മലപ്പുറം :എസ്ഡിപിഐ നേതാവുമൊത്തുള്ള പൊളിറ്റ് ബ്യൂറോ അംഗം എ വിജയരാഘവന്റെ വിഡിയോ വിവാദമായ പശ്ചാത്തലത്തില് ന്യായീകരണവുമായി സിപിഎം മലപ്പുറം ജില്ലാ സെക്രട്ടറിയേറ്റ്.
സിപിഎം ജില്ലാ കമ്മിറ്റി അംഗം ഗഫൂര് പി ലില്ലീസിന്റെ സഹോദരന്റെ ഗൃഹപ്രവേശനത്തിന് സംഘടിപ്പിച്ച ചടങ്ങിലാണ് വിജയരാഘവന് പങ്കെടുത്തത്.ഇതിനോടനുബന്ധിച്ച് നടത്തിയ ഗാനമേളയില് എസ്ഡിപിഐ പ്രാദേശിക നേതാവ് പാടുമ്പോള് വിജയരാഘവന് സമീപത്തെ ഹാളില് ഭക്ഷണം കഴിക്കുന്ന വീഡിയോ ആണ് സമൂഹമാധ്യമങ്ങളില് പ്രചരിപ്പിക്കുന്നതെന്നാണ് സി പി എം വിശദീകരണം.പാര്ട്ടി നേതാക്കളെ തിരഞ്ഞുപിടിച്ച് വ്യക്തിഹത്യ നടത്താനുള്ള ബോധപൂര്വ നീക്കങ്ങളുടെ ഭാഗമാണ് ഇത്തരം വാര്ത്തകളെന്നാണ് ആരോപണം.എ വിജയരാഘവനെതിരായി സാമൂഹ്യ മാധ്യമങ്ങളില് നടത്തുന്ന പ്രചാരണം അപലപനീയമാണ്.
മതതീവ്രവാദ ശക്തികള്ക്കെതിരെ ശക്തമായ നിലപാടെടുത്ത് മുന്നോട്ടുപോകുന്ന രാഷ്ട്രീയ നേതാവാണ് വിജയരാഘവനെന്നും മതനിരപേക്ഷ നിലപാട് ഉയര്ത്തിപ്പിടച്ചതിന്റെ പേരില് നടക്കുന്ന കടന്നാക്രമണത്തെ പ്രതിരോധിച്ചാണ് അദ്ദേഹം രാഷ്ട്രീയ പ്രവര്ത്തനം നടത്തുന്നതെന്നും മലപ്പുറം ജില്ലാ സെക്രട്ടറിയേറ്റിന്റെ പ്രസ്താവനയില് പറയുന്നു.അടിസ്ഥാനരഹിത ആരോപണങ്ങളുയര്ത്തി വ്യക്തിഹത്യ നടത്താനുള്ള നീക്കത്തെ പാര്ട്ടി അവജ്ഞയോടെ തള്ളിക്കളയുന്നു.
