ബോളിവുഡിന്റെ ‘ബിഗ് ബി ‘ അമിതാഭ് ബച്ചൻ സോഷ്യൽ മീഡിയയിൽ പതിവായി വിവിധ പോസ്റ്റുകൾ പങ്കിടാറുണ്ട് . അടുത്തിടെ, അദ്ദേഹം തന്റെ ഇൻസ്റ്റാഗ്രാം അക്കൗണ്ടിൽ പോസ്റ്റ് ചെയ്ത ഒരു വീഡിയോയാണ് ഇപ്പോൾ ചർച്ചയാകുന്നത് .ഇന്ത്യയും ഇറാനും തമ്മിലുള്ള ചരിത്രപരമായ ബന്ധം എടുത്തുകാണിക്കുന്ന പുരാതന വിഷ്ണു ക്ഷേത്രത്തിന്റെ ദൃശ്യങ്ങളാണ് അദ്ദേഹം പങ്ക് വച്ചിരിക്കുന്നത്.
അമിതാഭ് ബച്ചൻ പങ്കിട്ട വീഡിയോയിൽ കാണപ്പെടുന്ന പുരാതന വിഷ്ണു ക്ഷേത്രം ഇറാനിലെ ബന്ദർ അബ്ബാസിലാണ് സ്ഥിതി ചെയ്യുന്നത്. 1892 ൽ ഖജർ കാലഘട്ടത്തിലാണ് ഇത് നിർമ്മിച്ചത്. തന്റെ പോസ്റ്റിനൊപ്പമുള്ള അടിക്കുറിപ്പിൽ ബച്ചൻ ഈ വിശദാംശങ്ങളും നൽകിയിട്ടുണ്ട്. ഇന്ത്യയും ഇറാനും തമ്മിലുള്ള ബന്ധം എത്രത്തോളം ആഴത്തിൽ വേരൂന്നിയതും പുരാതനവുമാണെന്ന് മനസിലാക്കിയ ഉപഭോക്താക്കൾ പല തരത്തിലാണ് വീഡിയോയ്ക്ക് കമന്റ് ചെയ്യുന്നത്.
പേർഷ്യൻ ഭാഷയിൽ ആലപിച്ചിട്ടുണ്ടെങ്കിലും, ഭഗവാൻ വിഷ്ണുവിന് സമർപ്പിച്ചിരിക്കുന്ന സ്തുതിഗീതവും ദൃശ്യങ്ങൾക്കൊപ്പം അമിതാഭ് ബച്ചൻ പങ്ക് വച്ചിട്ടുണ്ട് . “ഇറാനിലെ ബന്ദർ അബ്ബാസിൽ സ്ഥിതി ചെയ്യുന്ന പുരാതന ഹിന്ദു വിഷ്ണു ക്ഷേത്രം, 1892-ൽ ഖജർ കാലഘട്ടത്തിൽ നിർമ്മിച്ചതാണ്. അക്കാലത്ത് നഗരത്തിൽ ജോലി ചെയ്തിരുന്ന ഇന്ത്യയിൽ നിന്ന് എത്തുന്ന ഹിന്ദു വ്യാപാരികൾക്കായി ഇത് നിർമ്മിച്ചതാണ്. ഈ ഗാനം പേർഷ്യൻ ഭാഷയിലാണ്.” എന്നാണ് ബച്ചൻ തന്റെ കുറിപ്പിൽ പറയുന്നത്.
