ന്യൂദല്‍ഹി : സിപിഎം കേന്ദ്രകമ്മിറ്റി യോഗത്തില്‍ നിന്ന് വിട്ടുനിന്ന് മുന്‍ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയന്‍.പിണറായിക്ക് കടുത്ത പനിയാണെന്നും യാത്ര ഒഴിവാക്കാന്‍ ഡോക്ടര്‍ നിര്‍ദേശിച്ചുവെന്നുമാണ് വിവരം. ദല്‍ഹിയിലേക്ക് ടിക്കറ്റ് ബുക്ക് ചെയ്തിരുന്നുവെന്നും പിന്നീട് അത് ക്യാന്‍സല്‍ ചെയ്‌തെന്നുമാണ് അദ്ദേഹവുമായി ബന്ധപ്പെട്ട വൃത്തങ്ങള്‍ പറയുന്നത്.
കേരളത്തിലെ തിരഞ്ഞെടുപ്പ് തോല്‍വി അവലോകനം ചെയ്യാനാണ് യോഗം ചേരുന്നത്. പിണറായി വിജയനും സിപിഎം സംസ്ഥാന സെക്രട്ടറി എം വി ഗോവിന്ദനുമെതിരെ ഇന്നും ഏരിയ കമ്മിറ്റികളില്‍ രൂക്ഷ വിമര്‍ശനമുയര്‍ന്നു.
കേരളത്തിലെ തിരിച്ചടിക്ക് കാരണം ഭരണ വിരുദ്ധ വികാരം അല്ലെന്നാണ് കേന്ദ്ര കമ്മറ്റിക്ക് മുന്നില്‍ വച്ച റിപ്പോര്‍ട്ടിലെ പരാമര്‍ശം.രണ്ടാം പിണറായി സര്‍ക്കാര്‍ നിരവധി ജനക്ഷേമ പദ്ധതികള്‍ നടപ്പാക്കി. ന്യൂനപക്ഷ വോട്ടുകള്‍ യുഡിഎഫിന് അനുകൂലമായി ഏകോപിച്ചത് തിരിച്ചടിയായി. ബിജെപി വോട്ടുകളും യുഡിഎഫിന് അനുകൂലമായെന്നാണ് റിപ്പോര്‍ട്ടിലെ വാദം!.വിമതര്‍ ആസൂത്രിതമായ നീക്കം നടത്തി പാര്‍ട്ടിയെ വഞ്ചിച്ചു. തിരഞ്ഞെടുപ്പ് തിരിച്ചടിക്ക് കൂട്ടായ ഉത്തരവാദിത്തമെന്നും റിപ്പോര്‍ട്ടില്‍ ഉണ്ട്. കേന്ദ്ര കമ്മിറ്റി യോഗത്തില്‍ ചര്‍ച്ചകള്‍ തുടരുകയാണ്.
