ഇടുക്കി : നെടുങ്കണ്ടത്ത് കെഎസ്യു, യൂത്ത് കോണ്ഗ്രസ് പ്രവര്ത്തകര്ക്ക് നേരെ സിപിഎം-ഡിവൈഎഫ്ഐക്കാരുടെ ആക്രമണം.പരിക്കേറ്റ മൂന്ന് കോണ്ഗ്രസ് പ്രവര്ത്തകരെ ആശുപത്രിയില് പ്രവേശിപ്പിച്ചു.ഞായറാഴ്ച അര്ധരാത്രിയോടെ നെടുങ്കണ്ടം ഫെസ്റ്റ് ഗ്രൗണ്ടില് വച്ചാണ് ആക്രമണമുണ്ടായത്.
യൂത്ത് കോണ്ഗ്രസ് മണ്ഡലം വൈസ് പ്രസിഡന്റ് ബിബിന് അമ്മഞ്ചേരി, കെഎസ്യു ജില്ലാ സെക്രട്ടറി അലന്റ് സജി, മണ്ഡലം ഭാരവാഹി അലന്റ് ജോസ് എന്നിവര്ക്കാണ് പരിക്കേറ്റത്. തലയ്ക്ക് ഗുരുതര പരിക്കേറ്റ അലന്റ് ജോസിനെ കട്ടപ്പനയിലെ സ്വകാര്യ ആശുപത്രിയില് പ്രവേശിപ്പിച്ചു. മറ്റ് രണ്ടുപേരെ നെടുങ്കണ്ടത്തെ സ്വകാര്യ ആശുപത്രിയിലും പ്രവേശിപ്പിച്ചു.
ആക്രമണം ഉണ്ടായി മണിക്കൂറുകള് കഴിഞ്ഞിട്ടും കേസെടുക്കാനോ പ്രതികളെ പിടികൂടാനോ പൊലീസ് തയാറായില്ലെന്ന് ആരോപിച്ച് യൂത്ത് കോണ്ഗ്രസ്, കെഎസ്യു പ്രവര്ത്തകര് നെടുങ്കണ്ടം പൊലീസ് സ്റ്റേഷനിലേക്ക് വന് പ്രതിഷേധ മാര്ച്ച് നടത്തി. സ്റ്റേഷന് വളപ്പില് അതിക്രമിച്ചു കയറിയ പ്രവര്ത്തകരും പൊലീസും തമ്മില് വാക്കേറ്റമുണ്ടായി.
പ്രതികളെ ഉടന് അറസ്റ്റ് ചെയ്യണമെന്ന് ആവശ്യപ്പെട്ട് പ്രവര്ത്തകര് പൊലീസ് സ്റ്റേഷന് മുന്നില് കുത്തിയിരുന്നു. പൊലീസ് കേസെടുത്തതിന് ശേഷമാണ് പ്രതിഷേധക്കാര് സമരം അവസാനിപ്പിച്ച് പിരിഞ്ഞുപോയത്.
