ഇന്ത്യ അടുത്തിടെയാണ് അഗ്നി-5 മിസൈലിന്റെ ഏറ്റവും പുതിയ പതിപ്പിന്റെ പരീക്ഷണം നടത്തിയത് . .‘അഗ്നി’ കുടുംബത്തിൽ നിന്നുള്ള നൂതന വകഭേദമായിരുന്നു ഈ മിസൈൽ . ഒന്നിലധികം ലക്ഷ്യങ്ങളെ ഒരേസമയം ആക്രമിക്കാൻ കഴിവുള്ള മിസൈലാണിത്.എം.ഐ.ആർ.വി (മൾട്ടിപ്പിൾ ഇൻഡിപെൻഡന്റ്ലി ടാർഗെറ്റബിൾ റീ-എൻട്രി വെഹിക്കിൾ) സിസ്റ്റം ഘടിപ്പിച്ച നൂതന അഗ്നി മിസൈലിന്റെ വിജയകരമായ പറക്കൽ പരീക്ഷണമാണ് ഇന്ത്യ നടത്തിയത്. അതിനു പിന്നാലെ അഗ്നിയുമായി ഏറ്റുമുട്ടാൻ ശേഷിയുള്ള മിസൈലുകൾ പാകിസ്ഥാനും, ചൈനയ്ക്കുമുണ്ടോ എന്നാണ് സമൂഹമാധ്യമങ്ങളിലെ ചർച്ച .
.അഗ്നി-5 ന്റെ പ്രവർത്തന പരിധി 5,000–5,500 കിലോമീറ്ററാണ്, ഇത് 7,000–8,000 കിലോമീറ്റർ വരെ നീട്ടാനും കഴിയും. ഇതിൽ എം.ഐ.ആർ.വി (മൾട്ടിപ്പിൾ ഇൻഡിപെൻഡന്റ്ലി ടാർഗെറ്റബിൾ റീ-എൻട്രി വെഹിക്കിൾ) സാങ്കേതികവിദ്യയും സജ്ജീകരിച്ചിട്ടുണ്ട്. അതായത് ഒരൊറ്റ മിസൈലിന് ഒരേസമയം വ്യത്യസ്ത ലക്ഷ്യങ്ങളിലേക്ക് ഒന്നിലധികം ആണവ വാർഹെഡുകൾ എത്തിക്കാൻ കഴിയും.
പാകിസ്ഥാന്റെ മുഴുവൻ ഭാഗവും , ചൈനയുടെ മിക്ക പ്രധാന നഗരങ്ങളും തകർക്കാൻ ശേഷിയുള്ള മിസൈലാണ് അഗ്നി 5 . പാകിസ്ഥാനിലെ ഇസ്ലാമാബാദ്, കറാച്ചി, ലാഹോർ, റാവൽപിണ്ടി, പെഷവാർ, ക്വറ്റ മുതലായവ ഉൾപ്പെടെ ഭസ്മമാക്കാൻ അഗ്നി-5 മതിയാകും . ചൈനയുടെ ബെയ്ജിംഗ്, ഷാങ്ഹായ്, ഗ്വാങ്ഷോ, ഷെൻയാങ്, ഉറുംകി, നിരവധി സൈനിക താവളങ്ങൾ എന്നിവയും അഗ്നിയുടെ പരിധിയിൽ വരും.
അഗ്നിയോട് ഏറ്റുമുട്ടാനാകും എന്ന് പാകിസ്ഥാന് തന്നെ ഉറപ്പില്ലെങ്കിലും പാകിസ്ഥാന്റെ ഷഹീൻ-III എന്ന മിസൈലിന്റെ ദൂരപരിധി 2,750 കിലോമീറ്ററാണ് . ഇതിന്റെ നീളം 19.3 മീറ്ററാണ്. പാകിസ്ഥാന്റെ ഏറ്റവും ദൈർഘ്യമേറിയ മിസൈലാണിത്. ഇന്ത്യ മുഴുവൻ ആക്രമിക്കാൻ ഇതിന് കഴിയുമെന്നാണ് പാകിസ്ഥാന്റെ അവകാശവാദം .
അബാബീൽ എന്ന പാക് മിസൈലിന് 2,200 കിലോമീറ്റർ ദൂരപരിധിയാണുള്ളത് . എന്നാൽ MIRV ശേഷി, ഉയർന്ന വേഗത, മികച്ച കൃത്യത എന്നിവയിൽ അഗ്നിയെ വെല്ലാൻ ഷഹീനോ, അബാബീലിനോ ആകില്ല. ചൈനയുടെ DF-41 മിസൈലിന് 12,000–15,000 കിലോമീറ്ററാണ് ദൂരപരിധി. MIRV ശേഷിയുള്ള ലോകത്തിലെ ഏറ്റവും ശക്തമായ ഐസിബിഎമ്മുകളിൽ ഒന്നായാണ് ഇത് അറിയപ്പെടുന്നത് . ഇന്ത്യയ്ക്ക് പുറമേ, അമേരിക്ക, യൂറോപ്പ് തുടങ്ങിയ വിദൂര ലക്ഷ്യങ്ങളിൽ എത്താൻ ചൈനയുടെ ഐസിബിഎമ്മുകൾക്ക് കഴിവുണ്ടെന്നാണ് റിപ്പോർട്ട്. അതുകൊണ്ട് തന്നെ ഇന്ത്യൻ മിസൈലുകളുടെ ദൂരപരിധി വർധിപ്പിക്കാനുള്ള പരീക്ഷണങ്ങളാണ് ഇനി ആവശ്യം.
