര്ട്ടി ഗ്രാമമായ പാണ്ട്യാലമുക്കിലാണ് പിണറായിയുടെ വീട് സ്ഥിതിചെയ്യുന്നത്. പിണറായി സിപിഎം സംസ്ഥാനസെക്രട്ടറിയായ വേളയിലാണ് പഴയ വീട് പൊളിച്ചു പുതിയ വീട് നിര്മ്മിച്ചത് .തെരഞ്ഞെടുപ്പ് തോല്വിക്ക് ശേഷം പിണറായി വിജയന് വിവി ഐ പി ക്കുള്ള സെഡ് കാറ്റഗറി സര്ക്കാര് പിന്വലിച്ചിരുന്നു. പ്രതിപക്ഷ നേതാവിനുള്ള വൈ കാറ്റഗറി മാത്രമാണ് ഇപ്പോള് പിണറായിക്കുള്ളത്.
