തിരുവനന്തപുരം : കേരള സംസ്ഥാന സാംസ്കാരിക പ്രവര്ത്തക ക്ഷേമനിധി ബോര്ഡ് ചെയര്മാന് സ്ഥാനം നടന് മധുപാല് രാജിവച്ചു.സംസ്ഥാനത്ത് ഭരണമാറ്റമുണ്ടായ പശ്ചാത്തലത്തിലാണ് രാജി. കഴിഞ്ഞ നാല് വര്ഷങ്ങളില് സാംസ്കാരിക ക്ഷേമനിധി ബോര്ഡിനെ കുറ്റമറ്റ രീതിയില് മുന്നോട്ട് കൊണ്ടുപോകാന് കഴിഞ്ഞതായി അദ്ദേഹം വാര്ത്താക്കുറിപ്പില് അറിയിച്ചു.
ക്ഷേമനിധി ബോര്ഡില് നിന്നുള്ള ധനസഹായം ഉയര്ത്താനായത് തന്റെ കാലത്തെ പ്രധാന നേട്ടമായി മധുപാല് ചൂണ്ടിക്കാട്ടി.4000 രൂപയായിരുന്ന പെന്ഷന് 5000 ആയി വര്ധിപ്പിച്ചതും 1100 രൂപയായിരുന്ന കുടുംബ പെന്ഷനും അവശതാ പെന്ഷനും 1600 ആക്കി മാറ്റിയതും ഉയര്ത്തി കാട്ടുന്നു.2026 ഏപ്രില് മാസത്തില് മാത്രം 4600 പേര്ക്ക് 5000 രൂപ വീതം പെന്ഷനും 375 പേര്ക്ക് 1600 രൂപ വീതം അവശതാ പെന്ഷനും വിതരണം ചെയ്തു. മറ്റ് ധനസഹായങ്ങളും ഗണ്യമായി വര്ധിപ്പിച്ചു. വിവാഹ ധനസഹായം 25,000 രൂപയില് നിന്ന് 50,000 ആയി വര്ദ്ധിപ്പിച്ചു. ഒന്നര ലക്ഷമായിരുന്ന ചികിത്സ ധനസഹായം രണ്ട് ലക്ഷമായും പതിനായിരം രൂപയായിരുന്ന മരണാനന്തര ധനസഹായം 25,000 ആക്കാനും കഴിഞ്ഞിട്ടുണ്ടെന്ന് മധുപാല് പറയുന്നു.
ബോര്ഡിന്റെ തനത് ഫണ്ടില് നിന്നുമാണ് പെന്ഷന് അടക്കം ആനുകൂല്യങ്ങള് നല്കുന്നത്. സിനിമാ ടിക്കറ്റന്മേല് ലഭിക്കുന്ന 3 രൂപ സെസും അംഗങ്ങളില് നിന്ന് പിരിക്കുന്ന അംശദായവുമാണ് ബോര്ഡിന്റെ പ്രധാന വരുമാന സ്രോതസ്. 2022ല് കരുതല് ധനമായി ഉണ്ടായിരുന്ന 23,45,035 രൂപ ഈ വര്ഷം 75,72,572 രൂപയായി ഉയര്ത്താനായി. അംഗങ്ങളുടെ എണ്ണത്തിലും വലിയ വര്ധനവുണ്ടായി. കഴിഞ്ഞ 5 വര്ഷത്തിനിടെ 2245 പേര് പുതുതായി ചേര്ന്നതോടെ മൊത്തം അംഗസംഖ്യ 20,592 ആയി ഉയര്ന്നു.
വിവിധ പെന്ഷനുകള്, അപേക്ഷകള്, ധനസഹായങ്ങള് എന്നിവ ഓണ്ലൈനായി അപേക്ഷിക്കാന് സംവിധാനമൊരുക്കി. ഇതോടെ ബോര്ഡിന്റെ പ്രവര്ത്തനങ്ങള് കൂടുതല് സുതാര്യമായി.
